July 31st, 2006
Robert Fiske spyr í grein í the Independent í dag: ‘How can we stand by and allow this to go on?’ og vísar þar í aðgerðarleysi aðlþjóðasamfélagsins hvað varðar stríðsyfirgang Ísraels gagnvart nágrönnum sínum í Líbanon og Palestínu. Jóhanna Eyjólfsdóttir framkvæmdastjóri Amnesty hér á landi benti á í viðtali um daginn hversu mjög öll umgjörð þessara stríðsátaka minnti á það sem gerðist í Rwanda árið 1994 þegar hið meinta alþjóðasamfélag stóð aðgerðarlaust hjá á meðan að tvær miljónir manna létu lífið í því sem fréttahaukar vestursins skilgreindu sem ættbálkaerjur. Þá eins og nú voru vestrænar þjóðir ekki seinar á sér í upphafi átakanna að gera allt til að “ná út” vestrænum ríkisborgurum. Þegar því var lokið mátti svo lýðurinn gera það sem hann vildi; SÞ og Vesturveldin kærðu sig í raun kollótt um framvinduna eftir það og fjölmiðlar misstu líka áhugann enda annað og mun mikilvægar stríð í þeirra augum í gangi; stríðið á Balkanskaga. Þar voru jú vestrænir menn að berjast í bakgarið Evrópu. Ábending Jóhönnu um hversu mjög aðgerðarleysi umheimsins nú minnir á aðgerðarleysið gagnvart íbúum Rwanda 1994 er bæði þörf og sönn og ætti því sem slík að vekja einhver viðbrögð. En því miður þá er eins og fjölmiðlafólk hafi ekkert lært - Arabarnir í Palestínu og Líbanon hafa ekki sama frétta- og samúðarstuðul og til dæmis þeir sem börðust í Kósóvó. Fjöldagrafir og lík í rústum í Beirút er ekki það sama og fjöldagrafir og lík í rústum í Srbrenica. Sennilega þess vegna vekur ábending Jóhönnu nánast engin viðbrögð og þess vegna mun spurningu Fiske sennilega ekki verða svarað af neinu viti. Á meðan að stríðið snertir okkur ekki beint og svo lengi sem íslenskir ríkisborgarar sem og aðrir vestrænir borgara eru óhultir höfum við, sem tilheyrum hinum ráðandi hluta heimsins, í raun engan áhuga á þessum “átökum”.
Bendi annars öllum á að lesa grein Robert Fiske í the Independent í dag.
July 29th, 2006
Hinn djúpvitri pólitíski skríbent Blaðsins, Kolbrún Bergþórsdóttir, skrifar hugvekju í Blaðið í dag um meint örlæti sitt í garð Vinstri Grænna. Þetta meinta örlæti felt einkum í því að KB líkar bara nokkuð vel við Svandísi Svavarsdóttur, að KB á orðaskipti við hana í kassaröðinni í Nóatúni og að KB virðist vera búin að analýsera VG og finna út sjálfsmynd þeirra felst í að vera bara alltaf á móti og forðast í lengstu lög að hafa völd.
Þessi stöðugi söngur um neikvæðni þeirra sem ekki aðhyllast úreltan Blairismann sem gömlu súru kratarnir eru að reyna að skreyta sig með (og gengur misvel meðal annars vegna fólks á borð við KB sem ekki fattar jókið) er ekki bara hallærislegur heldur mjög svo gamaldags. Hann er eiginlega bara á móti og segir mest um þá sem hann kyrja. Og talandi um sjálfsmyndarkrísu - mikið væri nú gott að KB tæki sig nú til og analýseraði sjáfa sig og sína frústrasjón út af óskilgreindri og óvissri tilveru sinni innan Samfylkingarinnar. Slík analýsering myndi kannski losa lesendur Blaðsins við tíða pistla KB þar sem hún bölsótast út í formann Samfylkingarinnar og skrifar á hana og persónu hennar þverrandi áhrifamátt Blairismans.
July 18th, 2006
The Independent bregst ekki frekar en fyrri daginn: http://news.independent.co.uk
July 14th, 2006
Sverrir Jakobsson vekur athygli á málefnum Strætó á bloggsíðunni sinni í dag og því að nú stendur til að draga verulega úr þjónustunni. Blálakkaðar klær íhaldsins eru nú að verða æ greinilegri eftir því sem nýr meirihluti sekkur dýpra í þægilega leðurstóla Ráðhússins og þá fjúka kosningaloforðin eitt af öðru. Fyrsti hópurinn sem fær að líta þessar bláu neglur eru farþegar Srætó sem eru eins og allir sem einhvern tíma hafa ferðast með Strætó vita, aðallega konur, börn, gamalmenni og undirmálsfólk. Hvítflibba miðaldra karlar eru álíka sjaldséðir í strætó og fílar í glerbúð á Laugaveginum. Í tilefni þessa niðurskurðar á þjónustu Strætó og sem mun fyrst og fremst bitna á fyrrgreindum hópi fólks er vert að rifja upp kosningaloforð íhaldsins sem hægt er að nálgast (ásamt öðrum góðum loforðum sem bíða þess að verða svikin - sem er örugglega ekki langt að bíða) á þessari slóð http://betriborg.is/xd/
Læt hér fylgja loforðið um upphituðu og upplýstu skýlin
Sjálfstæðismenn fluttu á síðasta fundi umhverfisráðs tvær tillögur til að bæta þjónustu við viðskiptavini Strætó. Annars vegar að hafinn verði undirbúningur að smíði og upsetningu upphitaðra biðskýla á fjölförnum biðstöðvum strætisvagna í Reykjavík, og hins vegar að hefja nú þegar undirbúning að því að töflur með upplýsingum um rauntímaferðir strætisvagna verði settar upp á skiptistöðvum og biðstöðvum strætisvagna í borginni.
Tillögurnar hljóða svo:
Tillaga um upphituð biðskýli
,,Umhverfisráð Reykjavíkur samþykkir að hefja undirbúning að smíði og upsetningu upphitaðra biðskýla á fjölförnum biðstöðvum strætisvagna í Reykjavík. Vinna skal að málinu í samstarfi við framkvæmdasvið borgarinnar, Strætó bs. og eftir atvikum við það einkafyrirtæki, sem gert hefur samning við Reykjavíkurborg um uppsetningu og rekstur biðskýla í borginni. Markmið verkefnisins verður að reisa biðskýli, sem henta íslenskri vetrarveðráttu, halda vatni og vindum og eru auk þess upphituð, strætisvagnafarþegum til hagsbóta. Stefnt skal að því að fyrstu skýlin verði tekin í notkun ekki síðar en haustið 2007.”
Tillaga um töflur með upplýsingum um rauntíma strætisvagna
,,Umhverfisráð Reykjavíkur samþykkir að hefja nú þegar undirbúning að því að töflur með upplýsingum um rauntímaferðir strætisvagna verði settar upp á skiptistöðvum og biðstöðvum strætisvagna í borginni. Stefnt skal að því að fyrstu töflurnar verði settar upp á þessu ári. Jafnframt verði biðstöðvum og skiptistöðvum gefin nöfn til að auðvelda ferðamönnum og öðrum notkun kerfisins.”
July 12th, 2006
Merkilegt hvað þessu framsóknarliði tekst alltaf að trana sér í allar fréttir á ljósvakamiðlum (nema þær sem Ozama er aðalhetjan) og á allar forsíður blaðanna. Miðað við stærð og kjörfylgi hefði maður haldið að lítil klausa á bls. 30-eitthvað dygði handa þessu liði. En neiónei. Einna verst er Fréttablaðið sem virðist telja það heilaga skyldu sína að hafa a.m.k. eina framsóknarfétt á dag á forsíðunni og slatta inni í blaðinu. Ég sem hélt í fávisku minni að sá snepill væri eitt að fylgiritum Bónus-Hagkaupa-auglýsingapésanna. Svo rammt kveður að þessu framsóknaræði á þeim bæð að stundum hefur maður á tilfinnigunni að gamli Tíminn sé risinn upp í öllu sínu veldi. - En kannski er þarna bara enn ein sönnunin um það hversu sterkt og effektíft hið fræga ættingja-vina-samherja-tengslapot Framsóknar er- alla vega virðist sem svo að velflestar rit-og fréttastjórnir fjölmiðla þessa lands vera undirlagðar af framsóknarsýki.
Hvað skyldi annars sá dagur heita þegar landslýður losnar við báð þessa fjanda?
July 1st, 2006
Þýskaland - Frakkland í úrslitaleiknum?
