Hin hliðin

Ólína fór á sitt fyrsta ball í dag. Jólaball leikskólans. Hún grét ekkert við komu jólasveinanna en þeir voru nú reyndar heldur ekkert að kássast upp á hana. Vildi þó ekkert stoppa til að spjalla við þá þegar gjöfin frá þeim var afhent. En annaðhvort hefur jólaböllum farið aftur eða jólaböllin sem ég fór á sem barn verið í hágæðaflokki.

* * *

Heimaprófi verður skilað fyrir hádegi á morgun. Verð ég þá tæknilega komin í jólafrí. Þó er stefnt á að lesa nokkrar greinar og jafnvel tvær MA ritgerðir fyrir jól. Nema nátturúlega það rigni yfir mig tilboðum um að leika við skemmtilegt fólk.

Þú getur aftur farið að baða þig. Nýjasti Rebusinn bíður eftir þér á Mánagötunni.

Mér er illt í bakinu og er með aumar herðar. Heimapróf er í fullum gangi svo ég get varla vænst þess að verkirnir hverfi í bráð. Það vill til að ég á pantaðan nuddtíma hjá Bobbu í Keflavík þegar öllu lærdómsveseni verður lokið. Hitapoki verður að duga fram að því.

* * *

Við bara finnum alls ekki jólaseríurnar okkar. Erum búin að leita í öllum skápum og í geymslunni. Mig er eiginlega farið að gruna að við höfum hennt þeim í einhverju tiltektaræðinu. Það þýðir því líklega ekki annað en að fjárfesta í nýjum jólaljósum. Kannski er það bara ágætt, þar sem ekki tókst mér að leggja mitt af mörkum í óráðsíu og eyðslusemi í aðdraganda forvals.

Annars sá ég merkilegt sparnaðarráð í Blaðinu í dag. Þar var fólki bent á að spara mætti peninga með því að aftengja talhólfið á símanum sínum þegar farið væri í gjafaverslunarferðir til útlanda. Það sé nefnilega svo dýrt að hringja í talhólf þegar maður er í útlöndum. Einhvernveginn sé ég nú allt annan sparnaðarpunkt í þessu litla ráði.

Ég þakka þeim sem studdu mig í forvali Vg í gær. Ég get ekki annað en verið himinlifandi með mína útkomu. Ég stefndi á fjórða sæti og því náði ég. Ég vil einnig óska öðrum sem hlutu góða kosningu til hamingju með árangurinn og þakka öllum frambjóðendunum þrjátíu fyrir skemmtilega kosningabaráttu. Kosningavakan var bráðskemmtileg og ég sem er orðin verulega slakur djammari var ekki komin heim fyrr en rétt fyrir kl. 3 í nótt.

Ég ætla hér með að leggja fram áætluð útgjöld mín vegna forvalsins:

Framlög í kaffisjóð flokksins á hinum ýmsu fundum og uppákomum í aðdraganda forvals kr.900
Efniskostnaður vegna kökubakstur fyrir framboðsfund kr. 500
Hækkaður símakostnaður kr. 400
Svartar bómullarsokkabuxur keyptar sérstaklega fyrir kosningavökuna kr.2700
Akstur með stuðningsmann á kjörstað kr. 100
Keypt eintak af Hér og nú kr. 395

Þetta gera samtals kr. 4995

Það vill til að sokkabuxurnar sem eru aðal útgjaldaliðurinn hér get ég notað margoft aftur.

Ég er enn södd eftir jólamálsverðinn í Friðarhúsi í gær. Þetta var ofsalega góður matur og skemmtiatriði Alexöndru Kjuregej skemmtilegt. Eins var gaman að sjá hversu vel frambjóðendur í forvali VG mættu.

En þá er bara að drífa sig á kjörstað og kjósa. Það ætla ég einmitt að gera núna.

Sjáumst svo á kosningavökunni, Skipholti 70, í kvöld.