Hin hliðin

Á laugardaginn mun ég halda erindi á þessari ráðstefnu sem haldinn er að frumkvæði búddaista. Ég mun tala fyrir hönd Samstarfshóps friðarhreyfinga. Nú væri því afskaplega æskilegt að ég fyndi smá ró í mínum beinum, settist niður, andaði djúpt og kæmi nokkrum setningum niður á blað. Kannski ég gleypi í mig hálfa töflu af róandi og sjái hvort það hjálpi ekki aðeins til.

Er þó að hugsa um að byrja á að láta huga reika meðan ég vaska upp. Held að nánast allar ritgerðir, svo og þau erindi og fyrirlestrar sem ég hef haldið hafi fæðst meðan ég er að vaska upp. Mér finnst alveg sérlega þægilegt að hugsa meðan á uppvastk stendur. Það sama gildir þó ekki um að þurka upp svo eftir svona tarnir er allt flæðandi í blautu leirtaui í eldhúsinu.

Niðurtröppunin á sterunum er í fullum gangi. Í dag tek ég “bara” 12 töflur. Niðurtröppunin er mun erfiðari en að éta bara sterafjöll. Var rækilega ofvirk í gærkvöldi en fékk útrás með því að skipa tengdaforeldrum mínum og Stebba fyrir. Sat sjálf eins og fín kona í sófanum og drakk kaffi og át súkkulaði. (Það hefur einmitt svo róandi áhrif). Hef verið að hugsa um að auka skammtinn af róandi en ekki alveg fengið mig í það. Er rosalega lélegur pilludópisti.

Íbúðin er þetta líka fín í dag. Þetta er sko rétti tíminn til að fá gesti í heimsókn…nema hvað ég gæti eipað svolítið. Tek kannski aðra svona törn einhverntíma á næstunni. Tengdaforeldrarnir ættu þá allavega að vera betur undir átökin búin andlega.

* * *

Ólína sefur sem aldrei fyrr úti í vagni. Er meira að segja búin að fara út og lýsa með vasaljósi á hana. En hún sefur bara hin sáttasta og tottar snuduna sína.

Í gær hitti ég nýjan lækni. Hún lagði til að ég reynd yrði ný meðferð á mér þar sem sterar í æð hafa ekki verið að skila nógu góðum árangri. Hún stakk upp á tvíþættri meðferð sem gengur annarsvegar út á að ég fari til sjúkraþjálfa sem æfi jafnvægiskerfið aðallega en láti mig einnig gera styrktaræfingar. Hinsvegar að ég prufi pillusterakúr.

Ég byrjaði á pillukúrnum í dag. Hann gengur út á að ég éti 16 steratöflur á dag (4×4) í fjóra daga en minnka skamtinn um eina töflu á dag. Að tuttugu dögum liðnum verð ég semsagt komin niður í núll töflur. Samhliða þessu þarf ég að taka magatöflur svo maginn eipi ekki af sterunum og svefntöflu. Miðað við það hvernig ástandið er núna klukkan tæplega miðnætti held ég að það væri ekki vitlaust að bæta róandi líka við. Ég er hýper ;o). Reyndar finnst mér ég strax vera hressari, en það gæti stafað af því hvað ég er hátt uppi.

Stefán heldur því einnig fram að röddin í mér hafi breyst í dag. Að hún sé hærri en venjulega. Merkilegur andskoti.

Hingað til hef ég aðeins farið í sterakúra sem vara fimm daga, en er þá reyndar að fá aðeins stærri skammt á sólarhring. Ég geri því ráð fyrir að næstu dagar eigi eftir að vera mikið stuð. Reyndar kannski full mikið stuð.

Ólína er loks farin að sýna speglinum á leikteppinu áhuga. Henni virðist þó finnast eitthvað bogið við þetta allt þar sem hún gáir altlaf á bak við hann í leit að hinu barninu og togar og tætir í bakhliðina. Svona er hún nú snjöll.

Stúdentablaðið fylgdi Fréttablaðinu í dag. Það var hressandi lesning. Það eru ár og öld síðan ég hef lesið jafn margar blaðsíður í Stúdentablaðinu og ég gerði í dag. Eða bara nokkru blaði yfir höfuð.

Þórey Pétursdóttir kitlaði mig. Það var ekki andskotalaust að telja öll þessi atriði upp en það hafðist þó á endanum. Og hér kemur listinn:

Sjö hlutir sem ég ætla að gera áður en ég dey:

- Ferðast til Mið-austurlanda
- Læra að elda kjötsúpu
- Reka herinn
- Kafa í tæru vatni
- Fara í sólarlandaferð
- Læra (allavega smá) gelísku
- Smakka hundakjöt

Sjö hlutir sem ég get:

- Fætt barn á mettíma
- Spilað “Stairway to heaven” á blokkflautu
- Búið til jafning sem gleður gamla einsetumenn
- Heklað og prjónað ef ég bara nenni
- Talað dönsku eins og innfædd
- Bitið í litlu tána á mér
- Látið hægri menn fara óstjórnlega í taugarnar á mér

Sjö hlutir sem ég get ekki:

- Drukkið Campari
- Haldið jafnvægi (já ég meina bara svona almennt)
- Hjólað (leiðir af jafnvægisleysinu)
- Sagt eitthvað fyndið án þess að hlæja sjálf
- Haldið lagi
- Fundist í lagi að pyntingar sé stundaðar hvort sem það er á föngum eða einhverjum öðrum

Sjö hlutir sem heilla mig við hitt kynið;

- Bringuhár
- Hugsjónir
- Hlýjar hendur
- Húmor
- Skeggbroddar
- Hlýjar tær
- Sjálfstraust

Sjö þekktir sem heilla:

- Johnny Deep
- Gerard Departieu
- Che Guevara
- Stefán Pálsson
- Sean Connery
- Felix Bergsson
- Gael García Bernal

Sjö orð/setningar sem ég segi oft:

- Ertu búin að kúka?
- Heyrðu manni…
- Jamm
- Hvernig skrifar maður…?
- Úff
- Hvað er klukkan?
- Já maður

Sjö hlutir sem ég sé núna:

- Nýja bangsan hennar Ólínu, hann Sir Llion
- Verulega ljót barmmerki sem Stefán er að gera fyrir ónefnd samtök
- Rauðvínsglas
- Tóman pela
- Fallegu sokkana sem Úrsúla prjónaði
- Barnavagn
- Blómakreytingu sem ég fékk frá stjórn MS-félagsins þegar ég var síðast á St.Jó.

Ég ætla svo að kitla Ernu, Pullu og Sigga Óla.

Þessi Viggó er nú ekki alveg í lagi. Minn maður er hins vegar í banastuði.

Húrra! Ég er orðin nafn meðal hinna nafnanna.

Myndatakan gekk vel. Meiningin er að skipta út myndinni á debet- og kreditkortunum. Ég virðist hafa klikkað á því að snyrta mig fyrir síðustu myndatöku og lít fyrir vikið út eins og háttsettur félagi í Baader-Meinhof á slæmum degi.

Landsráðstefna á morgun.

Hvað ætli ég hafi gert til að verðskulda það að Sverrir hætti að vera með link á mig á síðunni sinni? Samt linkar hann á alla og ömmur þeirra. Það er svolítið síðan ég tók eftir því að ég væri ekki lengur þarna á meðal hinn nafnanna en hef verið að byggja upp í mig kjark til að minnast á þetta við nokkurn mann.

* * *

Er farin að punta mig. Er að fara í passamyndatöku og þá er nú betra að mæta með hárið greitt.