Hin hliðin

Þá er komin 22.apríl og ég hef það bara ljómandi gott. Og fyrir þau ykkar sem ekki eruð þegar búin að spyrja þá er ekkert að gerast!!

* * *

Síðust daga hef ég verið óvenju framúrstefnuleg og hef tvisvar borðað ís úr annari ísbúð en þeirri á Hagamelnum. Fyrst fékk ég mér lítinn ís í boxi hjá Herberti Guðmundssyni. Það mun ég ekki gera aftur í bráð. Í gær var sumarkomu svo fagnað með kúluís á Ís Café. Hann var ljómandi góður og ég á ábyggilega eftir að borða fleiri ísa þaðan áður en sumarið er á enda.

Eftirfarandi frétt birtist á ruv.is fyrir nokkrum dögum:

Bandaríkin: Námsmannahreyfing gegn Coca Cola

Hreyfingin spratt upp eftir ákall frá verkalýðsfélögum í Kólumbíu. Þau staðhæfa að Coke hafi fengið dauðasveitir hægri manna til að myrða 8 verkamenn undanfarin ár, allt baráttumenn fyrir aðild verkafólks að stéttarsamtökum. Þá sakar námsmannahreyfingin Coca Cola um umhverfisspjöll á Indlandi, barnaþrælkun í El Salvador og að brjóta rétt á alnæmissmituðu verkafólki í Suður-Afríku. Námsmannahreyfingin gegn Coca Cola hefur náð út fyrir Bandaríkin. Þannig hafa nemendur þriggja háskóla á Írlandi, eins á Ítalíu og eins í Kanada samþykkt að sniðganga Coca Cola.

Það væri óskandi að Stúdentaráð HÍ tæki sér þessar námsmannahreyfingar til fyrirmyndar og losaði okkur við allar vörur Coca Cola Company úr Háskólanum.

Fórum í Bónus og gerðum stórinnkaup um hádegisbilið í dag. Eftir hverja svona Bónusferð tölum við um að við verðum að vera duglegri við að gera svona hagkvæm matarinnkaup en svo verður aldrei neitt almennilegt úr því og við verslum eins og við fáum borgað fyrir það í Nóatúni eða 10-11. Eftir Bónus fórum við í Rúmfatalagerinn og héldum hinum hagkvæmu innkaupum áfram.

Klukkan tvö skiptum við hinsvegar liði. Stefán fór á fyrirlestur um
afstæðiskenningu Einsteins en ég fór á Laugardagsfund VGR þar sem Steinþór Heiðarsson og Halla Gunnarsdóttir fjölluðu um Íran. Það var ljómandi skemmtilegur og vel heppnaður fundur.

Veit ekki hvernig restinni af deginum skal eytt en mér finnst ís át koma sterklega til greina.

Í gær bauð mamma í kjötsúpu. Mér finnst kjötsúpa góð.

Það er skömm að segja frá því en ég hef aldrei eldað kjötsúpu. Hef þó oft látið útskýra fyrir mér hvernig það er gert. Nú held ég að ég fari að taka mér tak og setji mér það markmið að vera búin að prufa að elda kjötsúpu áður en haustið kemur.

…æ ég kann ekki meira. Þú verður bara að syngja fyrir þig sjálf.

Afmælisbarn dagsins er frú Jóhanna. Ef ég man rétt er hún svo á leiðinni til Ítalíu á morgun. Ég óska henni því til hamingju með daginn og góðrar ferðar. Það á þó líklega ekki eftir að liggja fyrir henni í þessari ferð að upplifa það að vera sveittur ferðamaður þar sem hitinn í Mílanó virðist ekki vera nema 7 gráður. En megi ferðin verða hin ánægjulegasta þrátt fyrir það.

B-sides and rarities með Nick Cave er snilldin ein. Passar líka ótrúlega vel við værðarlegan huga minn þessa dagana.

Í dag kom svo í ljós að verkurinn eða brunatilfinningin sem ég hef haft efst í maganum undanfarna daga stafar af tognun í magavöðvum. Allt er nú mögulegt!

Þannig er nú það.

Í tilefni að þrítugs afmæli Stefáns buðu foreldrar hans okkur, mömmu og systkynum mínum á Grillið á Hótel Sögu. Þar fengum við einn þann besta mat sem ég hef á æfinni smakkað. Ég hafði aldrei áður borðað á Grillinu og hafði hreinlega ekki komið þarna upp. Útsýnið yfir borgina er mjög flott þarna uppi og að flestu leyti fannst mér það nú bara flottara en útsýnið úr Perlunni. Takk tengdó fyrir yndislega kvöldstund!!

* * *

Systir mín bauð mér núna áðan á frumsýningu á myndinni Þröng sýn. Ég get ekki linkað en það má lesa nánar um myndina á slóðinni http://www.icelandfilmfestival.is/myndir/island/#ThRONG_SYN_
Þetta var allt saman mjög framúrstefnulegt og ég er ekki alveg viss um að ég hafi alveg náð að meðtaka boðskap myndarinnar enda ekki vel að mér í heimi tilrauna hreyfimynda. Það var samt mjög gaman að fá tækifæri til að sjá loks þessa mynd sem ég er búin að heyra ýmislegt af í svo langan tíma en hef aldrei botnað upp né niður í. Semsagt örugglega alveg rosalega listrænt!

* * *

Mamma lánaði okkur þurkarann sinn. Það er bara verst að notkunarleiðbeiningarnar með honum hafa ekki komið í leitirnar og enginn í fjölskyldunni man almennilega hvernig hann virkar. Ég er engu að síður að gera tilraun með að þurka bleyjur í honum núna og er svolítið á tauginni yfir því að ég kveiki í húsinu eða eitthvað. Er einhver þarna úti sem á leiðbeiningar að Electrolux WT255 þurkara eða kann á stillingarnar á honum? Öll ráð væru allavega óskaplega vel þegin.

Hann á afmæli í dag
Hann á afmæli í dag
Hann á afmæli hann Stefán
Hann á afmæli í dag

Húrra

* * *

Afmælistónleikarnir í gærkvöldi, til heiðurs Megasi sextugum voru snilldin ein. Við Stefán vorum eftir tónleikana sammála um að Tarbant og 5ta herdeildin hefðu verið með bestu atriðin. Einnig fannst mér túlkun Súkkat á Litlum sætum strákum skemmtileg. Pálmi Gunnarsson og Valgeir Guðjónsson komu mér svo einna mest á óvart en svona fyrirfram hafði ég einna síst átt von á því að þeir myndu heilla mig.

Ég var á tímabili, undir lok tónleikanna, farin að hafa smá áhyggjur af því að barnið myndi bara fara að brjótaast út úr maganum á mér en það hamaðist mikið og allskonar stingir og verkir fylgdu því. Það róaðist þó allt að tónleikunum loknum.

Ég vona bara að þetta hafi verið til merkis um það að ég gangi með lítinn Megasar aðdáenda en ekki að barnið hefi viljað flýja öll ósköpin.

Mikil bloggleti hefur hrjáð mig að undanförnu. Oft hafa mér dottið í hug allskonar hlutir til að skrifa um en ég hef bara engan veginn nennt að setjast við tölvuna til að koma þeim frá mér. Nú virðist bloggletin hinsvegar hafa vikið - allavega um stundarsakir - en alvarleg lærdómsleti gripið um sig í staðinn.

Í morgun er ég semsagt búin að finna mér allskonar hluti til dundurs aðra en að læra. Ég er þó enn sem komið er búin að geta haldið mér frá því að fara að vaska upp. Kannski ég vaski bara upp núna og athugi hvort það komi mér í lærdómsgírinn…