Við fórum á Hamborgarabúlluna núna áðan. Ég varð fyrir talsverðum vonbrigðum. Fannsti borgarinn bara alls ekki standa undir væntingum. Ég verð þó að viðurkenna að hann var betri en meðal sjoppu hamborgarinn en hamborgararnir á Vitabar eru enn í fyrsta sæti hjá mér og hafa stórt forskot á alla aðra. Svo eru frönskurnar þar líka svo góðar. Og ekki skemmir fyrir að þar má líka fá bjór.
Þannig er nú það.
Er núna ferlega sæt þar sem ég var að koma úr förðun hjá Lonni. Ég verð að viðurkenna að mér finnst frekar svekkjandi að vera bara að fara að afrita viðtal en ekki að fara eitthvað út á meðal fólks, þar sem ég er nú svona óvenjulega hugguleg. Það er greinilegt að Lonni er bara nokkuð glúrin í svona málningarvinnu.
Denni frændi minn kom í heimsókn í morgun. Það var ánægjulegt þar sem talsvert langt er síðan ég hafði síðast hitt hann. Ekki var það svo til að spilla fyrir að áður en hann fór skóf hann snjóinn af bílnum mínu og kom með því framtaki sínu í veg fyrir að ég kæmi of seint í skólann í morgun.
* * *
Í fyrradag hringdi Hrönn í mig og hóf samtalið á orðunum: Þú mátt ekki móðgast en…
Ég setti mig náttúrulega strax í ákveðnar stellingar.
Erindi Hrannar var semsagt til komið vegna þess að í gær var öskudagurinn og öllum í skólanum þar sem hún kennir var uppálagt að mæta í grímubúningi og Hrönn datt í hug hvort ég ætti ekki einhverja fína mussu sem hún gæti fengið lánaða til að vera hippi. Það var auðvitað sjálfsagt mál að lána henni mussu.
Svo þegar hún kom til að sækja mussuna spurði hún hvort ég ætti e.t.v. einnig eitthvað hippalegt pils. Það var svosem alveg til inn í skáp og Hrönn fór héðan með heilan “grímubúning”.
Síðan hef ég verið að velta því fyrir mér hvort það sé jákvætt eða neikvætt að vinir mans komi og fái lánuð föt hjá manni, föt sem maður sjálfur hefur gengið í hversdagslega og noti sem grímubúning…ekki ósvipaður hlutur hefur nefnilega gerst áður, nema þá var það Bryndís sem fór í fötin mín.
* * *
Fiskbúðingur í kvöldmatinn. Það er ár og öld síðan svoleiðis var síðast á borðum á Mánagötunni. En í þá tíð að ég og Hrönn vorum sambýlingar var fiskbúðingur MJÖG oft í matinn. Enda var það áður en við urðum fínar millistéttarkonur.
Við hjónaleysin fórum í fyrsta tíman í fæðingarfræðslu í gær. Þar lærðum við að óþarfi er fyrir Stefán að hafa soðið vatn og hvít lök með á fæðingardeildina. Allavega var hvorugt tekið fram á minnislistanum fyrir nauðsinlegan staðalbúnað í fæðingum. Svona lærir maður alltaf eitthvað nýtt.
* * *
Hver er tilgangurinn með svokölluðum Borgarjeppa sem ég heyrði auglýstan í útvarpinu áðan annar en að spæna upp malbiki, auka mengun og almennt að taka óþarflega mikið pláss á götum og bílastæðum borgarinnar? Ég bara næ því ekki hvað jeppi og borgir geta átt sameiginlegt og finnst þetta með því alheimskulegasta sem ég hef heyrt. Og hananú.
Ég hafði ekki áttað mig á því að enn væru til steinaldarmenn en samkvæmt þessari frétt virðist svo vera.
Jabadabadú
Fór og hitti MA-leiðbeinandann minn áðan. Það var bara gaman því henni finnst ég vera á réttri leið og var bara almennt jákvæð. Ætla að njóta þess það sem eftir er dagsins að geta fundist ég ótrúlega snjöll og dugleg manneskja.