Hin hliðin

Í dag er ég búin að koma ýmsu í verk sem ég er búin að humma fram af mér allt of lengi. Ég er því bara frekar ánægð með sjálfa mig. Það er gaman.

Í raun ætti ég núna að drífa mig út í Háskólafjölritun og kaupa mér eitt greinahefti en er nokkuð viss um að það yrði fýluferð, þar sem það er búið að segja síðan í síðustu viku að það sé alveg að verða tilbúið. Held því að ég dragi það bara fram yfir helgi.

* * *

Gerði heiðarlega tilraun áðan til að skoða nokkrar barnalandssíður. Veit ekki alveg af hverju. Ætli mér hafi ekki bara fundist að vegna þess að ég er með sístækkandi bumbu þá gæti ég kannski haft gaman af því að skoða annarramanna grísi. Það var ekki aldeilis. Þó voru þetta allt börn fólks sem ég þekki eitthvað persónulega. Er þetta gott eða slæmt?

Jamm, jamm, svo er nú það.

Við horfðum á handbolta meðan við snæddum kvöldmat.
Fljótlega sagði Stefán“Villt þú ekki bara fara í bað”.
Það er greinilega ekki gaman að horfa á handbolta með mér.

…nema það sé kannski vond lykt af mér…?

Útvarp Ótti er skemmtilegt útvarp!

Þorrablótið í gær var þrælfínt þótt ég hafi verið frekar í rólegri kantinum. Fékk aftur dýrindis horssaket. Ýmiskonar skemmtiatriði voru að borðhaldi loknu. Þar fannst mér standa uppúr Árni Björnsson sem flutti skemmtilegt erindi um Þorra og Þorrablót. Ekki vissi ég að hann væri svona góður söngmaður. Fórum heim þegar farið var að nálgast miðnætti enda ég orðin þreytt og skemmtiatriðin virtust vera búin.

Er núna að baka kryddbrauð. Vill einhver koma í kaffi?

Í kvöld ætla ég á Þorrablót Ásatrúarfélagsins. Þar verður boðið upp á allskonar góðan Þorramat. Í fyrra var einnig boðið upp á indælis hrossakjöt. Ég mun sko ekki slá hendinni á móti því ef það verður aftur á boðstólum.

* * *

Síðasti þátturinn af The Office var pínlegur framanaf. Það munaði minnstu að ég gæfist upp á að horfa þar sem ég engdist um í stofusófanum. Harkaði þó af mér til þess eins að komast að því að allt virtist ætla að fara vel að lokum. Það er því nokkuð ljóst að þetta var síðasti þátturinn. Það bara er ekki hægt að bakka aftur í pínlega farið eftir svona endi!

* * *

Útvarpsgeðveikin GB er nú sem betur fer búin. Það verður kannski til þess að ég muni sjá og umgangast Stefán eitthvað pínulítið núna á næstu dögum. Það gæti orðið skemmtileg tilbreyting.

Á leið minni frá Odda út í Bóksölu stúdenta ákvað ég að koma við hjá Guðrúnu Bóasdóttur á nemendaskránni. Það var hin besta ákvörðun þar sem Systa bauð mér umsvifalaust í hádegisverð með sér og gaf mér svo kaffi á eftir. Takk Systa!!

Svo fór ég og eyddi smá peningum í Bóksölunni. Þó ekki miklum, þar sem ég ákvað að kaupa bara eina námsbók af fjórum. Hver nennir hvort eð er að vera að lesa allar þessar bækur?!

* * *

MS-félagið tók í dag í notkun nýtt spjallsvæði. Ég vona svo sannarlega að umræðurnar þar eigi eftir að verða líflegri en á gamla svæðinu.

Heimasíða félagsins hefur einnig verið í stöðugri framför og er bara ekki svo galin. Ég er allavega búin að fara mun oftar inn á hana síðustu vikur í leit að upplýsingum en ég gerði í mörg ár samanlagt þar á undan. Húrra fyrir Svavari!!

Rakst á þessa frétt á mbl.is:

Tveir bátar rákust saman út af Óshlíð

Tveir smábátar sem voru að fiskveiðum rákust saman á Ísafjarðardjúpi út af Óshlíð. Lögreglan á Ísafirði segir, að einhverjar skemmdir muni hafa hlotist af þessum árekstri, en skipverja sakaði ekki. Málið er í rannsókn hjá lögreglu.

Finnst alltaf svo merkilegt að svona atvik geti átt sér stað. Það er greinilega barátta um sem besta staðsetningu á miðunum.

Úff. Annaðhvort ég dottin úr æfingu við að horfa á The Office eða þátturinn í gær sérlega pínlegur. David Brent í Austin Powers stellingum var eiginlega meira en mitt litla hjarta þoldi. Hlakka samt mikið til næsta fimmtudags.

Á morgun ætla ég á dansleik á Broadway en það er alveg fastur liður einu sinni á ári þegar Norðfirðingar mæta í borgina með rokkveisluna sína. Veit samt ekki alveg hvernig mér líst á þemað í ár en skítt með það.

Einhverjir ætla að hittast á Mánagötunni í kring um klukkan nítján annað kvöld og hita upp fyrir kvöldið. Svo ef einhverja vantar félagsskap fyrir ballið eru þeir velkomnir þangað.

* * *

Mig langar í ís. Er að hugsa um að heimsækja Júlla í Drauminn og athuga hvort hann eigi ekki Hnetutopp.