Hin hliðin

Er það réttlætanlegt að fyllast stolti yfir manninum sínum þegar einhver kona úti í bæ úthúðar honum í grein í Mogganum? Ég er bara ekki fjarri því að það sé hið besta mál og tel að eðlilegri viðbrögð en stolt séu varla til við svona skrifum. Ef einhver er í vafa er um að gera að lesa þessa stórfyndnu blaðagrein.

* * *

Ég er ekki enn búin að gera skattskýrsluna mína. Það er náttúrulega hrilklegur aumingjaskapur því ég hef lúmskan grun um að það taki u.þ.b. 5 mínútur. Nú einset ég mér að gera það þegar ég kem heim á eftir.

* * *

Þórey hringdi í mig frá DK í dag. Hún er komin með nýtt barn í bumbuna. Það voru gleðilegar fréttir. Hún er að koma heim til Íslands í smá skrepp. Vonadi getum við náð að hittast aðeins en eins og venjulega ætlar hún ekki að eyða neinum tíma í höfuðborginni heldur fara beint heim í sveitasæluna.

Laugardaginn 20. mars verður ár liðið frá því að árásarstríð
Bandaríkjamanna, Breta og bandalagsríkja þeirra hófst í Írak. Að því
tilefni efna friðarsinnar um víða veröld til aðgerða. Hér á landi verða
slíkar aðgerðir í Reykjavík og á Akureyri.

Í Reykjavík munu Samtök herstöðvaandstæðinga andæfa stríðsrekstrinum,
stuðningi íslenskra stjórnvalda og veru bandaríska hersins á Íslandi.
Aðgerðirnar verða fyrir framan stjórnarráðið og hefjast kl. 12:00.

Með stuðningi sínum við stríðið í Írak hugðist íslenska ríkisstjórnin
öðlast virðingu og viðurkenningu. Virðingin hefur látið á sér standa,
en kannski hlotnast þeim viðurkenningar á laugardaginn kemur. Þar munu
íslenskir friðarsinnar veita verðlaun í mörgum flokkum. Hver hlýtur
verðlaun fyrir svæsnustu lygina í aðdraganda stríðsins? Hver er
slyngasti stríðsæsingamaðurinn? Og hverjir reyndust staðföstustu
bandamenn Bush-stjórnarinnar?

Erlendir jafnt sem innlendir stjórnmálamenn koma til greina við
tilnefningar verðlaunanna. Enn hafa þó engir þjóðarleiðtogar staðfest
komu sína.

* * *

En nú er ég farin í próf. Mun efalítið rúlla því upp…

Í dag er dagur hins mikla stress.

* * *

Hversu óhugnarlegt er að vita að ég var sofandi á mínu græna eyra örfáa sentímetra í burtu á meðan þetta var allt að gerast!?!

Skrítið, á tímabili var ég að drukna í ruslpósti. Á honum hefur þó sem betur fer borið lítið upp á síðkastið. Hinsvegar er það að aukast að ég fái bréf sem hreinlega öskra á mig að þar sé vírus á ferð. En þar sem ég er ofurklók þá…

* * *

Tek undir með Hafdísi að þessi heilsusamlegi lifnaðarháttur á Bryndísi vekur með manni ýmsar spurningar. Ég efa það hinsvegar ekki að hún sé orðin kaffibrún stúlkan. Þannig verð ég einmitt líka eftir stutta viðdvöl í sól…

Jamm

Liðin helgi var alveg unaðsleg. Ég gerði hreinlega ekkert af viti. Opnaði enga skólabók en las hinsvegar Kalla og Kobba mér til ánægju og yndisauka. Hjartakrossgáta og smá Folda hefði líklega verið það eina sem hefði getað bætt helgina eitthvað.

Eins og mig grunaði fékk ég ekkert Sherry (
bara lítið gat á hendina.

Systir mín bauð mér með sér á leiksýningu Borgarholtsskóla “Ýkt kominn yfir þig” í gærkvöldi. Ég skemmti mér afbragðs vel. Síðan hef ég mikið verið að hugsa um það hversu sérstakur þjóðflokkur menntaskólanemar eru…

* * *

John vill víst fara að telja í mér hvítublóðkornin. Ætli ég gangi ekki í það í fyrramálið að láta tappa af mér blóði. John sagðist gera ráð fyrir að mér yrði boðið Sherry meðan á aftöppuninni stæði - mikið vildi ég að hann væri meinatæknir jafnhliða því að vera taugalæknir. Annars var hann bara sáttur við útlistingar mínar á MS í Mogganum. Þar með held ég að ég geti bara verið verulega sátt við þetta viðtal.

Ég held að ég geti sagt að málþingið hjá MS-félaginu um helgina hafi tekist með afbrigðum vel. Mætingin var góð - fullt af andlitum sem ég hafði aldrei sé áður og erindin voru fróðleg og skemmtileg.

Garðar Sverrisson fór t.d. alveg á kostum í umfjöllun um réttindabaráttu öryrkja í gegnum árin í erindi sem hann kallaði Barátta okkar og viðhorf. Það skemmdi heldur ekki fyrir hversu pólitískur hann leyfði sér að vera. Ekki það að það sé erfitt að vera harðpólitískur þegar að kjara- og réttindamálum öryrkju kemur. Það krefst hinsvegar ákveðins kjarks að ganga jafn hreint vil verks í gagnrýni á ráðandi öfl og jafnvel hugmyndir öryrkja sjálfra og hann gerði. Svoleiðis löguðu þurfum við mun meira af.

Útlendingarnir sem hingað komu voru bara hressir og skemmtilegir. Sáu þó Bláa Lónið í einhverjum óþarfa hillingum. Fór sjálf tvær ferðir þangað. Það er óverkill á einni helgi. Ein ferð á tveggja ára fresti er að mínu mati hæfilegur skamtur.

Fyrrihlutinn á geðbilaðri vinnuviku er nú búinn og aðeins er eftir að halda eitt málþing og leika við böns af útlendingum í síðarihlutanum.

Ojá. Það er fjör.

Fundir og málþing hjá MS-félaginu á laugardag. Í tengslum við það verður brunað með útlendinga um suðurland og dottið í það í hinni margfrægu 101 Rvk.

Ekki seinna vænna að finna einhverjar góðar sögur sem er hægt að ljúa í hrekklausa skandínava.

Í kvöld skal hinsvegar legið með tærnar upp í loft og helst ekki hugsað um neitt sem á einhvern hátt getur talist praktískt.