Hin hliðin

Bílinn minn bilað nánast um leið og Stefáns bíll fór í gang svo ég er meira og minna strætóandi þessa dagana. Sveinn leit við í gær og kíkti aðeins á bílinn. Hann herti eina skrúfu en úrskurðaði svo að líklegast væri rafgeymirinn dauður en það þyrftu þó menn með þar til gerð mælitæki að skera úr um.

Framtíðarplönin eru því að koma bílnum undir læknishendur.

Þangað til hef ég hugsað mér að vera á strætó nema þegar ég get fengið Stefán til að skutla mér.

Það er ömurlegt að vera með hálsbólgu og kvef!

En það er þó varla ömurlegra en þegar Halldór Ásgrímsson talar um að við nú höfum ekki verið beinir þátttakendur í Íraksstríðinu heldur bara stutt það.

Úff, það er svo hrikalegt að koma þreyttari undan helgi en maður fer inn í hana. Þannig er einmitt ástandið á mér í dag. Ætla að reyna að bjarga því sem bjargað verður með því að fara að sofa fyrir allar aldir í kvöld.

Blótið var eins og vænta mátti fínt. Allskonar merkilegir tónlistargjörningar sem virðast vera að verða nokkuð fastir liðir - enda er Alsherjargoðinn snillingur á þessu sviði.

Atmælisboð Ernu (sem heldur því fram að hún sé ekki aldeilis hætt að blogga (?!)) var heldur ekki af verri endanum, þó ég hafi kannski teymt Stefán heim óþarflega snemma. Íbúðin hennar fannst mér t.d. alveg hrikalega flott.

En núna er semsagt bara að þrauka vakandi í nokkra klukkutíma enn…

Mér datt allt í einu í hug að athuga hvort gamla bloggið mitt væri ekki enn á sínum stað. Og sko til - það er þarna enn. Rosalega hafði ég miklar skoðanir á hlutunum í vor. Ég sé það núna að ég hef verið hálf heiladauð í margar vikur.

* * *

Jón!! Afhverju kemur þú ekki bara á blótið með okkur Óla? Og Jóhanna líka? Þetta blót er opið öllum og allir eru velkomnir.

Í morgun var loks tími í námskeiðinu Menningarsvæði. En ég gerði einmitt tilraun til þess að mæta í tíma í því fyrir tveimur vikum.

Ó hvað það var erfitt að vakna í morgun.

Annars hef ég víst alveg gleymt að segja frá því að afmælið hjá Þóreyju Péturs var stórskemmtilegt. Þar var auðvitað allt fullt af Norðfirðingum. Meðal annarra var þar sá höfuðsnillingur, Óli Egils. Við Óli sammæltumst um að fara á Þorrablót Ásatrúarfélagsins næstkomandi föstudag. Því miður getur Stefán aðeins mætt seint og illa þar sem hann þarf að níðast á menntskælingum fyrrihluta kvölds.

Held að þetta verði þrusu blót. Allavega eru rosa tónlistargjörningar boðaðir.

Við hjónaleysin fórum loks á Hringadróttinssögu í gær. Það var svosem alveg ágætt en ég verð að viðurkenna að ég er enginn sérstakur aðdáandi. Mér hefur t.d. aldrei dottið í hug að lesa bækurnar. Var pínd til að lesa Hobbit í menntó og það var alveg meira en nóg fyrir mig.

Það pirraði mig þó talsvert í gær þegar konan drap skrímslið sem enginn maður, en þó öllu heldur KARLmaður í þessu tilfelli, átti að geta drepið. Ég var farin að hlakka svo til þess þegar litlu hobbitarnir fengju uppreisn æru og yrðu viðurkenndir sem stríðsmenn eftir að hafa fellt það.

Vaknaði órtúlega fersk eftir letikvöldið í gær. Mætti á laugardagsfund hjá VG þar sem heilbrigðismálin voru rædd og er bara frekar ánægð með mig og finnst ég bara frekar meðvitaður og góður þjóðfélagsþegn í dag.

Er að reyna að sannfæra sambýlinginn um að í nú væri gott að fara í sund og leggjast í bleyti í heitan pott og búa sig þannig vel undir afmælisátök kvöldsins. Sambýlingurinn virðist þó telja tíma sínum betur varið við að blogga um GB undir því yfirskini að hann sé að vinna.

Ég sé því fram á að í stað þess leggjast í bleyti verði ég að nota tímann til að koma loks einhverju skipulagi á líf mitt með því að færa það allt saman inn í þá glænýju dagbók fyrir árið 2004 sem ég var að versla mér.

Það er þó að segja, ef enginn glæpamaður hefur tekið stæðið mitt og ég verði að eyða því sem eftir er af deginum við að moka nýtt stæði.

Var þetta ómarkviss færsla? Það er ótrúlegt hversu mörg ef einkenna líf manns.

Þvílík óhljóð þegar Volvóinn fór í gang í morgun! Annaðhvort var ég búin að gleyma hávaðanum eða bílinn er enn að ná sér.

* * *

Ég get svo sannarlega vottað það að það er skítakuldi. Ég lét systur mína plata mig með sér í sund. Endaði með að synda heila 700 metra enda eingin leið að stoppa þegar ofaní laugina var komið. Það að stoppa eitthvað að ráði hefði verið ávísun á kvef eða eitthvað þaðan af verra. En það sem ekki drepur mann herðir mann og ég er aldeilis harðari núna seinnipartinn en ég var í morgum.

* * *

Annaðkvöld er stefnan tekin á þrítugsafmæli Þóreyja Péturs. Hún er búin að vera að skipuleggja þessa veislu í marga mánuðu svo þetta hlýtur að verða alveg magnað. Ætla rétt að vona að henni hafi tekist að losa sig við pestina sem ég frétti að hún hefði náð sér í um daginn.

Þar sem ákveðinn bíll er bilaður hefur eigandi þess sama bíls tekið minn bíl traustataki. Það hefur reyndar þann kost að ég hef ágætis afsökun fyrir því að hanga bara heima í notalegheitum og eyða tíma mínum í að lesa bækur.

Lét þó krílið hana systur mína palta mig í Kringluna. Nú hef ég farið tvisvar með stuttu millibili þangað og er því í janúar farin að slaga hátt upp í meðalárið í Kringluheimsóknum.

Mér gekk þó illa að eyða peningum og keypti mér bara eina sokka í barnastærð á útsölu í Sokkabúðinni. Góð kaup það!!

Pabbi minn á afmæli í dag. Ég óska honum til hamingju. Ekki það að það séu nokkrar líkur til þess að hann lesi þett nokkurntíma.