Sakna myrkursins!
Það er ekki laust við að ég hafi fengið snert af heimþrá þegar ég las bloggið hennar Bryndísar. Ég sakna samt eiginlega myrkursins mest. Það er bara svo frábært að horfa út á flóann og sjá bara ekki neitt nema óskírar útlínur af fjöllum. Það er best að hætta samt áður en nostalgían nær alveg tökum á mér.
Drengurinn hefur fengið nafn!
Ég var búin að lofa að blogga um það hvað strákurinn þeirra Jóhönnu og Valdimars yrði skírður. Núna hafa sem sagt borist af því fregnir. Sá stutti heitir Helgi Gnýr!
Jamm
Er gas í loftræstikerfinu?
Ég er komin á þá skoðun að loftræstikerfi Þjóðarbókhlöðunnar spúi eiturgufum. Vonandi er dagurinn í dag sá síðasti í töluverðan tíma sem ég þarf að hanga hér.
Verst er að þá tekur við að vinna á skítnum og sóðaskapnum heima. Ef ekkert verður gert í málunum er hætt við að heilbrygðiseftirlitið fari að blanda sér í málið.
* * *
Annað kvöld förum við skötuhjúin á jólablót. Þar verður Gullinbursti snæddur og aldrei að vita nema hrossakjöt hafi náð að smygla sér inn á matseðilinn. Ég held samt að þesst sé ekki rétti árstíminn fyrir það. Guðaveigar verða einnig þjóraðar. Almenn þreyta og uppsafnaður námsleiði hafa þó þau áhrif að líklega er vissara að fara frekar varlega í þær sakir.
Ó hvað ég hlakka til að komast í jólafrí!
Miðalda eip
Ef einhver hefði einhverntíma sagt við mig að ég ætti eftir að sitja niðri á þjóðdeild og rýna í Jónsbók og Járnsíðu hefði ég hlegið þar til ég hefði fengið hiksta. En engu að síður hef ég verið að dunda mér við þetta síðustu tvo tímanna. Ég skil eiginlega ekkert í því sem þarna stendur. Það hefur samt gengið töluvert betur síðasta hálftímann en fyrsta hálftímann. Ég er samt hrædd um að niðurstöður mínar verði hálf skrautlegar.
En eftir þetta alltsaman get ég þó allavega sagt að ég er dauðfegin að vera ekki eiginkona á miðöldum. Það hefði alltaf endað með ósköpum og ég hefði ekki einu sinni getað skilið nema með heilmiklu veseni. Það er samt ekki alveg víst að ég hefði getað gift mig þar sem ég hefði ekki átt nógu mikinn peníng. Þá hefði ég kannski orðið frilla í staðinn. Ég held samt að pabbi hefði reynt að nurla saman aur til að gifta mig. Það er bara verst að smekkur okkar pabba á fólki er ekki alveg sá sami. Ég er samt viss um að ég hefði getað talað hann inná að leyfa mér að giftast Stefáni.
* * *
Bryndís! Salný og Alli eru með jólakortið til þín. Ég þorði ekki annað en að láta þau hafa það, svona ef við sjáumst ekkert fyrir jólin.
Það eru ill öfl að verki í Þjóðarbókhlöðunni…
…þau draga úr mér allan mátt og gera mig syfjaða.
Hætti við kynlífið og ákvað að taka skilnaði framyfir
Æi já. Ég komst að þeirri niðurstöðu að það væri mun aðgengilegra að skrifa um hjónaskilnaði en kynlíf. Það er líka varla hægt að hugsa sér dapurlegra hlutskipti en að sitja á bókhlöðunni og velta sér upp úr kynlífi. Get ímyndað mér mun skemmtilegri aðstæður til þess.
* * *
Jólasendingin frá pabba komst klakklaust til skila (svo er allavega að sjá…vona bara að jólin endi ekki með iðrakveisu). Flytjanda tókst að klúðra merkingum á pakkanum svo ég var farin að hafa verulegar áhyggjur af því að fá frosna osta og frosið hangikjöt. En þannig vildi til að öðlingurinn hann faðir minn ákvað að senda mér jólaglaðninginn sem hann fékk frá SVN. Ég hef reyndar smá áhyggjur af því að vegna deilna pabba við fyrirtækið sé búið að setja arsinik í skammtinn sem ég fékk (þannig að það er jafnvel ástæða til að hafa áhyggjur af fleiru en iðrakveisum)
* * *
Ákveðin atriði hér valda mér smá áhyggjum. Er þetta kannski ástæðan fyrir því að hann er alltaf farinn í vinnuna þegar ég vakna?
Allur þessi lestur mun enda með ósköpum
Ég er hrædd um að prófalestur sé að koma mér í ógöngur. Mér er farið að finnast að ég sé komin með ágætis heildarmynd af námsefninu en á sama tíma er eins og rödd í höfðinu á mér hvísli að þessi hugmynd sé sprottin upp vegna lestrarleiða. Hvort er þá betra að taka pásu eða halda lestrinum ótrauð áfram? …humh…eftir smá umhugsum líst mér betur á pásuna.
Ég fór til Dr. Gunnars áðan og sótti mér heimaprófið sem ég verð að taka næstu vikuna (ég ætla samt ekki að byrja að hugsa um það af alvöru fyrr en eftir kl. 12 á morgun þegar ég er búin í hinu prófinu). Ritgerðarefnið sem mér finnst hljóma skemmtilegast er trikkí efnið sem bara þeir sem eru og vitlausir velja. Þannig að það er eins gott að sleppa því. Kannski sé skrifi bara um rétt fólks til að stunda kynlíf í gegnum Íslandssöguna. Ég hlýt að fara að verða hinn mesti kynlífsspekúlant þar sem ég er alltaf að lesa um kynlíf og klám. Einhvernvegni finnst mér öll mín háskólaár hafa meira eða minna snúist um kynlíf. Þ.e. fræðilegt kynlíf. Það er kannski bara ágætt þar sem Playboy og Hustler hafa aldrei höfðað til mín.
Það var samt gaman þegar við fórum inn í Fannardal og grófum upp klámblöðin! Man einhver eftir því? Kannski þessi ferð hafi sett mun meira mark á líf mitt en ég hafði áður gert mér grein fyrir!?
* * *
Er Faldafeykir ekki eldra nafn á Hurðaskelli?
Oi!
Það virðist bara allt of margt hafa breyst meðan ég var á spítalanum. Fólk er farið að koma sér upp allskonar uppáhaldshlutum og listum og ég veit bara ekki hvað. Ef eitthvað nær að skora hátt á vinsældarlista hjá mér þessa dagana eru það Imovan svefntöflur en með þeirra hjálp er hægt að sofa smá. Sem verður að teljast stór kostur þegar maður er ofvirkur og má ekki gera neitt.
Svo lenti ég í lífshættu áðan. Ég þurfti að fara upp í Mosfellsbæ og var næstum druknuð. Ég ætla að stefna að því að fara ekki fleiri ferðir út á land fyrr en veðrinu slotar. Tel mig eiginlega best komna undir sæng þar sem fáar hættur steðja að mér.