Lækjargötuhótelið
Það verður landhreinsun að losna við Glitnis-húsið við Lækjargötu, eins og boðað hefur verið. Var þetta ekki Iðnaðarbankaútibú upphaflega? Hótelið sem þarna á að rísa virðist ekki ósnoturt.
Mig minnir að fyrst hafi verið farið að ræða um niðurrifið fyrir mörgum árum, þegar Glitnir - þá Íslandsbanki - ætlaði að reisa höfuðstöðvar á reitnum. Síðar varð Kirkjusandur fyrir valinu og áætlanirnar lagðar á hliðina.
Meðan Íslandsbanki leit ennþá á Lækjargötudeildina sem eina af höfuðstöðvum starfemi sinnar, voru bílastæðamálin stór hausverkur. Þá kom upp sú hugmynd að bankinn reisti bílakjallara undir flötinni fyrir framan Menntaskólann í Reykjavík. Lóðin tilheyrir víst skólanum, en allir vita að þar verður aldrei byggt… ofanjarðar. Öðru máli gegnir um bílakjallara sem koma mætti fyrir undir grasfötinni.
Þegar ég sat í skólanefnd MR sem nemendafulltrúi veturinn 1994-95, var Guðni heitinn Guðmundsson mjög áfram um að leyfa bankanum að reisa mannvirkið, gegn því að fá ákveðinn hluta bílastæðanna fyrir skólann sem og möguleika á geymslurými og öðru slíku sem gagnast gæti við reksturinn.
Síðar - þegar deilt var um bílastæðakjallara sem bílastæðasjóður vildi reisa undir Tjörninni, reyndi ég að rifja upp þessa gömlu hugmynd. Hún fékkst aðeins rædd í fjölmiðlum og fékk góðar undirtektir. Þegar Tjarnarkjallarinn var sleginn af missti Bílastæðasjóður hins vegar áhugann á svæðinu og MR-flötin var aldrei könnuð fyrir alvöru.
Nú er spurning hvort hótelframkvæmdin kallar á róttækar lausnir í bílastæðamálum? Er e.t.v. tímabært að dusta rykið af gömlu MR-hugmyndunum? Þarna mætti ná djúpum bílakjallara með mun auðveldari hætti en víðast hvar annars staðar í miðbænum. Ég þykist sömuleiðis vita að rektor væri samningalipur ef skólanum væru tryggð nokkur stæði til að létta aðeins á erfiðum bílastæðavandamálum MR-inga.
July 21st, 2008 at 23:40
Hvað verður þá um glerlistaverkið eftir Sigríði Ásgeirsdóttur?
July 22nd, 2008 at 01:55
Iðnaðarbankinn var stofnaður árið 1953 og var upphaflega til húsa framan við Nýja bíó í Lækargötu, en bankinn festi kaup á lóðinni Lækjargötu 10b í lok fyrsta starfsárs síns til þess að reisa sér þetta stórhýsi. Það var þó ekki ráðist í smíðina fyrr en um 1959, en tafirnar stöfuðu m.a. af vinnslu miðbæjarskipulags, sem gekk mjög brösuglega. Bankinn flutti inn 1962.
Fimm árum síðar leystist til allrar ólukku bílastæðavandi bankans, en þá brunnu þrjú hús á horninu við Vonarstræti til kaldra kola, þar á meðal hús séra Bjarna heitins Jónssonar vígslubiskups, Lækjargata 12b. Það var mikil eftirsjá að því. Iðnaðarbankahúsið skemmdist mikið, en ekki nóg.
Mikið er ég sammála þér um að þessi hlunkur mætti vera löngu fokinn eða rokinn. En þetta var „nýi tíminn“ á þessum árum, sem einnig endurspeglast í Morgunblaðshúsinu í Aðalstræti, húsi Almennra trygginga í Pósthússtræti, sitt hvoru megin Ausurstrætis og víðar. Þetta þótti að vonum mjög internasjónal.
Ég el með mér þá von að húsið í Pósthússtræti verði rifið og upphaflegri teikningu Guðjóns Samúelssonar fylgt. Það mætti líka taka til í Austurstræti. Ég er ekki jafnviss um Morgunblaðskastalans, bæði af sentímental ástæðum, en einnig vegna þess að ég vil ekki að borgin verði alveg hreinsuð af þessum byggingarstíl, þó okkur þyki hann ljótur. Á sínum tíma voru ekki allir sáttir við norsku húsin, mörgum þótti fúnkíshúsin afspyrnuljót og þar fram eftir götum. Og síðan er auðvitað nauðsynlegt að skilja eitt og eitt minnismerki um smekkleysi eftir, öðrum til viðvörunar.
Á hinn bóginn er vert að vara við of mikilli bjartsýni, þó teikningarnar af fyrirhuguðu hóteli gefi góð fyrirheit. Þannig var því einnig farið um nýbyggingarnar í Aðalstræti, en þegar búið var að byggja þær kom á daginn að allan sjarma vantaði í þessar plastlegu eftirlíkingar af óljósum hugmyndum um fyrri tíma. Enda kunnu þessir meistarar ekki einu sinni að stafsetja Fjalarköttinn!
July 22nd, 2008 at 07:50
Mér finnst reyndar Iðnaðarbankahúsið margfalt flottara en Morgunblaðshöllin, hvað þá heldur en hús Almennra trygginga í Pósthússtræti eða Austurstræti 17.
Ég man eftir eldsvoðanum 1967 og ég gekk þar framhjá með afa mínum daginn eftir.
Fjalarköttinn? Til eru 27 dæmi í ritmálsskrá Orðabókar Háskólans um fjalakött en ekkert um fjalarkött. Ég gæti bætt einu 19. aldar dæmi við úr Þjóðsögum Jóns Árnasonar.
July 22nd, 2008 at 22:32
Iðnaðarbankahúsið er nú bara ágætishús finnst mér og hefur alltaf þótt. Skemmtilegur minnisvarði um ákveðinn tíma í byggingarlist.
Hvað varðar bílastæði í MR-brekkunni þá var sú umræða mjög lifandi innan borgarkerfisins í nokkur ár í kringum 2000.
Sjálfur hef ég ekki samúð með bílastæðavanda MR-inga. Ef menn vilja halda í skóla í gömlu timburhúsi í þéttsetnum miðbæ Reykjavíkur þá verða þeir vesgú bara að bíta í það súra epli að fá ekki bílastæði undir risastóra flotann sinn.
August 1st, 2008 at 18:39
Fyrst það eru að minnsta kosti 2 vinstri grænir hér að ræða bílastæðamál í miðborginni, má ég til með að leggja nokkur orð í belg. Vissulega verða flestir pirraðir þegar þeir finna ekki bílastæði í miðborginni. Tilfinning fólks virðist vera sú að það séu allt of fá bílastæði á þessu svæði.
Staðreyndin er hinsvegar sú að meðaltal bílastæða í miðborgum V-Evrópu eru 270 stæði á hver 1000 störf. Í Bandaríkjunum eru þetta u.þ.b. 500 stæði á 1000 störf. Í miðborg Reykjavíkur eru hinsvegar um 800 stæði á hver 1000 störf, og eru þá ekki talin með þau 1800 stæði sem opna munu í kjallaranum við Tónlistarhúsið á næsta ári. Þar að auki hefur framkvæmdastjóri bílastæðasjóðs verið að sýna fram á það í fjölmiðlum að bílastæði í Reykjavík eru ódýrari en í öllum þeim borgum sem hún hefur getað tínt til, og sektirnar líka. Og það þótt Reykjavík sé á flestum öðrum sviðum meðal dýrustu borga heims.
Mér fannst rétt að láta þetta fylgja með í þessum umræðum þar sem mér fannst Stefán allt að því vera að leggja til fjölgun bílastæða í miðborginni, sem mér þætti saga til næsta bæjar.
Annars þakka ég Stefáni skemmtilega pistla, og leyfi mér að panta svar við einu frá honum: Af hverju ætti maður frekar að halda með Hearts en Hibs (fyrir utan veru Eggerts í Hearts)? Eru einhver landfræðileg svæði í Edinborg sem flokkast í Hibs eða Hearts hluta? Er munur (stétta, trúar …) á stuðningsmönnum liðanna?
August 1st, 2008 at 21:45
Sæll Gísli
Ég er nú svo sem ekkert að heimta fleiri stæði í miðborgina - en bendi á kost sem væri skynsamlegri en t.d. að grafa sig undir Tjörnina.
En varðandi Hibs og Hearts…
Þegar ég bjó í Edinborg hélt ég með Hearts, það átti sér langar og flóknar skýringar. Að sumu leyti hefði þó verið rökréttara fyrir mig að halda með Hibs.
Hearts hefur nefnilega sögulega séð verið lið mótmælendanna og þeirra betur stæðu. Hibs voru kaþólikkarnir og oft efnaminna fólkið. Í dag er þessi trúarskipting mjög á undanhaldi en í staðinn hefur komið hverfaskipting. Hibs sækir stuðning sinn til norður og austuhlutans í borginni. Fólkið í Leith (Trainspotting) halda með Hibs. Heimavöllur þeirra er í röltfæri við Edinborgarháskóla. Hearts fær frekar stuðning frá vestur- og suðurhlutum borgarinnar og þangað fer maður ekki nema í strætó frá miðbænum.
Hibsararnir eru líka skemmtilegri stuðningsmenn.
En gamli enskukennarinn minn Ottó Jónsson lék með Hearts - svo því fór sem fór.