Þjónustugjöld
Ég stend í stappi við Orkuveituna. Ekki sem starfsmaður - heldur sem viðskiptavinur. Ágreiningsefnið er þjónustugjöld.
Þannig er mál með vexti að á Mánagötunni eru þrjár íbúðir: kjallari, fyrsta og önnur hæð. Sú hefð hefur skapast í húsinu að framkvæmdakostnaði og kostnaði við kyndingu er skipt í hlutföllunum 40-40-20. Það endurspeglar nokkurn veginn stærð íbúða og hlutföllin eru þægileg. Engum dettur í hug að láta skipta upp heitavatnsmælinum, enda er það mjög órökrétt í svona húsi þar sem íbúðirnar hafa hitann hver af annarri.
Við erum ekki með húsfélag og sérstaka kennitölu fyrir það. Auðvitað gætum við stofnað það, en mér er þó til efs að fólk í tvíbýli eða þríbýli geri það almennt.
Fyrir vikið er heitavatnsreikningurinn gefinn út á eina íbúð í húsinu - okkar. Við höfum svo það hlutverk að rukka nágrannana mánaðarlega, sem er hvimleitt. Auk þess gerir þessi tilhögun okkur það erfiðara að taka upp aðra greiðslumáta, s.s. boðgreiðslur eða netgreiðslur með tilheyrandi afsláttarmöguleikum.
Í spjalli við vinnufélaga, var mér bent á að Orkuveitan byði upp á skiptingu reikninga. Þannig gætum við skilað inn blaði með undirskriftum allra íbúa og fyrirtækið eftirleiðis sent þrjá reikninga - með þessari ágætu skiptingu 40-40-20. Auðvitað gerðum við ráð fyrir að þjónustugjöldin yrðu eitthvað hærri eða að eitthvert stofngjald fylgdi þessari þjónustu. Eðli málsins samkvæmt kostar það Orkuveituna meiri vinnu að útbúa þrjá reikninga en einn.
En okkur brá í brún þegar farið var að kanna kostnaðinn við innheimtuna. Orkuveitan innheimtir nefnilega viðbótargjald upp á 1.800 kr. +vsk. fyrir hverja íbúð - á hverju ári. Samanlagður kostnaður íbúðanna þriggja í húsinu yrði því um 6.000 krónur á ári!
Það er fáránlega mikið.
Ég hélt að orkufyrirtæki væru í sömu stöðu og opinberir aðilar, að þjónustugjöld þeirra eigi að endurspegla raunverulegan kostnað - nema sérstakar lagaheimildir væru fyrir öðru. Ég á mjög bágt með að sjá hvernig Orkuveitan getur fært fyrir því rök að viðbótarkostnaðurinn vegna reikningaskiptingarinanr geti farið nálægt þessari upphæð, einkum þar sem hér er ekki um stofnupphæð að ræða heldur föst tala á hverju ári.
Ég átti ágætt samtal við samstarfskonu vegna þessa, en fékk svo sem ekki mörg svör önnur en þau að svona væri gjaldskráin. Hún gat þó bent á að með þessari skiptingu væri ekki um það að ræða að útbúinn væri einn reikningur og honum svo skipt upp í þrennt - heldur væru eiginlega stofnaðar þrjár veitur inni í tölvukerfi Orkuveitunnar sem aftur deildu einum mæli. Þannig væri þetta í raun ekki þannig að mælaaflesarinn kæmi á Mánagötuna og læsi af einum mæli, skrifaði niður tölu og kostnaðinum væri skipt eftir fyrirframákveðinni formúlu - heldur kæmi mælaaflesarinn á svæðið og læsi í raun þrisvar sinnum af sama mælinum í heimsókninni… Eða eitthvað svoleiðis…
Annað sem starfsmaðurinn gat bent á Orkuveitunni til varnar, var að í raun bæri fyrirtækinu engin skylda til að bjóða upp á þessa þjónustu. Þannig gæti Orkuveitan í krafist þess að einn reikningur væri látinn nægja.
Ég er enn ekki sannfærður. Ætli maður hefði ekki sætt sig við þjónustugjald sem væri svona þriðjungur eða fjórðungur af þessari upphæð. 2.000 kall pr. íbúð á ári er hins vegar ekki ásættanlegt.
Þá er bara tvennt í stöðunni:
i) hverfa aftur til fyrra horfs
eða
ii) senda Umboðsmanni Alþingis og Neytendasamtökunum fyrirspurn
Hvað ráðleggja lesendur?
July 18th, 2008 at 15:40
Mér finnst seinni kosturinn eitthvað svo augljós. Sé ekki einu sinni almennilega hver fyrri kosturinn er. Finnst eins og hann dofni bara því lengur sem ég horfi á hann og reyni að ráða úr honum.
July 18th, 2008 at 16:20
Sæll Stefán
Húsfélag er eina lausnin sem virkar. Það kostar einhvern smápening að fá kennitöluna, og svo ferðu bara í bankann þinn og semur um að hann sendi greiðsluseðil á hverja íbúð mánaðarlega. Kosturinn er að þá geturðu haft upphæðina sem þú rukkar inn áhverjum mánuði lítið eitt hærri en heitavatnsreikninginn, og þannig safnað framkvæmdasjóð.
Ég gerði þetta fljótlega eftir að ég flutti á Skeggjagötuna, við almenna ánægju nágranna.
Fyrir þetta lítið fjölbýli þarf ekki að hafa miklar áhyggjur af ársreikningum og slíku veseni.
July 18th, 2008 at 16:26
Ég herpist öll saman innan í mér af pirringi yfir því hvernig Orkuveitan kvaddi mig þegar ég flutti af landi brott. Reikningar mínir voru alltaf ofreiknaðir og því átti ég inni hjá þeim við lokun en mér var harðneitað að fá það greitt, það verður bara að vera þarna á kennitölunni minni þangað til ég flyt aftur heim, sem gæti orðið í formi ösku einhvern tímann upp úr 2050.
July 18th, 2008 at 16:31
Og ég gleymdi að kjósa, var svo upptekin af því að tjá mig um sjálfa mig: Liður 2, auðvitað.
July 18th, 2008 at 19:03
Liður II
Við erum í þessum pakka líka, rukkum risíbúðina um hitann, verst að píparinn (sem átti jarðhæðina áður en við keyptum hana og sameinuðum) skyldi ekki skilja allar íbúðirnar í sundur og fá nýjan mæli þegar hann skildi sína frá. Nú borgum við tvo reikninga og skiptum öðrum þeirra í tvennt til að rukka risið.
Spennt að vita hvað kemur út úr þessu.
July 18th, 2008 at 20:52
Gruna þetta fyrirtæki ætíð um græsku,er í sameign 9 íbúða og sameiginlegi hitaveitureikningurinn er alltaf fáránlega hár á hverju ári og þegar farið er að spyrjast fyrir um mögulegar orsakir,er svarað út í hött og talað niður til íbúanna.Það er ekki létt verk að eiga við þetta.
July 21st, 2008 at 07:15
Þjónustu-og umsýslugjöld eru yfirleitt til að hafa fé af fólki. Orkuveitan gæti örugglega fundið glás af gjöldum til að innheimta. Það er tímafrekur andskoti að eiga við svona og það vita þessi stóru fyrirtæki.
Seinni kosturinn er því einboðinn. Ef þú hefur tíma og nennu til að standa í þessu.
July 21st, 2008 at 14:39
Mikið er ég feginn að heyra að OR var ekki tilbúinn til þess að gera við þig einhvern sérdíl þar sem þú ert starfsmaður. Það er víst nóg búið að gera af svoleiðis samningum í gegnum tíðina.
Klagaðu þá endilega…