Um tilgangsleysi allra hluta

Famelían er farin í sumarfrí til Danmerkur. Hér verður ekkert skrifað fyrr en í júlí.  Sjáumst þá. Reynið að þrauka.

- Og til að hryggja blogglesandi innbrotsþjófa, þá er búið að lána íbúðina þessar tvær vikur svo kofinn verður ekki mannlaus…

Asíukeppnin skýrðist allrækilega í gær.

1. riðill: Ástralir eru komnir áfram.  Írak og Katar eru jöfn að stigum og mætast á “heimavelli” Íraka í Dubai. Reikna með Írak áfram.

2. riðill: Japan og Bahrain komin áfram.

3. riðill: Norður- og Suður-Kórea komin áfram.

4. riðill: Úzbekistan og Sádi Arabía komin áfram.

5. riðill: Íran komið áfram. Sýrlendingar þurfa að vinna Sameinuðu arabafurstadæmin á útivelli til að skjótast framúr þeim.

Milliriðlarnir klárast eftir viku. Í kjölfarið verður svo dregið í lokariðlana. Ég spái tveimur nýjum fulltrúum Asíu í lokakeppnina.

Írakar gerðu sér lítið fyrir og unnu Kínverja í Tianjin. Þar með er ljóst að Kína vermir botnsætið í fyrsta riðli, sem hljóta að vera gríðarleg vonbrigði þar á bæ. Fyrir nokkrum árum virtist sem Kínverjum væri að takast að byggja upp karlaknattspyrnu og frambærilegt landslið, en þær vonir virðast að engu orðnar.

Ástralía og Katar mætast á eftir. Sem stendur eru bæði lið með sjö stig eins og Írak. Þarna verður spenna fram á síðustu stundu.

Í Afríkukeppninni vekur athygli að Fílabeinsströndin er undir gegn Botswana í hálfleik. Áður hafði lið þeirra gert jafntefli gegn Madagascar. Reikna með að þetta starf verði laust til umsóknar eftir helgi…

Fínir leikir í gangi í Suður-Ameríkuhlutanum í dag. Hvernig er það – hefur Sýn ekki rétt á þeim leikjum? Hvað með að fá eitthvað af þessari forkeppni í íslenskt sjónvarp!

Fullt af leikjum í forkeppni HM í dag.

Norður-Kórea er komið áfram eftir heimasigur á Jórdaníu og Suður-Kórea er þar með einnig öruggt um sæti í lokaumferðinni. Þar með þriðji riðill afgreiddur.

Japan vann Tæland í öðrum riðli og er þar með komið áfram. Bahrein gæti tryggt sér sæti á eftir í leik gegn Óman.

Sádi Arabar eru yfir í hálfleik gegn Singapúr, en voru de facto komnir áfram úr fjórða riðli ásamt Úzbekum.

Kína er yfir gegn Írak í fyrsta riðli undir lok fyrri hálfleiks. Þessi úrslit myndu fella Íraka úr leik.

Engir leikir eru enn byrjaðir í fimmta riðli.

Meira síðar…

* * *

(Uppfært kl. 13:30)

Nei sko!  Írakar eru búnir að skora í  tvígang gegn Kínverjum og tuttugu mínútur eftir!  Það er magnað.

Sádarnir unnu hins vegar sinn riðil vandræðalaust. Úrslit eru þá fengin í tveimur riðlum af fimm – einn virðist nokkuð ráðinn en tveir eru galopnir.

…hlýtur að vera auglýsingin frá einhverjum bílaframleiðandanum sem hamrar á því að verkfræðingateymi fyrirtækisins hafi einkaaðgang að lúxushóteli með góðri sundlaug og mörgum veitingastöðum.

Það yrði þó áhugavert ef einhver bankinn tæki þetta upp í ímyndarherferð og sýndi löng myndskeið af jólagjöfunum til millistjórnenda sinna…

Ég fæ ókjör af ruslpósti. Nýjasta skriðan eru auglýsingar um “Blue sexy pill” – sem ég reikna með að sé einhverskonar Viagra eftirlíkingar-svindl.

En ég er líka á nokkrum íslenskum fjölútsendingarlistum, án þess að hafa hugmynd um hvers vegna. Einhverra hluta vegna fæ ég t.d. alltaf sendan póst frá Stiklum – viðskiptaskrifstofu utanríkisráðuneytisins. Svo sendir Óli Palli á Rás 2 mér vikulegan pistil um hvað sé á dagskránni í Rokklandi. Ekki hef ég grænan grun um hvers vegna mér var bætt inn á þann póstlista.

Eftir rúma þrjá sólarhringa verður famelían komin til Óðinsvéa. Það er þriðja stærsta borg Danmerkur, en við að lesa færsluna um hana á Wikipediunni finnst manni hún frekar vera smáþorp.

Jú – þarna má sjá smágerða eftirlíkingu af turninum sem einu sinni var sá næststærsti í Evrópu á eftir Eiffel-turninum. Það hafði ég ekki hugmynd um.

Hvað gerir maður annars í þessari ágætu borg sér til dægrastyttingar?

# # # # # # # # # # # # #

Einhvern veginn finnst mér eins og fótboltaárið í Englandi sé stöðugt að lengjast. Í dag verður dregið í fyrstu umferð deildarbikarsins… Uppfæri það á eftir.

Uppfært: Heimaleikur gegn Plymouth. Verra hefði það getað verið.

Því hefur verið haldið fram að KR-búningurinn svart- og hvítröndótti hafi orðið fyrir valinu vegna þess að Newcastle United hafi verið svo öflugt í byrjun aldarinnar. Þetta er þó væntanlega bara tilgáta.

Nú er miðað við að KR sé stofnað árið 1899 – þótt líklega megi þrefa um það ártal. Á ljósmynd sem tekin var í byrjun tuttugustu aldar og á að sýna KR-inga á æfingu sést að einn og einn maður er í röndóttri treyju. Það gæti bent til þess að félagsmenn hafi snemma litið svo á að æskilegt væri að eignast slíka flík.

Varla hafa menn þó haft sama skilning á hugtakinu félagsbúningur og síðar varð. KR var á þessum tíma fyrst og fremst vettvangur fyrir knattspyrnuæfingar en ekki keppni. Fótboltaleikir voru einkum milli félagsmanna á æfingum og þá var til lítils að allir væru í eins treyjum.

Ef hugmyndin um röndótta búninginn er komin fram rétt um 1900 er vandséð hvers vegna Newcastle hefði átt að vera fyrirmyndin. Liðið hafði lítil afrek unnið á knattspyrnuvellinum og Íslendingar virðast ekki hafa vitað neitt um ensku knattspyrnuna – hvað þá að þeir gætu skoðað ljósmyndir af enskum fótboltaliðum. Híns vegar gerðu þeir sér grein fyrir því að Bretar væru öðrum þjóðum fremri í fótbolta.

1912 verða KR-ingar Íslandsmeistarar í hvítum treyjum. Sigra Framara sem þá þegar eru komnir í bláa búninginn. Það er því ekki fyrr en eftir 1912 sem svarthvíti búningurinn verður óskoraður einkennisbúningur KR. – Gaman væri að vita hvenær það gerist nákvæmlega. Varla þó seinna en svona 1915-1917 giska ég á.

Hvenær fara Íslendingar hins vegar að fá dellu fyrir ensku knattspyrnunni? Mér sýnist það byrja strax uppúr fyrri heimsstyrjöldinni – eða fljótlega eftir 1920. Fyrstu erlendu knattspyrnufréttirnar sem eitthvað kveður að eru af landsleikjum, en mjög fljótlega er farið að segja úrslit í ensku knattspyrnunni. Þá fyrst gæti maður farið að trúa því að íslenskir fótboltamenn velji sér treyjur að fyrirmynd Englendinga.

Seinnipartinn fór Mánagötu-famelían í heimsókn til Guðrúnar og Elvars, til að sleikja sólina á svölunum hjá þeim. Fljótlega varð úr að okkur var boðið í kvöldmat og fram voru galdraðar ljúffengar andabringur, risotto og graskersmauk.

Barnið bisaði við matinn sinn, át misvel af einstökum tegundum og setti svo upp skeifu yfir kjötinu: “Ógisslegt” sagði hún og var þegar skömmuð fyrir dónaskap.

Hún lét sér samt ekki segjast. Stakk upp í sig bita, tók hann strax útúr sér aftur, otaði honum framan í mig og endurtók: “Ógisslegt!”

Ég skoðaði bitann og varð að viðurkenna að það var fjandi mikil fita á honum. Ég tók því gaffalinn og útskýrði fyrir Ólínu að ég skyldi bara skera fituna af. “Gott!” – sagði hún.

Um leið og ég var búinn að skilja á milli fitunnar og kjötbitans var sú stutta fljót til og stakk upp í sig… fitunni.

“Uhh… er þetta gott?” – Spurðum við forviða. “Já – meira”, sagði grísinn.

Og við tók niðurskurður á andafituröndum fyrir barnið sem tróð í sig feitmetinu.

Þegar við vorum komin upp í rúm í kvöld með Vísnabókina var staðnæmst við “Fuglinn í fjörunni”. Ég var komin hálfa leið með að syngja kvæðið þegar barnið benti á teikninguna af mávinum og sagði: “Kannski var þetta fuglinn sem við átum í kvöld!”

Fékk til yfirlestrar bækling sem á að fara í prentun á næstu dögum. Í öftustu opnunni er gert ráð fyrir heilli síðu með auðum línum og yfirskriftinni: “Til minnis”.

Er hægt að hugsa sér slappari reddingu í umbrotsvinnu?

Skyldi það nokkru sinni í sögu mannsandans hafa gerst á undirbúningsstigi blaðs eða bókar að einhver í ritstjórninni hafi sagt: “Hey, svo verðum við endilega að hafa 1-3 línustrikaðar síður aftast – þar sem fólk getur sjálft punktað hjá sér athugasemdir! – Það kemur sér alltaf svo vel.”