Fjölmenning og pólitísk rétthugsun skríða fyrir trúarofstækismönnum!
Haukur Þorgeirsson flettir ofan af alvarlegu máli í athugasemd við færsluna hér að neðan.
Eins og menn muna, hafa kirkjunnar menn kvartað yfir því að Nói-Síríus setji litlar gúmmífígúrur - Púka - oná hluta páskaeggjanna sinna. Þetta eru hin svokölluðu “Púkaegg” sem glatt hafa börnin síðustu árin.
Púkarnir eru óskaplega vinalegar fígúrur, en vissulega með horn og hala eins og Kölski sjálfur - og það er of mikið fyrir guðslömbin.
Núna hefur páskaeggjaframleiðandinn Nói látið undan trúarofstækinu. Það verða engir púkar á eggjunum í ár, bara strumpar. Gerræði Jesúfasistanna hefur orðið ofaná. Melirnir!
Eflaust er þetta vel meint af páskaeggjaframleiðandanum, sem lætur pólitíska rétthugsun og fjölmenningarhyggju ráða gjörðum sínum - eflaust hugsa stjórnendur Nóa-Síríus sem svo að óþarfi sé að styggja sérstaklega trúarnöttarana af litlu tilefni…
En hér er um grundvallarartriði að ræða! Ef við leyfum skjaldsveinum biskups að ræna börnin okkar páskaeggjapúkunum, þá verður þess skammt að bíða að þeir banni okkur að borða annað en fisk á föstunni, konur fengju ekki að ganga í buxum eða flatbotna skóm - og hrossakjötið mun hverfa úr kæliborðum stórmarkaðanna.
Til að standa vörð um gildi samfélags okkar er siðferðisleg skylda hvers frjálslynds borgara að hamstra púkaegg og maula þau - helst á almannafæri eða í grennd við tilbeiðslustaði Jesúliðsins.
Það segi ég satt.
February 27th, 2008 at 18:40
Hvað heiðin frjósemistákn á borð við egg, kanínur og unga hafa með píslardauða og upprisu hins smurða að gera hef ég aldrei almennilega skilið. En hitt sýnist mér líklegt að kirkjunnar menn hefðu ekkert á móti því að banna okkur ýmislegt ef þeir kæmust upp með það. Ég veit t.d. ekki betur en þeir vilji banna sauðsvörtum almúganum að skemmta sér á föstudaginn langa.
February 27th, 2008 at 18:57
Ég held að það verði seint hægt að þröngva pólitískri rétthugsun upp á Peyo og Strumpana.
February 27th, 2008 at 19:56
Bara verst að það er ekki hægt að krefjast þess að þessir hallelújaöskrandi kjólklæddu kristamófasistar hunskist heim til sín ef þeir vilja ekki aðlagast okkar samfélagi og menningu, sem gúmmípúkar á páskaeggjum eru órjúfanlegur hluti af.
February 27th, 2008 at 19:57
Það skiptir einu hvort það eru múslimar eða kristnir, það er óþolandi þegar það er heimtað eitthvað af fólki í krafti trúar.