Hættur að blogga
Ákvörðunin hefur verið tekin. Ég er hættur að blogga. Lesendur sem lagt hafa í vana sinn að heimsækja bloggsíðuna Um tilgangsleysi allra hluta geta hætt því.
Ekki svo að skilja að ég sé hættur að skrifa hugleiðingar á netið, sem verða aðgengilegar á þessari vefslóð. Neinei, ég ætla bara að ganga á hönd hinni nýju hátækniorðræðu.
Krafa samtímans er hátækni. Allt verður einhvern veginn betra, flottara og dýrara ef það heitir hátækni-e-ð. Það er ekkert töff að byggja spítala, en allir vilja hátæknisjúkrahús. Fyrirtækið sem ætlar að byggja olíuhreinsunarstöð fyrir vestan kallar sig Íslenskan hátækniðnað eða e-ð álíka. Og þegar Yahoo, Microsoft og Google biðja um að fá að kaupa rafmagn til að reka geymslur sem er í raun bara stórir kæliklefar - þá heitir húsvarðadjobbið “hátæknistörf við rekstur netþjónabúa”.
Ég vil taka þátt í þessu. Hér með hefur því verið ákveðið að Um tilgangsleysi allra hluta sé ekki lengur bloggsíða heldur “hátæknihugveita” og ég því ekki lengur bloggari heldur “hátæknihugveitir”.
Spurning um að breyta skráningunni í Símaskránni líka?
August 17th, 2007 at 11:13
Ég ætla að bregða mér snöggvast í Bolinn og grátbiðja þig að hætta ekki að blogga.
August 17th, 2007 at 11:22
Líst vel á þetta. nafni. Velkominn í hátæknibransann. Úr því að web logger breyttist í blogger, þá er spurning hvort hátæknihugveitir verður ekki fljótlega stytt í hveitir? Eins er líka pæling hvort ekki verður að uppfæra öll starfsheitin sem enda á -tæknir (ræstitæknir, pokatæknir, snyrtitæknir, osfrv) með viðbótinni -há-, sbr. ræstihátæknir. “Tækni”-viðbótin er alltof lítilmótleg. Kær kveðja úr upplýsingahátæknigeiranum!
August 17th, 2007 at 11:45
Hver á þá að vera besti og frægasti bloggarinn? Stefán Friðrik?
August 17th, 2007 at 12:08
Mér hefur alltaf fundist að blog ætti að ríma við flog.
August 17th, 2007 at 12:09
Ég held að hann sé augljósasti valkosturinn, Palli.
Annars er nafngiftin á þessu olíuhreinsunar-fyrirtæki stórkostleg.
August 17th, 2007 at 14:05
Til hamingju með breyttan vettvang.
Þetta er allt annað líf.
August 17th, 2007 at 15:18
Það er nú óheiðarlegt að gefa það í skyn að þú sért hættur þessu netþusi þínu þegar reyndin er sú að þú kallar það aðeins öðru nafni. Ég þurfti að reka tappann aftur í kampavínsflöskuna. Og ekkert þus eins og hjá Stebbafr um að menn lesi þig bara ef þeir vilja. Það er nú bara af skítlegri breiddargráðu svo ég vitni í meistarann.
August 17th, 2007 at 19:39
hátækniveitir hlýtur að styttast í háviti…
Annars fagna ég þessari hátæknivæðingu þinni, #.
August 17th, 2007 at 22:45
Hálvitavæðingu?
August 18th, 2007 at 12:57
hehehe.
En er til þjált orð yfir blog á íslensku?
August 18th, 2007 at 14:55
Já það er til mjög þjált orð á íslensku. Blogg.
August 19th, 2007 at 08:12
Ég er uppnuminn af þessu orði, og ég ætla að nota það óspart. Ég, einsog sumir, er einnig hátæknihugveitir.
August 19th, 2007 at 12:06
Blog, rímar við flog.
August 20th, 2007 at 00:56
Svo ég komi með innlegg frá óhúslegu húsmóðurinni í Vesturbænum.
Frá málþróunar-ferlislegu sjónarmiði. Þá gengur alltaf það sem er stutt og fellur að íslenskri beygingu. Sbr. þotur voru kallaðar háþrýstiloftsflugvélar til að byrja með. Einstaklega lýsandi heiti eins og t.d. hátæknihugveitir.
En mjög tyrfið fyrir tunguna og hið íslenska leti-gen.
Blog er stutt en virkar ekki, hver vill bloga? Mjög geðlurðulegt að bloga og frekar slímkennt orð. Ég myndi leka út yfir lyklaborðið ef ég væri að bloga.
Hin orðheppni prestur í Óháða söfnuðinum kallar þessa athöfn nú barasta rafröfl.
Er styttingin ekki bara að há(tæknihug)væðast? Hávæðast? Hæðast?
August 20th, 2007 at 01:28
“Ég var að hæðast að hæstvirtum dómsmálaráðherra í gær.”
Virkar fyrir mér.
August 21st, 2007 at 11:11
Ennfremur legg ég til að í stað hins óþjála orðskrípis “lögregluþjónn”, sem fæstir kunna að bera fram og segja þess í stað “löðrugluþjónn” verði tekið upp orðið þvagtæknir.