Móralska spurningin
Sumum finnst gaman að velta fyrir sér siðfræðiþrautum. Búum til eina slíka:
Hugsum okkur að við séum farsæll stjórnmálamaður, krati sem er loksins kominn aftur í ráðherrastól eftir langa bið. Undir ráðuneytið fellur meðal annars skrifstofa jafnréttis- og vinnumála. Fyrstu dagana í embætti gengur eitt og annað á. Erlend ríkisstjórn sér t.d. ástæðu til að senda hingað sendiherra sinn til að kanna fregnir af ómanneskjulegum vinnuaðstæðum. Um svipað leyti stíga fram vitni sem staðhæfa að einelti og kynferðisleg áreitni sé látin viðgangast á einhverjum stærsta vinnustað landsins, þar sem verið er að byggja á vegum hins opinbera.
Í ljósi þessara forsenda, hvert af eftirtöldu yrði okkar fyrsta verk í embætti:
i) Að mæta strax á framkvæmdasvæðið og krefjast þess að fá að kanna aðstæður með eigin augum.
ii) Að skipa fyrir um rannsókn á því hvort ásakanir um stofnanabundið kynþáttamisrétti og kynferðislegt ofbeldi í skjóli ríkisfyrirtækis eigi við rök að styðjast.
eða
iii) Að taka upp helsta kosningamál Frjálslynda flokksins í útlendingamálum - þó þannig að starfsmannaleigurnar missi nú örugglega ekki spón úr aski sínum.
Skemmtilegar svona siðfræðiþrautir…
# # # # # # # # # # # # #
Ég hefði betur sleppt því að blogga um Höfðaborgina og sprengingarnar þar. Skrif mín hafa reitt verktakana til reiði og þeir sprengja nú sem aldrei fyrr. Rúðurnar í húsinu hafa nötrað í dag. Við erum þó örugglega 500 metra grunninum. Vei þeim sem búa t.d. á Rauðarárstígnum eða staffinu í Lögreglustöðinni.
Megi reiði verktakanna beinast að Moggablogginu í staðinn.
May 31st, 2007 at 10:02
Þessi þraut er snúin!!
En ég er með aðra; Hugsum okkur að við séum (nokkuð farsæll) stjórnmálamaður, kommi sem er á þingi en þó nánast alltaf í stjórnarandstöðu. Á alþingi og í efnahagslífunu gegnur eitt og annað á og stjórnmálamaðurinn bendir sífellt á að til sé að verða stór hópur fátækra, margir verða eftir í uppganginum og bilið milli fátækra og ríkra sé alltaf að breikka. Um svipað leyti er lagt fram frumvarp. Það er um laun og ellilífeyri alþingismanna og hljóðar uppá verulega hækkun launa þingmannsins og mun betri ellilífeyri heldur en hjá almenningi. Á sama tíma á ríkið í deilum við öryrkja. Í ljósi þessara forsenda, hvert af eftirtöldu myndi maður gera:
i) Að mæta strax á framkvæmdasvæðið, mótmæla frumvarpinu og krefjast úrbóta í málum öryrkja.
ii) Að krefjast þess að ellilífeyrisfrumvarpið verið a.m.k. til þess að fleiri hópar í þjóðfélaginu fái sambærileg ellilífeyriskjör og alþingismenn.
eða
iii) Láta sig hverfa …. fara í fjallgöngu - kannski maldað eitthvað í móinn, þó þannig að missa nú ekki ekki spón úr aski sínum.
Já… þær eru mjög skemmtilegar svona siðfræðiþrautir…
June 6th, 2007 at 13:21
Hummm, eru þeir byrjaðir að sprengja í Höfðaborginni líka? Jú það er rétt, Kaupþing Banki er víst búinn að láta rífa húsið sem var byggt á rústum neðri hluta Höfðaborgarinnar (Fjarhitun) og er að byggja nýtt hús á lóðinni. Annars var Höfðaborgin (efri hluti) austan við Höfðatún, en sprengigígurinn vestan við. Neðri hlutinn Höfðaborgarinnar var neðan við Borgartúnið en austan við Höfða.
June 7th, 2007 at 09:58
Las ég ekki einhvers staðar að skrímslið sem Eykt er að byggja þarna eigi að heita Höfðaborg? - Vissulega er staðsetningin þó ekki nákvámlega sú sama og á hinni einu sönnu Höfðaborg.