Um tilgangsleysi allra hluta

Fjórðungsúrslit er flott orð og miklu betra en 8-liða úrslit. Hins vegar væri fíflalegt að tala um helmingsúrslit í stað undanúrslita. Merkilegt.

Fótboltadagurinn mikli er runninn upp. Leikur Þýskalands og Argentínu er sá stærsti á mótinu til þessa. Úkraína gegn Ítalíu er heldur ekkert slor. Ég vil sjá þessi undanúrslit:

Argentína : Úkraína & Portúgal : Frakkland.

Hef fulla trú á að það verði að veruleika.

# # # # # # # # # # # # #

Nú eru fjöldamörg blöð og tímarit skönnuð inn á Tímarit.is hjá Landsbókasafni. Það eru þó ekki nema nokkur þeirra sem hægt er að skoða með orðaleitarvélinni. Hvað veldur? Er við því að búast að þeim blöðum sem hægt verður að leita í á þennan hátt fjölgi og hvað með þau sem eldri eru?

Nú er Morgunblaðið orðið það blað sem auðveldast er fyrir sagnfræðinga að leita í. Þetta mun þýða að sagnfræðingar sem skrifa um 20. öldina munu í vaxandi mæli geta fínkembt Moggann í heimildaöflun sinni en munu láta önnur blöð sitja á hakanum. Þetta getur augljóslega gefið villandi mynd.

Legg til að S-hópurinn taki upp veskið og kosti innskönnun á Tímanum eins og hann leggur sig. Ekki er ráð nema í tíma sé tekið - og Framsóknarflokkurinn verður fljótlega bara sagfnræðilegt viðfangsefni…

Skyldi Mál og menning hafa geymt eitthvað af Rússagullinu? Nú væri gott að hafa það til að koma Þjóðviljanum á tölvutækt form.

Fór að velta því fyrir mér í gærkvöldi klukkan hvað sólarhringurinn byrji. Eða öllu heldur - er til eitthvað sem heitir “klukkan núll”?

Af tölvuklukkum heimilisins segir um það bil helmingurinn að klukkan á miðnætti sé 0:00 en hinn helmingurinn að þá sé hún 24:00. Ætli þessi munur sé menningarbundinn? Nú er klukkan á ofninum frá Þýskalandi og segir 24 en þær japönsku veðja á 0:00.

Getur verið að þetta sé angi af stærra ágreiningsefni - svipað og karpið um hvenær aldamótin eru? Þannig telji hluti klukkuframleiðenda að 00:01 sé fyrsta mínúta sólarhringsins en 24:00 sú síðasta, meðan aðrir veðji á 00:00 og 23:59?

Treysti á lesendur mína að efna til lærðra umræðna um þetta mál í athugasemdakerfinu…

# # # # # # # # # # # # #

Sá FRAM vinna Fjölni í gær. FRAM og Þróttur eru því komin með fimm og fjögurra stiga forskot á næstu lið. Sýnist toppbaráttan farin að liggja nokkuð ljós fyrir nú þegar.

Á sunnudaginn mætum við Skagamönnum í bikarnum. Spurning hvort Óli Þórðar verði ennþá með liðið…

Töffaralegur and-reykingaáróður í reykvísku tímariti frá 1912, þar sem áherslan er ekki lögð á heilsuspillandi áhrif tóbaksnautnarinnar heldur tímasóunina:

Þriðjungur af íbúum jarðarinnar reykir 300000000 manna. Þessir menn brenna á degi hverjum tóbaki sem nemur 50000000 króna. Vinnutöfin við að kveikja í, láta í og taka úr nemur svo mörgum dagsverkum á dag, að nægja myndi til þess að gera tvo Panamaskurði.

Jamm.

# # # # # # # # # # # # #

Úr sama blaði:

Ekstrablaðið, ómerkilegt fleipurblað í Kaupmannahöfn, hefir nýlega ritað um þýdda sögu eftir Jónas frá Hrafnagili og notað tækifærið til að smána Íslendinga og þjóðareinkenni þeirra.

Varð það ekki titill á bók eftir Mikael Torfason? Það er eins og mig minni það.

Ólína varð frekar pirruð á föður sínum í gær. Þegar henni fannst nógu lengi setið í heimsókn fór hún og náði í húfuna sína og setti á höfuðið, sótti skóna sína og úlpuna og rétti mér. Svo stóð hún og beið eftir að ég skildi vísbendinguna.

Þegar þetta hafði ekki tilætluð áhrif rölti hún aftur fram, náði einhvern veginn í jakkann minn, dró hann með erfiðismunum inn í stofu og setti í fangið á mér. Mikið skýrari verða skilaboðin nú ekki.

# # # # # # # # # # # # #

Í gær var maður áþreifanlega minntur á hvað Ísland er fámennt land. Íþróttadeild Sýnar hefur gefist upp á að fá nýja viðmælendur í hálfleiksspjall fyrir hvern einasta leik. Þess í stað var Geir ÓLafsson kallaður í stúdíó öðru sinni - núna til að sýna knattþrautir. Ég hefði viljað vera viðstaddur deildarfundinn þar sem menn töluðu sig inn á að þetta væri góð hugmynd.

# # # # # # # # # # # # #

Í dag mun bandaríska fyrirtækið Dr. Don´s Buttons póstleggja sendingu til Íslands. Dr. Don er aðalbirgir okkar Palla í barmmerkjaframleiðslunni. Það er greinilega kominn nýr maður í söludeildina - einhver Ardy sem svarar öllum fyrirspurnum greiðlega og af stakri kurteisi. Hann leysir af hólmi Bruno sem skrifaði allan tölvupóst með hástöfum til að lesandanum fyndist hann vera að öskra á sig - sem hann var líklega að gera. Ég sakna samt Brunos.

Í sendingunni verður nýr skerari fyrir einnar tommu merkin. Ef hann virkar jafnvel og auglýsingarnar lofa, ætti það að létta okkur lífið talsvert.

Þá vantar okkur bara sniðug slagorð til að þrykkja á barmmerki. Uppástungur?

Í gær var sett upp nýtt og betra sýningartjald í Friðarhúsi. Það mun vitaskuld gagnast fyrir hvers kyns myndasýningar og fyrirlestra í framtíðinni, en sem stendur kætast einkum knattspyrnugláparar.

Nú dvel ég öllum stundum í Friðarhúsi, enda allir leikir í úrslitakeppninni sýndir þar.

# # # # # # # # # # # # #

Helv. Englendingarnir eru ömurlegir. Skriðu áfram gegn Ekvador og mæta svo Portúgal sem verður með hálft liðið meitt eða í leikbanni. Ljótt, ljótt sagði fuglinn.

Í morgun var ég í viðtali í Íslandi í býtið vegna trúleysisráðstefnunnar sem haldin verður um helgina, en þar flyt ég erindi á vísindasögulegum nótum. Meðan við Sigurður Hólm biðum eftir að komast að horfðum við á fréttatíma þar sem Dagur Eggertsson hafði uppi stór orð um hversu fáránlegt það væri ef borgin réðist í að byggja leiguíbúðir fyrir eldri borgara. Helstu rökin virtust vera þau að þannig hefðu menn gert í gamla daga og þetta væri ekki nútímalegt.

Nákvæmlega hvað er slæmt eða óæskilegt við að borgin eigi og reki leiguíbúðir ætlaðar gömlu fólki? Er það kannski bara vont vegna þess að Sjálfstæðisflokkurinn er að íhuga þann kost og Samfylkingin er í stjórnarandstöðu?

Manni virðist einmitt sem fjárfestar í borginni nenni ekkert að sinna byggingum á leiguhúsnæði af þessum toga, heldur vilji þeir bara reisa fokdýrar háklassaíbúðir í miðbænum eða einhverjum bryggjuhverfum. Er þá nokkuð að því að borgin komi inn á markaðinn af krafti?

Minn gamli skólabróðir verður að passa sig á að falla ekki beint í fýlupokagryfjuna sem getur reynst mörgum stjórnarandstæðingum hættuleg.

# # # # # # # # # # # # #

FRAM tekur á móti Þrótti í kvöld. Ég hef bara séð einn heilan leik það sem af er sumri og það var hörmungarleikurinn í fyrstu umferð á móti Víkingi Ólafsvík. Nú er komið að stórleik sumarsins og allir góðir menn mæta á völlinn, hverjum er ekki sama um þessa frönsku labbakúta sem spila á HM á sama tíma?

Fór að blaða í eintaki af snilldarbarnabókinni Stubbi, sem Ólína hefur leikið grátt síðustu daga. Ákvað af rælni að grafast fyrir um höfundana, þau Bengt og Grete Janus Nielsen.

Bengt þessi, sem teiknaði myndirnar, mun vera Bengt Janus. Hann er betur þekktur sem Jens K. Holm, en undir því dulnefni skrifaði hann einmitt Kim-bækurnar…

Þetta finnst mér skemmtilegt kjúríosítet og fyllsta ástæða til að deila með heiminum!

(Þessi færsla hefði verið flottari ef ég hefði fundið mynd að Stubbi (d. Strit) til að skreyta hana með - en það mistókst.)

Önnur langamma Ólínu hefur áhyggjur af því að krakkinn sé að fá ilsig og leggur til að hún verði höfð meira í skóm heima við, nánar tiltekið í skóm með góðu innleggi. Nú er ég alveg úti á þekju í þessum fræðum. Hvort þykir betra fyrir litlar lappir að hlaupa um í góðum skóm eða á sokkaleistunum?

Treysti á snillingana sem lesa þessa síðu til að svara spurningunni.

# # # # # # # # # # # # # # #

Það var góður hópur samankominn í Friðarhúsi í gærkvöldi. Sumir voru að hjálpa til við að setja glæsilegt skilti framan á húsið sem sést langt að. Aðrir horfðu bara á fótboltann.

Ákveðið hefur verið að frá og með 16-liða úrslitunum verði hver einast leikur sýndur í Friðarhúsi. Þar geta boltaþyrstir friðarsinnar safnast saman, lausir við reykingastybbuna sem fylgir flestum börum.

Talandi um HM. Getur einhver staðfest það hvort markatala í riðlinum eða innbyrðisviðureignir verði fyrst látið gilda til að ákvarða röð liða?

Ég ákvað fyrir EM 1996 að halda með Frökkum. Þeir ollu nokkrum vonbrigðum á mótinu, en öllum mátti þó vera ljóst að Evrópumótið var bara upphitum fyrir HM í Frakklandi tveimur árum síðar.

Á HM 98 og EM 2000 brugðust Frakkarnir mér ekki og hömpuðu titlinum. 2002 studdi ég Frakka sömuleiðis - en hvílíkar hrakfarir! Frakkar voru sendir heim með skömm eftir ömurlega frammistöðu og ekkert mark skorað.

Ég er enn ekki búinn að fyrirgefa Frökkum svikin frá því fyrir fjórum árum. Ekki aðeins hef ég snúið fullkomlega við þeim baki - heldur hlakkar í mér yfir óförum þeirra núna. Vonandi floppa þeir líka gegn Tógó í lokaleiknum og verða grýttir með úldnu grænmeti við komuna til Parísar. Það ætti að kenna þeim!

“Í stuttu máli sagt, jafnrjettisást kommúnista á Íslandi og “frjálslyndi” þeirra birtist á þann hátt að þeir vilja eyða gjaldeyri til þess að blökkumenn geti spilað á blásturshljóðfæri fyrir Reykvíkinga.”

Mogginn, 18.jan. 1948

Það er ekki laust við að Megasar-textinn Svo skal böl bæta komi upp í hugann þegar Morgunblaðsleiðarinn Svartir menn og hvítir frá 18. janúar 1948 er lesinn. Þar segir:

“Það lítur t.d. sjerlega einkennilega út þegar íslensku kommúnistarnir eru harmi lostnir, er þeir frjetta að einhvers staðar á jörðinni þurfi svartir menn að sitja í verri sætum í strætisvögnum en hvítir, þegar þeir jafnhliða lýsa ánægju sinni yfir því að hvítir menn sjeu hengdir eða skotnir það suður á Balkanskaga að hafa sjálfstæða skoðun á því, hvernig eigi að stjórna landi þeirra.”

Þetta er gömul saga og ný - Mogginn þolir engum að gagnrýna Bandaríkjamenn og hefur aldrei gert. Þá er heppilegt að geta bent á eitthvað annað - þrælana á Volgubökkum eða raunar hvað sem er.

# # # # # # # # # # # # #

Les á netinu að Arnljótur Davíðsson hafi skorað eitt marka FRAM í bikarkeppninni á föstudaginn. Það er magnað!