Exbé
Það var áberandi í prófkjörsbaráttunni hjá mínum gamla vini og félaga Birni Inga fyrr í vetur, hvað hann skaut sér undan því í auglýsingunum sínum að nefna Framsóknarflokkinn á nafn. Þannig var alltaf auglýst að Björn Ingi ætti að vera í fyrsta sæti í Reykjavík - en ekki í fyrsta sæti á lista Framsóknar. Þetta er nokkuð frábrugðið því sem gerðist t.d. í auglýsingum frambjóðenda í prófkjörunum hjá íhaldinu og krötunum, þar sem flestir lögðu áherslu á nafn viðkomandi stjórnmálaflokks.
Um helgina mátti sjá fyrstu stóru blaðaauglýsingar Framsóknarmanna í Reykjavík fyrir kosningarnar. Í ljós kemur að þar er sama stefna og hjá Binga í prófkjörsbaráttunni: að fela nafn Framsóknarflokksins. Þannig er auglýst undir slagorðinu “Exbé” og fólkið á listanum kynnt sem frambjóðendur B-listans.
Ætli það sé gaman að vera í forsvari fyrir stjórnmálaflokk og þurfa að sitja á fundi með ráðgjöfum frá auglýsingastofum sem útskýra að flokkurinn sé svo hataður og fyrirlitinn að best sé að fela nafnið hans?
April 10th, 2006 at 18:32
Ætli það sé ekki best fyrir þá að breyta nafni flokksins í Exbé. Framsókn er orðið samnefni fyrir vandræðamennsku í pólitík …
April 10th, 2006 at 20:00
Sæll gamli vinur,
Takk fyrir að benda á auglýsingarnar okkar. En skýringin á exbé og B-listanum er ekki jafn dramatísk og þú gefur í skyn, eða vilt vera láta minn kæri. Staðreyndin er sú að í borgarstjórnarkosningum hefur verið rík hefð fyrir því að auðkenna framboðin með listabókstaf og það var gert í tilfelli okkar framsóknarmanna, t.d. í kosningunum 1982, 1986 og 1990. Þá var jafnan auglýst í nafni B-listans og þótti gefast nokkuð vel.
Með bestu kveðjum, Björn Ingi
April 11th, 2006 at 11:39
Ha!
Þarna var stungið upp í þig…
April 11th, 2006 at 12:54
Aldrei á að láta sannleikann eyðileggja góðar samsæriskenningar.
Til þess er hann alltof óspennandi
April 11th, 2006 at 13:00
,,Svandís um alla borg”. er vg nefnt þar á nafn?
April 11th, 2006 at 13:48
Nú vill svo heppilega til að hægt er að skoða kosningarnar 1982 og 1986 eins og þær birtust í Mogganum, innskannaðar á vef Landsbókasafns. Gott ef eitthvað af árinu 1990 er ekki komið þar inn líka. Það er nú ekki að sjá að menn hafi reynt að fela nafn og merki Framsóknarflokksins í tveimur fyrri skiptunum - hitt er svo aftur rétt að 1990 var fátt í auglýsingum Framsóknarmanna, afsakið - B-lista, sem benti til tengsla við flokkinn. Enda skrifaði Björn Bjarnason hæðnislega grein það ár um að Framsókn í borginni væri “feluflokkur” sem ekki vildi koma fram undir nafni.
Það er svo sem ekkert einsdæmi að flokkar geri þetta. Í kosningunum fyrir átta árum lögðu Sjálfstæðismenn í Reykjavík merki flokksins svo að segja - óhræsið fékk nánast ekkert að birtast og sáu andstæðingar íhaldsins þá ástæðu til að vekja athygli á þessum feluleik.
Auðvitað er alltof snemmt að fullyrða neitt um kosningaherferð Framsóknar í Reykjavík þetta vorið - til þess höfum við einfaldlega ekki séð nógu mikið enn. Fyrstu táknin benda þó til að ekki sé ætlunin að nota merki flokksins í auglýsingum það er öfugt við það sem t.d. Samfylking og Vinstri græn gera. Þannig minnir mig endilega að VG-merkið hafi verið sjáanlegt á öllum Svandísar-auglýsingunum sem spurt var um hér að ofan.