Um tilgangsleysi allra hluta

Konan mín skilur mig ekki.

Að mati hennar er til eitt stórt mengi sem heitir kaffi. Þessu kaffi má skipta í gott kaffi og vont kaffi. Gott kaffi er gert úr fínum baunum, helst nýmöluðum og hitað eftir kúnstarinnar reglum og með viðeigandi græjum. Vont kaffi sé úr ódýrum kaffimulningi, illa hitað og jafnvel staðið eða soðið. Slíkt kaffi fær maður t.d. í bönkum og á ótrúlega mörgum vinnustöðum. Í huga Steinunnar er fráleitt að drekka vont kaffi ef gott kaffi er í boði.

Þetta viðhorf byggist á misskilningi. Gott kaffi og vont kaffi eru tvö ólík fyrirbæri. Vissulega er gott kaffi um flest betra en vont kaffi, en eiginleikar þessara tveggja fyrirbæra eru gjörólíkir. Stundum - og raunar býsna oft - er vont kaffi betra en gott kaffi.

Á Mánagötunni eru tvær leiðir notaðar til að blanda kaffi. Það er hægt að sjóða vatn í potti og útbúa svo kaffið í pressukönnu - en einnig er hægt að hella upp á með skran-kaffikönnu sem lætur vatnið vætla langt undir suðumarki í gegnum korginn. Steinunn hellir aldrei uppá með þessum hætti, enda skilur hún ekki tilganginn í að drekka vonda kaffið frekar en það góða.

Gallinn við góða kaffið er hins vegar sá að það drekkur maður úr hálfgerðum fingurbjörgum, helst ekki nema einn eða í mesta lagi tvo bolla og við minnsta gleypigang fyllast vit manns af korgi. Þannig er hægt að lepja kaffi á sunnudögum, en dagsdaglega vill maður drekka kaffi eins og bjór - úr stórum krúsum, nógu mörgum og með vænum sopum. Þessum þörfum geta fínu espressó-vélarnar ekki fullnægt, þótt þær kosti álíka mikið og bíllinn minn.

Ég er farinn að hella uppá…

# # # # # # # # # # # #

Wolves mætir Luton í kvöld á Sky. Áhugasamir geta hitt mig í Glæsibæ yfir leiknum.

Það eru allir að blogga um DV. Held að það myndi engu bæta við umræðuna þótt ég rekti viðhorf mín til málsins hérna. Tvær hugsanir hafa þó leitað sterkt á mig frá því að byrjað var að ræða um þennan harmleik í fjölmiðlum og á netinu:

i) Annars vegar fór ég að hugsa um bókina “Góðir strákar” eftir Helga Ingólfsson. Helgi kenndi mér listasögu í MR og mér skilst að hann hafi líka unnið á Grænuborg þegar ég var þar sem gríslingur og að við krakkarnir höfum dáð hann út af lífinu.

Helgi ruddist fram á ritvöllinn með sögulegri skáldsögu sem gerðist í Rómarveldi. Sú bók fékk góða dóma og hlaut verðlaun. Síðar minnir mig að út hafi komið framhald, sem ég las aldrei. Eftir þessa byrjun, söðlaði Helgi rækilega um í ritstörfum sínum og skrifaði 3-4 stuttar skáldsögur sem allar mátti telja gamansögur, grátbroslegar á köflum, en þær voru einungis gefnar út í kilju á vegum Uglu-kiljuklúbbsins. Ein þeirra var Góðir strákar.

Aðalpersónurnar voru að mig minnir tvær þær sömu og úr fyrri gamansögum Helga. Annar var fremur misheppnaður rithöfundur sem skrifaði slappar unglingabækur. Sá hafði sent frá sér bókina “Góðar stelpur”, en ein persónan í bókinni - fitubolla í gaggó - framdi sjálfsmorð. Í kjölfarið drápu tvær frekar en þrjár feitlagnar unglingsstelpur sig.

Eftir að DV flutti fréttir af málinu, varð aðalsöguhetjan skyndilega hataðasti maður landsins og hvarvetna mátti finna fíleflda leigubílsstjóra sem voru meira en reiðubúnir að lemja hann í plokkfisk. Bókin lýsir svo hrakningarsögu þeirra félaganna - samúð lesandans er með aðalsöguhetjunni, en engu að síður er sú hugsun aldrei fjarlæg að hann hafi með kjánalegum skrifum sínum orðið valdur að dauða nokkurra barna. Á slíkur maður einhverja samúð skilda?

“Þægir strákar” vöktu ekki mikla athygli á sínum tíma. Plottið var líka nokkuð þungmelt fyrir bók sem að öðru leyti var hálfgert léttmeti. Kannski einhverjir verði til þess að rifja hana upp að þessu tilefni?

ii) Hin hugrenningartengslin varða það þegar siglfirskir sjómenn og verkamenn fluttu Svein Benediktsson nauðugan frá Sigló. Sveinn hafði nokkru fyrr skrifað ótrúlega svæsna grein í Morgunblaðið sem leiddi til sjálfsmorðs verkalýðsleiðtoga á Siglufirði sem þar hafði verið borinn þungum sökum.

Fá mál ollu jafnmiklum titringi á fjóra áratugnum og þetta. Dauðsfallið á Siglufirði grúfði yfir Sveini Ben. alla hans ævi. Enn í dag - tæpum sjötíu árum síðar - stendur fjölskyldu Sveins ekki á sama um þetta mál og hvernig um það er fjallað.

Okkur í Rafheimum vantar Nilfisk-ryksugu (týpuna sem var í laginu eins og öskutunna með stút bæði á hliðinni og á toppnum (fyrir útblástur). Þeir sem eiga slíka maskínu í geymslunni og vilja láta af hendi, vinsamlegast láti vita t.d. í athugasemdakerfinu.

Það er heljarstór gámur nokkrum húsum neðar í Mánagötunni, fullur af steypubrotum og spýtnabraki. Sé að þar hafa menn m.a. lent í að ryðja út forskalaðri eldhúsinnréttingu líkt og þeirri sem ég þurfti að brjóta niður hjá okkur í sumar. Það var ljóta helvítið.

Ræddi við nágranna um framkvæmdirnar og hann upplýsti að sami aðili hafi keypt kjallarann og tvær efri hæðirnar. Hæðunum tveimur verði svo breytt í eina íbúð, þar sem neðri hæðin fari undir stofur og eldhús en sú efri í svefnherbergi og flennistórt bað.

Þetta er ekki fyrsta húsið í Norðurmýrinni norðan Flókagötu sem þetta er gert við. Annað hús neðar í götunni fékk slíka meðhöndlun á dögunum og ég hef séð fleiri dæmi um stórtækar framkvæmdir á fleiri en einni hæð í húsum í hverfinu.

Ætli það megi ekki reikna með að kostnaður við kaup á tveimur hæðum í svona húsi, niðurrif og framkvæmdir liggi ekki nærri 50 milljónum miðað við verðlag í dag. Það er á við dálaglegt einbýlishús í Grafarvoginum. Ætli það hefði ekki þurft að segja mönnum það tvisvar fyrir einhverjum árum að fólk með slík auraráð kysi sér búsetu í Norðurmýrinni…

# # # # # # # # # # # # # #

Luton og Úlfarnir leika í beinni útsendingu á Sky á föstudagskvöldið. Við erum bara alltaf í sjónvarpinu!

# # # # # # # # # # # # # #

Fréttaflutningurinn af heilsu Sharons er orðinn hreinn brandari.

Auðvitað var eðlilegt að fjölmiðlar veltu sér upp úr því þegar karlinn fékk stóra heilablóðfallið - enda maðurinn forsætisráðherra í veigamiklu ríki. Þá strax varð ljóst að hann ætti aldrei aftur kost á endurkomu í pólitík OG ÞAÐ VORU FRÉTTIRNAR. Þegar þær upplýsingar lágu fyrir, áttu menn að hætta að velta sér upp úr ástandi karlsins og spá þess í stað í framhaldinu - mögulegum arftökum.

Það hvort Sharon tórir í viku eða nær einhverjum bata og lifir á hjúkrunarhæli í áratug í viðbót skiptir hins vegar engu máli pólitískt. Ísraelsk stjórnmál eru sem betur fer á hærra plani en Vatíkanið að þessu leyti - að algjör hjarta- og heiladauði er ekki forsenda þess að menn fái að hætta störfum.

Næstu frétt, takk!

Fórum í leikhúsið í gær á einleikinn manntafl. Flott sýning og margir í salnum, þótt auglýst hafi verið að sýningum sé að ljúka. Manntafl er besta smásaga sem ég hef lesið. Þótt mörg ár séu liðin frá því ég renndi í gegnum hana, fannst mér ég muna hana í smáatriðum, eins og ég væri með handritið í kjöltunni. Mæli með Manntafli í Borgarleikhúsinu.

# # # # # # # # # #

Kennslan byrjar í vísindasögunámskeiðinu kl. 16:05 í dag. Við verðum í VR II, stofu 139. Vonandi mæta sem flestir.

Jæja, styttist í leik ársins þar sem Luton tekur á móti Evrópumeisturunum.

Ég mun fylgjast með leiknum á Wembley í Glæsibæ.

Fyrirfram hljótum við að teljast sigurstranglegra liðið, enda ekki tapað í síðustu fjórum heimaleikjum okkar gegn Liverpool (tveir sigrar og tvö jafntefli).

Seinni partinn í dag gekk ég upp Skólavörðustíginn með nokkur hundruð grömm af Inkanjóla innanklæða.

Nei, þetta er ekki byrjunin á glæpasögu og “Inkanjóli” er ekki slanguryrði fyrir kókaín eða önnur fíkniefni. Inkanjóli er kornmeti sem ég keypti til að malla úr graut fyrir barnið. Hann er víst meinhollur, svo maður breytist í Súpermúla við fyrstu skeið.

Í fyrramálið ætti að koma í ljós hvernig grauturinn bragðast - og hvort hann blandast vel saman við gulrótamaukið sem Ólína hakkar í sig flesta daga, með þeir afleiðingum að hún er að verða á litinn eins og Ingólfur Guðbrandsson.

Hélduð þið virkilega að Gettu betur-nörd landsins myndi sleppa því að blogga um dráttinn í 1. umferð GB, bara vegna þess að ég hef látið af dómgæslu? Hahaha… ég verð Össur Skarphéðinsson þessarar keppni í ár (blogga um hana á nóttunni, hugsanlega fullur, með allskyns blammeringum og gífuryrðum).

Það er vænlegt lið sem stendur að keppninni í ár. Drátturinn sætti hins vegar litlum tíðindum.

Keppni Iðnskólans og FG; Akraness og Austur-Skaftafellssýslu; Suðurnesja og Ármúlaskóla & Egilsstaða og Norðfjarðar gætu allar reynst jafnar, önnur úrslit ættu að verða fyrirsjáanleg.

Mér segja kunnugir menn að MR sé með langsterkasta liðið í ár. MH er alltaf sterkt og MA, MK og MS ættu að geta gert vel. Aðrir séu varla líklegir til stórafreka.

Þessor spádómar verða þó augljóslega teknir til endurskoðunar eftir fyrstu umferðina sem hefst annan föstudag. Ég þarf líka að velja skóla til að halda með (onei, MR getur ekki gengið að stuðningi mínum vísum).

# # # # # # # # #

Á morgun (í dag, tæknilega séð) verður framboðslisti VG í kosningunum í Reykjavík borinn upp til samþykktar. Þá lýkur mikilli vinnu okkar í uppstillingarnefndinni. Alltaf gaman að klára verkefni og vonandi mælist framboðslistinn vel fyrir.

Afar athyglisverð grein í Guardian í dag um hið nýja ópíum-stríð Breta í Afganistan. Sérstaklega er þessi klausa meinfýsin:

Eradicating Afghanistan’s poppy crop was assigned to Britain after the 2001 war. Before Clare Short arrived to oversee this task, poppies were grown in just six of the 32 provinces. By the time she finished, the UN recorded production in 28 provinces and a record export value of £2.3bn dollars. It was probably Britain’s most successful agricultural policy of all time.

# # # # # # # #

Styttist í Liverpool-leikinn og frægan sigur minna manna. Það verður ljómandi gaman.

Helvítið hann Benedikt Sigurðsson. Við Steinunn vorum ekki fyrr búin að koma okkur fyrir með kvöldmatinn fyrir framan sjónvarpið, þegar þessi þrjótur birtist á skjánum með langa og grafíska frétt um hringorma í fólki. Jökk.

# # # # # # # # #

Hvernig er það, eru engir háskólanemar að lesa þessa síðu? Þeir hinir sömu ættu alvarlega að íhuga að skrá sig í hvelli í námskeiðið okkar Sverris og Þorsteins, Sögu og heimspeki vísindanna. Lofa skemmtilegu námskeiði.