Um tilgangsleysi allra hluta

Úff, við Framarar vorum rækilega kjöldregnir að Hlíðarenda. Valsmenn eru með hörkulið í ár.

Leikskrá Valsmanna vakti annars sérstaka athygli mína. Hún er átta síður í A5-broti. Þar af fóru tvær síður í auglýsingar, forsíðan í að segja hvaða leikur væri, ein síða í stöðuna í deildinni og tvær síður í að birta leikmannahópa liðanna.

Þá stóðu eftir tvær síður - einu textasíður leikskrárinnar: önnur með ávarpi formanns knattspyrnudeildar - hin með ávarpi umsjónarmanns leikskrár, Framsóknarmannsins Guðjóns Ólafs Jónssonar… með mynd af sjálfsögðu.

Myndi einhver annar en ungur stjórnmálamaður á framabraut skrifa ávarp með ljósmynd í pésa sem inniheldur c.a. eitt A4-blað af eiginlegum texta?

Annars fannst mér Guðjón Ólafur alltaf vera Fylkismaður - og minnti að ég hefði séð hann með Fylkishúfu á vellinum, en það hlýtur að vera misminni hjá mér…

(Leiðrétting, sett inn 1.6. kl. 12:30: Guðjón Ólafur var ekki Fylkismaður - hann var Skagamaður og það gallharður.)