Krítar(póst)kort
Það var ekki bara ruslpóstur sem beið mín á Mánagötunni í gær, heldur tvær bitastæðari sendingar.
Annars vegar var um að ræða Framkvæmdafréttir Vegagerðarinnar, sem innihélt grein sem sýnir fram á að and-hraðakstursauglýsingar virka. Þá voru myndir frá Fáskrúðsfjarðargöngum og gangur Almannaskarðsganga rakinn. Áhugavert.
Hins vegar var póstkort - frá Krít, stimplað fyrir viku. Það var frá spurningaliði Verslunarskólans sem fór þangað í vinningsferð sína. Þeir sögðust hlakka til að hitta mig í keppninni næsta vor.
* * *
Barmmerkjagerðartímabilið er hafið. Sat við yfir sjónvarpinu í gær og þrykkti út SHA-barmmerkjum (klassíska: Ísland úr NATO, herinn burt-merkið). Síðar í vikunni gerum við eitthvað nýtt í tilefni af þingsetningu á föstudaginn. Ég verð illa svikinn ef það verður ekki nokkur mannsöfnuður á Austurvelli þá - af ýmsum tilefnum.
September 28th, 2004 at 12:02
Ha? Var ekki Moggi að segja að þetta virkaði *ekki*? Frétt í blaðinu í dag?
September 28th, 2004 at 12:44
Og ég sem hélt að Coventry myndi rífa dolluna?
September 28th, 2004 at 13:58
Hvað? Geta menn verið langt fram í fertugsaldurinn og verið að keppa í gettu betur?
September 30th, 2004 at 14:16
Það má ekki láta hjá líða að minnast á aðalgreinina í Framkvæmdafréttum - um malbikunarráðstefnu í Ameríku. Útlagning á risaskjá!
Við verðum að drífa okkur í það, að skipuleggja hópferð á næstu ráðstefnu.