Skítaborg Bretlands

Spurning dagsins er einföld. Hversu margir skyldu nú um helgina hafa séð ástæðu til að senda mér þessa frétt, þar sem fram kemur að Luton hafi verið valin skítaborg Bretlands? Möguleikarnir eru:

i) Enginn, hver væri líka svo barnalegur að velta sér upp úr svona frétt?

ii) 1-3, alltaf einhverjir sem hafa gaman af svona hlutum.

iii) Allir og litli, ljóti frændi þeirra.

Rökin sem tiltekin eru fyrir valinu á Luton eru margþætt. Í hugum fólks er Luton einn stór flugvöllur (margt til í því). Arkitektúrinn í borginni er með ólíkindum ljótur, enda miðbærinn að miklu leyti frá um 1960. Atvinnuleysi er mikið, enda Bedford-verksmiðjurnar stöðugt að draga saman seglin. Þá er nálægðin við London slík að þjónustustigið í borginni er lágt.

Líklegri skýring á því hvers vegna Luton stökk skyndilega upp í efsta sætið á listanum (Hull var í efsta sæti í fyrra), tengist því að í Luton er eitt stærsta samfélag Asíubúa á Bretlandseyjum. Múslimar eru gríðarlega margir, einkum frá Pakistan. Það varð mikið fréttaefni þegar hópur ungra manna frá Luton hélt í austurveg og sagðist ætla að “ganga til liðs við talibana”. Í seinni tíð eru stuðnginsmenn annarra fótboltaliða farnir að gera sér að leik að kalla Luton – “Kabúl Bretlandseyja” og annað slíkt. Það er því nokkur rasistalykt af þessu vali.

Listinn er reyndar skringilegur og undarlegt að sjá Glasgow og Edinborg í efstu sætum. Held að fáir þeir sem til Edinborgar hafa komið myndu skrifa upp á að það sé eitthvert versta skítapleis í Bretlandi.

Íbúar í Luton eru þó harla rólegir yfir þessu öllu. Þeir viðurkenna fúslega að Luton sé skítaborg, en staðhæfa að það séu margir verri staðir til. Þá er ekki loku fyrir það skotið að titillinn verði til þess að íbúarnir og borgaryfirvöld taki sig á og rífi staðinn upp. Það gerðist í Hull, sem keppist við að sverja af sér skítaplássstimpilinn. Nú síðast tilkynnti borgarstjórnin í Hull um áætlanir sínar að gera Hull að hommahöfuðborg Evrópu – þar sem skemmtistaðir samkynhneigðra yrðu á hverju horni. Það er víst helling upp úr slíkum túrisma að hafa.

* * *

Í morgun fékk ég skringilegt símtal. Í mig hringdi kona sem vildi fá skýrslu um reynslu mína af Hótel Löven í Kaupmannahöfn. Um það mátti lesa í ferðasögunni miklu á sínum tíma. Hótel Ljón er eitt allra ódýrasta hótel í Kaupmannahöfn. Með það í huga, ætti maður bara að vera þakklátur fyrir að fá rúm og sturtu og fyrir að þurfa ekki að klofa yfir sprautufíkla á leiðinni út.

Íslendingar eru hins vegar svo heimtufrekir, að þeir ganga af göflunum þegar ódýra hótelherbergið reynist hvorki hafa sjónvarp með 100 rásum, míníbar eða fjórréttaðan morgunmat.

* * *

Sjoppukeppnin stendur enn. Staðan:

Staðarskáli 17 : Baula 11

8 Responses to “Skítaborg Bretlands”

  1. Erna E. Says:

    Staðarskáli.

  2. Óli Gneisti Says:

    Löven var fínt nema að við vorum á fimmtu hæð, það var svoltið slæmt eftir að hafa verið að ganga allann daginn að enda það með því að klifra upp þessa stiga. Síðan var reyndar verið að gera upp hótelið þegar við vorum þar sem skapaði óþarfa hávaða.

  3. Smiths Says:

    Baulan, Kibbarborgarar og bolti góð blanda !!

  4. Eygló Says:

    Löven er sko gott hótel…ef þú ert að leita að “Ég er fátækur námsmaður”-fílingnum :)

  5. Kúrbíturinn Says:

    Kúrbíturinn vill koma því á framfæri að hann dvaldi í Luton um vikutíma, hefur ekkert slæmt um hana að segja og líkaði bara nokkuð vel þar.

    Það hljóta að vera verri borgi en Luton á Bretlandseyjum…

  6. Steini Says:

    Staðarskáli

    Annars er Edinborg auðvitað þekkt fyrir að vera eitt mesta dópbæli Bretlandseyja þannig að valið er kanski ekkert svo skrítið.

  7. Kornelíus Says:

    Það hafa eflaust verið einhverjir watford rasistar á bakvið þetta val

  8. Kári P. Ólafsson Says:

    Löven er ágætis staður.

    Verst að það er við hliðina á kirkju, sem væri kannski ekki svo slæmt ef Danir hefðu ekki þessa áráttu að þurfa að hringja bjöllunum eldsnemma á hverjum einasta morgni.

    K.