«
»

Pixies

I’ve kissed mermaids, rode the el nino
walked the sand with the crustaceans
could find my way to mariana
on a wave of mutilation …

Var eins og krakki í dótabúð á Pixies-tónleikunum. Hæstánægður með þetta allt saman. Höfðum vit á að mæta snemma og fengum góðan stað.

Frank Black er feitari en nokkru sinni fyrr. Syngur samt eins og kórdrengur á köflum. Kim Deal er langflottust. Mér finnst að það ættu að vera reglur sem segðu að allar konur sem spila á bassa í rokkhljómsveitum eigi að kveikja sér í sígarettu a.m.k. tvisvar á hverjum tónleikum.

Ghostdigital var ekki alveg að gefa sig í upphituninni, þrátt fyrir skemmtilega spretti. Þegar ég frétti að Einar Örn hefði sett son sinn kornungan í sveitina hélt ég að það væru stælar. Í ljós kom að bandið er best þegar sá stutti þenur trompetinn (hvort talar fólk almennt um trompet í kk. eða hk.?) – Hann varð feimnari eftir því sem á leið og lögin döluðu.

* * *

Úff, gott að hafa misst af tapinu á Laugardalsvelli. Það var víst ljótt að horfa á.

This entry was posted on Wednesday, May 26th, 2004 at 09:17 and is filed under Uncategorized. You can follow any responses to this entry through the RSS 2.0 feed. Both comments and pings are currently closed.

12 Responses to “Pixies”

  1. Jóhanna Says:
    May 26th, 2004 at 09:38

    Ég hef aldrei heyrt talað um tompet í hk. Það er bara eins og e-ð alveg óskiljanlegt.

  2. pallih Says:
    May 26th, 2004 at 12:46

    Ég hef aldrei heyrt talað um tompet.

  3. Sigga Sif Says:
    May 26th, 2004 at 12:58

    Ég myndi tala um trompet í hvorugkyni. Og ég hef verið í tónmenntaskólanum. Það hlýtur að gefa mér eitthvað átorítet. ;-)

  4. Erna E. Says:
    May 26th, 2004 at 13:00

    Ég nota karlkyn – hef líka verið í tónlistarskóla.

    En hvort tveggja má.

  5. Finnbogi Says:
    May 26th, 2004 at 14:25

    Trompetinn er annað tveggja blásturshljóðfæra sem lendir stundum í hvorugkyni að ósekju. Hitt er náttúrulega klarinettan.

    Ég hef reyndar aldrei skilið hvernig fólk fær sig til að blása í hvorugkynshljóðfæri. Fagott er samt kúl.

  6. Pulla Says:
    May 26th, 2004 at 16:46

    En af hverju ekki kvenkyn? Trompettan?

  7. Björg Says:
    May 26th, 2004 at 17:21

    Skv. orðabók háskólans er trompet kk. en hef mjög oft heyrt, og örugglega notað sjálf, í hvk.

  8. hildigunnur Says:
    May 26th, 2004 at 22:20

    best að forðast bara að tala um trompet og klarinett með ákveðnum greini ;-)

    annars segi ég trompetinn og mig hefur lengi langað til að kunna á það fyrirbæri.

  9. Jónas Ingi Says:
    May 27th, 2004 at 02:52

    Best er auðvitað að tala bara ekkert um trompet. Í neyð má kalla þetta fyrirbæri lúður. Það ætti ekki að fara á milli mála hvers kyns er.

  10. Finnbogi Says:
    May 27th, 2004 at 14:54

    Á tónleikum um daginn rak ég augun í orðið trómett (kk.) í íslenskri þýðingu textans Tuba mirum (auðvitað er skandall að þýða tuba sem trompet þar sem Dómsdagslúðurinn sjálfur hlýtur að vera alvöru túba og ekkert annað!). Ég minnist þess hvorki að hafa séð þetta orð fyrr né síðar, en mig grunar að það sé ættað úr smiðju Reynis Axelssonar – alla vega á hann nokkur frumleg orð í svipuðum stíl í Ensk-íslensku stærðfræðiorðaskránni…

  11. drekinn Says:
    May 28th, 2004 at 18:04

    Best væri auðvitað bara að vera ekkert að kalla þetta trompett þar sem hann spilar á kornett.

  12. Halla Says:
    May 31st, 2004 at 17:47

    Ég lærði á kornett í mörg ár og síðar á trompet. Það er eins meil og það getur orðið.