Um tilgangsleysi allra hluta

Ekki hafði ég mikla skoðun á því hver ætti að verða næsti Þjóðleikhússtjóri, en nú er valið einfalt - Júlíus Vífill er minn maður.

Einu sinni kom hann í heimsókn á safnið og var viðræðugóður. Í morgun flautaði hann svo á mig á gatnamótum Lönguhlíðar og Miklubrautar og benti mér á að annað framdekkið væri gjörsamlega flatt.

Ég efast um að aðrir leikhússtjórar eða leikhússtjóraefni hefðu brugðist svona drengilega við. Stefán Baldursson hefði örugglega hlegið með sjálfum sér og látið mig aka á felgunni. Þórhildur Þorleifsdóttir hefði jafnvel rekið naglann í dekkið sjálf…

Júlíus Vífill fær mitt atkvæði. Verst að það séu ekki almennar kosningar um svona embætti á Íslandi.

* * *

Samti við Gísla í GG lögnum um að leggja klóak og dren. Framkvæmdir hefjast á miðvikudag. Mikið er ég feginn að vera laus við þetta helvíti.

Leigjandinn ætlar greinilega að skila lyklunum í áföngum. Í gær skildi hann eftir annan húslykilinn. Þá eru eftir: hinn lykillinn, bílskýlislykill, bílskúrshurðaropnarinn, geymslulykill og póstkassalykill. Með þessu áframhaldi verður hann búinn að skila af sér með vorinu…

* * *

Þór Akureyri gaf bikarleikinn sinn í handboltanum gegn Eyjamönnum. Það er ennþá september og þeir eru farnir að gefa leiki vegna kostnaðar við ferðalög. Það er ekki séns að Þórsarar haldi út mótið. Hætta líklega fyrir jól og fokka enn frekar upp óskiljanlegu keppnisfyrirkomulagi HSÍ. Ef HSÍ skiptir ekki aftur í tvær deildir mun liðum sem spila handbolta af einhverri alvöru fækka um eitt á ári hér eftir…

* * *

Sverrir var fínn á Stöð 2 í gær að ræða Laxness-bréfin. Óskaplega var Steinunn Sigurðar þó stressuð. Fyndið að Múrverjar hafi lent í því hlutverki að verja Hannes Hólmestein, en ef menn ætla að vera samkvæmir sjálfum sér lenda menn oft í því að verja fólk sem maður… - tja, á fátt sameiginlegt með.

* * *

Tæp vika í að Luton verði í beinni á Sky. Mánudagskvöldið 6. okt. hefur verið tekið frá fyrir lifandis löngu. Nú mega sportbarirnir skila inn tilboðum í verð á drykkjarföngum…

Spurt er:

Hvað eiga knattspyrnuliðin Wrexham, Mónakó og Berwick sameiginlegt?

Svör berist í athugasemdakerfið að neðan.

Besti og frægasti bloggarinn gæti endurholdgast sem klóakrotta á morgun og plumað sig ágætlega. Svo mikið veit ég nú um klóaklagnir, safnbrunna og niðurfallsstúta, eftir óteljandi símtöl við iðnaðarmenn, aðra íbúa Mánagötunnar og tæknifræðinginn Tobba frænda. Síðdegis ætla ég svo að reyna að stefna öllum þessum hópi saman þar sem endanleg ákvörðun verður tekin í málinu. Hætt hefur verið við að brjóta upp öll gólf í kjallaranum, en garðurinn verður grafinn upp. Blessuð sé minning rabbabarans.

* * *

Leigjandinn minn fyrrverandi hefur loksins rutt íbúðina (að ísskápnum einum frátöldum). Hugmyndir hans um hvað teljist snyrtilegur frágangur eru allsérstæðar. Fyrir vikið lendum við pabbi í þrifum á þriðjudag - sem stuðlar.

Um leið og búið verður að sótthreinsa klósettið og strjúka yfir gólfin mun besti bloggarinn finna fasteignasölu. Enn er tekið við uppástungum um góða og heiðvirða menn í þeim bransa. - Mikið verður það skemmtilegt að byrja að sýna húsnæðið lon og don, fólki sem eflaust er bara að skoða hús til að drepa tímann og hnýsast.

* * *

Ég reyni að blogga ekki um pólitík, enda hef ég aðgang að öðrum og betri vettvangi til slíkra hluta. Get samt ekki stillt mig um að pirrast yfir Tony Blair.

Hann fór í viðtal um helgina, meðal annars til að svara kröfum um að hann segði af sér og hleypti öðrum að. En Blair ætlar ekki að hætta. Og hvers vegna? Vegna þess að hann telji svo mörgum verkum ólokið? Vegna þess að hann vilji ekki hætta fyrr en einhver tiltekin mál séu í höfn? - Nei, hann segist ætla að sitja lengur en Thatcher.

Hvers vegna fór maðurinn ekki í íþróttir frekar en pólitík?

* * *

“Hver ert þú, strákur litli?” spurði Karlinn í tunglinu.
“Ég er Stúfur, sem aldrei borðar graut, af því að hann er versti matur í heimi”, sagði Stúfur.

Í gær virðist ég hafa álpast inn í tímavél sem flutti mig aftur til ársins 1999. Það var tíminn þar sem ég fór á Næsta bar hverja einustu helgi, oft bæði kvöldin, sat of lengi, drakk of mikið, greip kebab á leiðinni heim og át fyrir svefninn. Vaknaði þunnur og var tuskulegur fram eftir degi.

Svona liðu allar helgar. Oftast fannst mér gaman, enda var aldrei skortur á skemmtilegu fólki á NB.

Gærkvöldið var fullkomið afturhvarf. Nokkrir bjórar í heimahúsi, svo rokið í bæinn og setið fram að lokun. En þetta var ekki eins. Einhvern veginn langaði mig ekkert að hanga þarna, staðurinn var yfirþyrmandi, bjórinn fór illa í mig og reykingarlyktin var pirrandi.

Fyrir fjórum árum hefði þetta verið fín uppskrift að laugardagskvöldi, en núna virkaði það bara alls ekki. Í dag gæti ég ekki hugsað mér að detta aftur inn í þessa gömlu rútínu.

* * *

Píparinn mætti í morgun með tilboð í klóakframkvæmdirnar og nýja drenlögn. Það er ekki gefið. Verst er að eftir nokkrar vikur á ég eftir að standa mig að því að benda gestum á nýju drenlögnina mína fullur stolts!

* * *

Luton kjöldregið gegn Oldham & Hearts með jafntefli á útivelli gegn Motherwell. Ekki gott.

Spurt er um mann:

Maðurinn er mikill áhugamaður um heimspeki, þótt hann sé kunnari fyrir störf á öðrum sviðum. Aðspurður um það hvort hann hafi lesið mörg heimspekirit svarar hann - “Ég las ekki. Ég lifði! Menn fræðast ekki um þessa hluti af bókum. Það er lífið sjálft sem kennir manni þá. - Ég hef lesið mikið af speki Sókratesar á síðu 3 í The Sun.”

Hver er maðurinn?

Í gær uppgötvaði ég að ég væri með lausa skrúfu… í gleraugunum mínum. Fór þess vegna í Linsuna í Aðalstræti og lét laga þau. Það gekk skjótt og örugglega. Ég versla alltaf við Linsuna enda konan sem rekur þá verslun mikill snillingur og þjónustan góð. Hvers vegna er ég að segja þetta? Tja, mig langaði bara til að mæla með Linsunni.

Deiglan birtir í dag pistil um að eldhúsið í nýju höfuðstöðvum Orkuveitunnar sé beint fyrir neðan innganginn og að þess vegna fyllist þar allt af matarlykt. Þetta er væntanlega stórskandall og enn ein sönnun þess að vinstrimenn eigi ekki að stjórna borginni að mati Deiglumanna. Hið rétta í málinu er að matsalurinn er ekki fjarri innganginum (ekki eldhúsið). Maturinn hans Magga kokks er góður, samt borða ég mjög sjaldan í mötuneytinu. Það er alveg óþarfi að koma maganum og nýrunum upp á að lifa á öðru en svörtu kaffi á daginn.

Luton féll út úr deildarbikarnum á þriðjudagskvöldið. Tapaði í vítakeppni gegn Charlton á útivelli eftir 4-4 jafntefli. Sannarlega frækileg frammistaða.

Fyrrverandi leigjandinn minn er enn ekki búinn að rýma íbúðina. Hún er nú 90% tóm, en t.d. megnið af fötunum hans er enn í svefnherberginu og slatti af leirtaui í eldhúsinu. Er alvarlega að hugsa um að gefa Hjálpræðishernum allt draslið ef hann verður ekki búinn að fjarlægja þetta á morgun. - Vantar einhvern hnífapör og diska?

Fyrr í dag komst ég að því að yfirmaður minn les ekki minnisblöðin sem ég set saman fyrir hann. Það er óstuð.

Hearts unnu Evrópuleikinn sinn í gær. Það var fyrsti Evrópuleikur þeirra í þrjú ár, en ég sá einmitt þann síðasta - gegn Stuttgart - tveimur dögum eftir að ég kom til Edinborgar. Craig Levein er hetja og snillingur eins og áður hefur komið fram.

Klóakmálin á Mánagötunni eru enn í skralli. Aumingja Sonja í kjallaranum býr við klóakstybbu og rottugang. Vonandi styttist þó í að við fáum lausn okkar mála.

Jamm.

Auðvitað var Kalli klunni annað heiti á Rasmus klumpi.

Hins vegar er ekki verið að spyrja um Híavata, þann fúla Disney-karakter. Rifjum upp spurninguna sem vefst svo mjög fyrir mönnum:

7. Teiknimyndasagan um indíánafjölskyldu í Ameríku og kjánaleg uppátæki hennar varð langlíf í íslesnkum dagblöðum. Hún birtist undir tveimur nöfnum - hverjum?
Við þetta má bæta að nöfnin tvö eru hvort um sig heiti aðalpersóna sögunnar.

Til að færa lesendur enn nær svarinu, þá skal upplýst að persónurnar tvær sem báðar hafa gefið sögunum nafn sitt eru annars vegar indíánahöfðingi sem á í útistöðum við eiginkonu sína og hins vegar heimskur tengdasonur hans.

Núna hlýtur þetta að fara að koma!

“Gollum” hittir naglann á höfuðið. Aggi var vissulega íslenska þýðingin á The Archies, sögum sem höfðu lítil áhrif hérlendis en mörkuðu djúp spor í bandaríska skrípó-heiminn.

Framkomnar ágiskanir varðandi síðustu tvö atriðin eru hins vegar rangar. Rifjum þessar spurningar nú upp ásamt aukavísbendingum:

1. Einhverjar fyrstu teiknimyndasögurnar sem birtust í Þjóðviljanum voru um “Kalla klunna”. Undir hvaða nafni er sú persóna betur þekkt í dag?
Við þessa spurningu má bæta að Kalli klunni á vin sem er mörgæs.

7. Teiknimyndasagan um indíánafjölskyldu í Ameríku og kjánaleg uppátæki hennar varð langlíf í íslesnkum dagblöðum. Hún birtist undir tveimur nöfnum - hverjum?
Við þetta má bæta að nöfnin tvö eru hvort um sig heiti aðalpersóna sögunnar.

Svör eru byrjuð að berast í þungu teiknimyndasögugetrauninni og stigin farin að raðast á menn. Þau atriði sem rétt svör hafa borist við eru skáletruð:

1. Einhverjar fyrstu teiknimyndasögurnar sem birtust í Þjóðviljanum voru um “Kalla klunna”. Undir hvaða nafni er sú persóna betur þekkt í dag?

2. Hvað hétu knattspyrnuteiknimyndasögurnar sem birtust í Vísi og síðar DV?
Rétt svar: Bommi Björn Friðgeir fær 2 stig.

3. Frægar erlendar teiknimyndasögur birtust um skeið í íslensku blaði undir heitinu “Aggi” - hvað nefndust þær á frummálinu?

4. Hversu mörg börn eiga Lísa og Láki í samnefndum teiknimyndasögum?
Rétt svar: fjögur börn Snæbjörn fær tvö stig.

5. Hvað nefndist sjóræninginn með leppinn í langlífri teiknimyndaræmu í Vísi og síðar DV?
Rétt svar: Krulli Snæbjörn fær tvö stig.

6. Á lokaskeiði Vísis birti blaðið framhaldsteiknimyndasögu sem birtist vikulega upp á eina síðu í hvert skipti. Í sögunni var fylgst með lífi og störfum einnar fjölskyldu, hvað nefndist hún?
Rétt svar: Dallas Snæbjörn fær tvö stig.

7. Teiknimyndasagan um indíánafjölskyldu í Ameríku og kjánaleg uppátæki hennar varð langlíf í íslesnkum dagblöðum. Hún birtist undir tveimur nöfnum - hverjum?

8. Í fyrstu blöðum DV voru þrjár teiknimyndasögur sem voru einungis einn myndarammi hver. Hverjar voru þær?
Rétt svar: Bella, Lísa og Láki & Vesalings Emma Snæbjörn fær tvö stig.

… og svuntuþeysir er að sjálfsögðu synthesizer.

Jæja gott fólk. Þá er komið að þungu teiknimyndasögugetrauninni. Gefin verða stig eftir geðþótta fyrir þá sem ná að svara rétt, skemmtilega eða skjóta inn besserwissum. Spurt er út úr teiknimyndasögum í dagblöðum fyrr á árum. Svör berist í athugasemdakerfið hér að neðan. Ekki er nauðsynlegt að svara öllum spurningunum eða senda öll svörin inn í einu. Að jafnaði fær einungis fyrsti sendandi stig og færri stig fást fyrir að giska margsinnis.

1. Einhverjar fyrstu teiknimyndasögurnar sem birtust í Þjóðviljanum voru um “Kalla klunna”. Undir hvaða nafni er sú persóna betur þekkt í dag?

2. Hvað hétu knattspyrnuteiknimyndasögurnar sem birtust í Vísi og síðar DV?

3. Frægar erlendar teiknimyndasögur birtust um skeið í íslensku blaði undir heitinu “Aggi” - hvað nefndust þær á frummálinu?

4. Hversu mörg börn eiga Lísa og Láki í samnefndum teiknimyndasögum?

5. Hvað nefndist sjóræninginn með leppinn í langlífri teiknimyndaræmu í Vísi og síðar DV?

6. Á lokaskeiði Vísis birti blaðið framhaldsteiknimyndasögu sem birtist vikulega upp á eina síðu í hvert skipti. Í sögunni var fylgst með lífi og störfum einnar fjölskyldu, hvað nefndist hún?

7. Teiknimyndasagan um indíánafjölskyldu í Ameríku og kjánaleg uppátæki hennar varð langlíf í íslesnkum dagblöðum. Hún birtist undir tveimur nöfnum - hverjum?

8. Í fyrstu blöðum DV voru þrjár teiknimyndasögur sem voru einungis einn myndarammi hver. Hverjar voru þær?

Og giskiði nú…

* * *

Misheppnaða nýyrði dagsins:

Árið 1981 var orðið “Svuntuþeysir” kynnt til sögunnar. Hvað skyldi það hafa átt að merkja?