Um tilgangsleysi allra hluta

Gula ógeðið…

…skín inn um gluggann á skrifstofunni minni og gerir mér ífið leitt. Væri hægt að banna gott veður á Íslandi nema eftir vinnu og um helgar? - Annars grunar mig að þetta sé fyrst og fremst gluggaveður.

* * *

Úrslitin í gær voru hræðileg! Ef ekki hefði komið fyrir Birki Kristinsson, þá hefði Fram unnið létt. En því var ekki að skipta - því miður.

Það gleðilegasta við leikinn var líklega að afi lét sig hafa það að mæta. Djöfuls kraftur er alltaf í gamla manninum að djöflast á alla leiki með Frömurunum. Ég ætla að verða aldraður æringi á öllum fótboltaleikjum eins og afi þegar fram líða stundir.

* * *

Vinnan við erindið mitt á Söguþinginu hans Sverris gengur bærilega. Vandamálið er hins vegar að ég þarf að reyna að stytta þetta aðeins. Það er alltaf erfiðast að stytta! - Næst þarf ég að hafa áhyggjur af ræðunni minni á þingveislu Söguþingsins á laugardag. - Ég hata tækifærisræður! Af hverju læt ég alltaf pata mig til að halda þær???

* * *

Steinunn var í fríi í vinnunni í dag. Ekki er að sjá að hún hafi notað tækifærið til að blogga eins og hún þó lofaði á áðan! Hún sér svo sem fram á náðuga tíma í júní. Fyrst er Söguþingið, svo HM með stöku íslenskum fótboltaleik inn á milli.

Í hvaða nám á ég að senda stelpuna í Háskólanum? Skráningin hlýtur bráðum að fara að byrja og henni dettur bara ekkert í hug! Sendið uppástungur á skuggabaldur@hotmail.com

* * *

Oft hefur stúdentapólitíkin verið á lágu plani, en ég held að nýjasta útspilið sé botninn. Núna er önnur hreyfingin farin að slá upp einhverjum bloggpistli eftir stelpu af hinum listanum. Er ekki alveg eins gott að fara bara að hætta þessu frekar en að eyða tímanum í að rífast um svona vitleysu?

* * *

Jæja, best að fara að tygja sig. Einkum ef maður ákveður að skella sér í krikket í kvöld ásamt góðum mönnum.

Rás tvö á áðan…

Stuna! Í gær vann ég í erindi mínu á Söguþinginu lengst fram eftir kvöldi og var því pínulítið lemstraður í morgun. Það var því sérstaklega gleðilegt að uppgötva í bílnum á leiðinni í vinnuna að Viðar (sem ég fæst aldrei til að kalla “Köttinn”), Óli Njáll og Sigga bleika væru í viðtali á Rás tvö að tala um blogg.

Ég var raunar búinn að benda Svenna Guðmars á Dægurmálaútvarpinu á það fyrir nokkru síðan að bloggið væri gott efni í viðtal. Ég hvatti hann til að ræða við Björgvin Inga, en hann hefur væntanlega vísað því frá sér - enda hættur að blogga í bili.

Nema hvað. Óli Njáll, Viðar og Sigga eru öll í hópi þeirra bloggara sem ég les reglulega og því kærkomið að heyra talað við þau en ekki “the usual suspects”. - Sorrý, ég bara næ því ekki hvers vegna t.d. Katrín Atladóttir á að vera einhver goðsögn í bloggheimum.

Viðtalið var bara fínt og dró upp heiðarlega mynd af þeim Gettu betur-nördum sem þau þremenningarnir vissulega eru. Svo var líka fyndið að heyra þáttarstjórnendur og Viðar taka undir það hvert með öðru að vinstrimenn væru duglegri að blogga en hægrimenn. - Ég leyfi mér að draga þau fræði í efa.

* * *

Rétt að öðrum málum. Í kvöld keppa Framarar við Eyjamenn. Við verðum-verðum-verðum-verðum að vinna! (Eða a.m.k. að ná enn einu jafnteflinu.) Verður Gústi Gylfa með? Ef ekki, þá er útlitið svart. Miðjan er hreinlega ekki nógu sterk án hans. Þó svo að Freyr Karlsson sé ljúfur drengur og foreldrar hans hið besta fólk sem mætir á alla leiki - þá er hann ekki jafn öflugur og Gústi. Við þurfum einhvern sem getur tekið hornspyrnur og aukaspyrnur. Föstu leikatriðin voru í molum í Grindavíkinni á laugardag.

Úr herbúðum Safamýrarstórveldisins - handboltadeild - berast nú þær fregnir að Héðinn Gilsson verði bláklæddur næsta vetur. Þá er eins gott að hann komi sér í betra form maðurinn. - Framarar geta búið sig undir allnokkur tvígrip, ruðning og skref…

Öll þessi Fram-umræða minnir mig á að nú verð ég að fara að heimsækja afa. Blessaður karlinn er enn ekki orðinn almennilega rólfær eftir sýkinguna á dögunum. Hann kemst ekki á völlinn í bráð og helvítin á Sýn hættu við að sjónvarpa leiknum í kvöld og ætla í staðinn að sýna Derby-leik nýliðanna tveggja frá Drullueyri. - Urg!

Dagbók kosningadagsins…

Vá, það er gott að svona dagar komi ekki nema á nokkurra ára fresti.

Kosningadagurinn hófst á því að við Valur húsfélagsformaður renndum við í Hagaskólanum til að kjósa. Því næst var stefnan tekin til Grindavíkur. Á leiðinni furðuðum við okkur á því hvað veðrið væri gott - hvort að það gæti virkilega verið að við fengjum logn í Grindavík? En um leið og fram hjá fjallinu Þorbirni var komið, rann upp fyrir okkur að sú yrði ekki raunin. Það er alltaf rok í Grindavík!

En svo allrar sanngirni sé gætt, þá var veðrið ekki alslæmt. Vindurinn var hlýr og það rigndi hvorki né var völlurinn blautur. Það væri synd að segja að leikurinn hafi verið fjörugur, en Framararnir börðust og tókst að koma til baka eftir að hafa lent undir. Nú eru tvö stig komin í hús í jafnmörgum leikjum - og þeim báðum á útivelli suður með sjó. Þetta verður vissulega erfitt tímabil, en það er rosalega margt jákvætt í gangi. T.d. er Bjarni Hólm, nýji strákurinn í vörninni frá Seyðisfirði, helvíti efnilegur. Sterkur pjakkur sem getur lumbrað á hverjum sem er. - Við verðum að vinna Vestmannaeyjar á þriðjudaginn. Það skiptir einfaldlega öllu máli fryrir framhaldið!

* * *

Eftir leikinn lagði ég mig til að hlaða batteríin fyrir kvöldið. Það fór ekki betur en svo að ég svaf yfir mig og þurfti að spæna af stað í búðina og svo til Palla og Hildar í grillið. Kom fyrir vikið inn í mitt Júróvísíón. Ekki gat ég haft miklar skoðanir á þessum lögum, en það er samt alltaf stuð að horfa á stigatalninguna. - Það dró líka dálítið úr fjörinu að geta ekki verið að lepja bjór á meðan á þessu stóð. Ég var nefnilega búinn að lofa mér í umræður í kosningasjónvarpinu hjá RÚV um nóttina og ekki mætir maður þangað á sneplunum.

* * *

Svo fóru tölurnar að detta inn úr sveitum landsins. Úrslitin í Reykjavík voru fín - en eiginlega voru allar skoðanakannanirnar búnar að taka fúttið úr þessu. Komm on! Það var augljóst í margar vikur að borgin ynnist.

Útkoman víða annars staðar á landinu var ekki alveg nógu góð. T.d. var Huginn dálítið langt niðri vegna Hafnarfjarðarins, þar sem hann var kosningastjóri, þegar hann mætti til Palla síðar um nóttina. Hann þarf þó ekki að kenna sjálfum sér um þessar niðurstöður. VG stendur ekki nægilega styrkum fótum í Friðinum, Samfylkingin er með fullt af fínu fólki á sínum lista og Lúðvík Geirssson viðurkenndi það meira að segja þarna um kvöldið að fjöldi kjósenda Samfó væri í raun stuðningsmenn VG sem söðlað hafi um til að fella íhaldið.

* * *

Um miðnættið fór ég upp í Útvarpshús og lét mér leiðast þar fram yfir kl. 2. Í umræðunum var ég ásamt Guðjóni Ólafi Framsóknarmanni og Sigurði Kára frá Sjálfstæðisflokknum. Síðar bættist við Ragnheiður Ríkharðsdóttir, sigurvegari kosninganna í Mosfellsbæ. Ragnheiður er Framari eins og við Siggi Kári. - Það er það sem mér þykir verst við Safamýrarstórveldið - hvar þar eru margir Sjálfstæðismenn í stuðningsmannaliðinu. (Eða öllu heldur, hversu hátt hlutfall þeirra er.)

* * *

Ég komst ekki aftur í partýið til Palla fyrr en eftir dúk og disk. Þá var Ármann á bak og burt, en Stefán Jónsson, Óli Njáll, Huginn og Dagný, Þór og Helga, Palli og Hildur og Steinunn öll búin að skvetta rækilega í sig.

Kúrsinn var tekinn á 22 - þar sem fréttist að Ólafur F. Magnússon væri endanlega kominn inn í borgarstjórnina. Það eru merkileg úrslit!

* * *

Á 22 rakst ég fljótlega á Lilju Dögg Alfreðsdóttur, gamla skólasystur úr MR. Hún fór að rífast við mig um pólitík og var mikið niðri fyrir. Rifrildið, sem einkum snerist um alþjóðavæðinguna, þróaðist nokkuð sérkennilega og var orðið drepleiðinlegt síðasta hálftímann. Þessu næst svifu á mig þeir Gestur Páll Reynisson og Kolbeinn H. Stefánsson - eðalkratar sem eru skúffaðir yfir því hvað Samfylkingin sé ömurlegur flokkur. Ég hef farið svo oft í gegnum þessa umræðu með Kolla að ég gæti gert það í svefni. - Alltaf enda samtölin svo á því að hann barmar sér yfir því að hafa misst okkur Múrverja yfir í VG en sitji svo eftir með Birtingar-arminn úr Abl.

* * *

Klukkan var líklega orðin hálf sex þegar við Steinunn ákváðum að yfirgefa 22. Það hefði ekki mátt seinna vera, því Steinunn var í þá mund að fara að kýla einhvern dreng sem hún hafði farið að rífast við um stöðu láglaunahópa. - Inn í þá umræðu blandaðist svo téð Lilja Dögg, en rök hennar í málinu voru eitthvað á þessa leið: “Það er verra að vera fátækur í Súdan en á Íslandi. Þess vegna mega Íslendingar ekki kvarta yfir einu eða neinu - eða krefjast neinna umbóta heima fyrir.” - Pottþétt rök!

Það tók óratíma að komast í gegnum miðbæinn. Stöðugt var eitthvað fólk að svífa á mig ig vildi fara að ræða um NATO. Ótrúlegt hvað margir virðast hafa séð þessi sjónvarpsviðtöl um daginn… - Það var sem sagt ekki skriðið upp í rúm fyrr en á sjöunda tímanum. Ég er ekki átján ára lengur. Ég er orðinn of gamall fyrir þetta helvíti.

Metúsalem og Pikkarónarnir…

Ekki nennti ég að horfa á kosningaþátt Egils Helgasonar í gær, enda fórum við Steinunn í kaffiboð til Aðalsteins og Salnýjar í staðinn. Maður varð nú pínulítið skúffaður að hafa misst af öllu fjörinu eftir að forsíða Fréttablaðsins upplýsti að Metúsalem og Ástþór Magnússon hafi reynt að storma inn í stúdíóið til að taka yfir útsendinguna.

Ég fjalla raunar aðeins um málstað Húmanista í grein dagsins á Múrnum. Ég vorkenni þeim dálítið, þeir komast nánast ekkert að í fjölmiðlum og það tel ég vera hættulegt fyrir lýðræðið.

En er það góð taktík að storma inn í stúdíó til að mótmæla? Tja, hvers vegna ekki. - Nú eru fá mótmæli Íslandssögunnar frægari en þegar hópur róttæklinga ruddist inn í útsendingu Kanasjónvarpsins á sínum tíma og braukuðu og brömluðu.

Í öllum uppreisnum, eru höfuðstöðvar sjónvarpsstöðva í hópi mikilvægustu staðanna - bæði til að verja og hertaka. Muna menn ekki eftir átökunum um sjónvarpsturninn í Vilnius? - Og í Outbreak var Dustin Hoffmann aðaltöffarinn þegar hann ruddist inn í sjónvarpsstöðina til að tilkynna um sjúkdóminn.

Hver er mórallinn með þessu? - Jú, það að ryðjast inn í sjónvarpsstúdíó er töff. - Það að reyna að ryðjast inn í sjónvarpsstúdíó en vera stökkt á flótta af sminkunni, það er ekki töff.

Jamm.

Pirringur…

Jæja, þá er síðdegispirringurinn kominn yfir mann. Ég hef litlu komið í verk eftir hádegi, ef undan eru skilin 2-3 símtöl varðandi netmál fyrirtækisins og safnsins - sem eru alltaf sama hassið.

Það er ekki til að bæta skapið að hlusta á Útvarp Sögu þegar maður er í svona skapi. Þar gasprar Hallgrímur Thorsteinsson linnulítið og mér tekst nánast alltaf að vera ósammál honum. - Nú væri það svo sem í lagi, ef maðurinn vissi aðeins hvað hann er að tala um. Núna á áðan var hann að ræða við Þorvald Gylfason um efnahagsmál og ESB. Þorvaldur fór að tala um NATO og þá byrjaði sama platan hjá Hallgrími og maður hefur heyrt hann spila í hverjum þættinum á fætur öðrum. Í hvert einasta sinn slær h******* maðurinn saman aðildarsamningnum að NATO og varnarsamningnum við Bandaríkin. - Þetta er örugglega í fjórða skiptið sem ég heyri manninn rugla þessum samningum saman. Urgh!

Jæja, þetta gengur ekki lengur best að koma sér heim. - Ekki verður mikið étið á Hringbrautinni í kvöld,… sérstaklega eftir að ég samþykkti að kaupa fimm R-lista happdrættismiða af félaga Proppé!

Djöfullinn snýr aftur…

Hahaha… alveg hefði ég mátt segja mer það sjálfur að það væri minn gamli bekkjarbróðir og sessunautur úr menntó, Pétur Rúnar Guðnason, sem stæði fyrir síðunni www.xxxd.is - Pétur Rúnar, sem var yfirleitt kallaður “Pétur djöfull” eða bara “Djöfullinn” er höfuðsnilingur og erkitölvunjörður. Þetta tiltæki virðist hins vegar hafa runnið gersamlega á rassinn, því það var ekki fyrr búin að birtast grein um þetta á því stendauða vefsvæði Vísi en Djöfullinn var búinn að loka síðunni. - Það hefði verið nær hjá honum að byrja aftur að blogga frekar en að garfa í svona rugli.

Annars er alltaf skemmtilegt að fylgjast með því síðustu klukkustundirnar fyrir kosningar hvað allir fara á taugum. Ýmist vilja menn halda að sér höndum eða gera eitthvað út í loftið og svo er fólk á nálum yfir því hvort hin eða þessi taktíkin sé að virka eða hafa þveröfug áhrif.

Það er samt ekki hægt annað en skemmta sér yfir konseptinu: “fáðu SMS frá súperfyrirsætu…” - Hugmyndin um fjöl-SMS sendingar frá fegurðardrottningum og bikinígellum er jafnvel súrari en klámsíður sem lofa blautlegum bréfaskriftum við klámmyndastjörnur í gegnum netið.

Okkar á milli í hita og þunga dagsins

Jæja, þá er frábær helgi að baki. Ég held að ég hafi ekki komið svona úthvíldur til vinnu í vikubyrjun í óratíma - og það þrátt fyrir að framleidd hafi verið nærri 1.500 barmmerki um helgina.

Á laugardagskvöldið var R-listinn með hátíð á nokkrum börum á Ingólfsstrætinu, þ.á.m. Ara í Ögri, sem er besti barinn í borginni um þessar mundir. Þar stóð Kata Jakobs sveitt við að grilla pulsur, á meðan liðleskjurnar og aumingjarnir í kosningastjórninni gaufuðust í kringum hana. Síðar um kvöldið settist Björk Vilhelmsdóttir hjá okkur Steinunni. Björk er fín. Raunar er hún ein af fáum góðum ástæðum fyrir því að styðja framboðið (nóg er af ástæðum til að gera það ekki). Hún er á leiðinni til Palestínu og hvatti okkur til að gera það sama. Þori ég til Palestínu að láta skjóta mig? Varla…

Leikurinn í Keflavík var fínn. Ég minnist þess ekki að hafa komið til Kebblavíkur í jafn góðu veðri. Framararnir voru frískir á köflum, en þetta gæti orðið erfitt tímabil. Kebblvíkingarnir munu hins vegar lenda í gríðarlegri fallbaráttu. Ég spái þeim niður. - Við Valur húsfélagsformaður hittum Sverri Jakobsson á Framnesveginum og tókum hann með á völlinn. Sverrir er óvirkur Framari sem mætir á einn leik á ári að jafnaði. Ætli þeir verði þó ekki 2-3 í ár.

Næsta laugardag er stefnan tekin í Grindavíkina. Það verður fjörugur dagur. Byrjað á fótbolta suður með sjó. Síðan taka við Júróvísíón, grill hjá Palla og Hildi og kosningavaka fram undir morgunn. Ég get varla beðið.

Fjármálin mín eru í steik. Ekki það að um neitt óbrúanlegt gap sé að ræða. Hins vegar setti ég helling af útgjöldum tengdum friðarráðstefnunni og barmmerkjaframleiðslunni okkar Palla á Visa-kortið mitt, en er ekki búinn að vera duglegur að rukka til baka. Þannig skuldar R-listinn okkur pening, sem gerir það að verkum að nú verður bara étið haframjöl og ýsa frá tengdapabba til mánaðarmóta. - Ég þoli ekki peningastress. Ekki verður þetta skemmtilegra í haust þegar ég þarf að skipta út Mözdunni og kaupa nýjan bíl.

Núna dugir hins vegar ekki lengur að vera með neinn aumingjaskap. Það er ekki nema rétt rúm vika í Íslenska söguþingið og ég er ekki búinn með erindið mitt. - Mikið vildi ég að hægt væri að spóla fram í tímann. Þá væri söguþingið afstaðið og HM byrjað…

Hitabylgja í Reykjavík…

Más og blás. Það er hræðilega heitt núna í Reykjavík. Varla að manni standi á sama í ljósi fregnanna frá Indlandi um að hundruðir manna hafi farist úr hita - þótt sennilega sé hitinn þar aðeins fleiri gráður.

Við Steinunn skriðum fram úr upp úr hádegi og rukum beint niður á R-lista með 600 barmmerki sem við þrykktum út í gærkvöld. R-listafólkið er að eipa yfir að hafa ekki nógu mörg merki og skældu það út að fá að senda hönnunina hans Palla til fyrirtækis út í bæ. Í ljós kom að það fyrirtæki er ekki að vinna þetta neitt hraðar en við, auk þess sem það getur bara gert 1 og 1/2 tommu, en ekki 1 tommu. Synir GSP eru þeir einu sem geta gert þá stærð af merkjum - enda rúlum við á merkjasviðinu.

* * *

Í kvöld ætlar R-listinn svo að standa fyrir tónleikum í miðbænum, m.a. að Ara í Ögri þar sem 5ta herdeildin spilar. Nú er Ari fínn bar og 5ta herdeildin stórskemmtilegt band, þannig að þetta ætti að steinliggja. - Vonandi verða leiðindagaurar á borð við Rígmontna rembimennið hvergi nærri.

* * *

Ein nostalgísk pæling að lokum. - Man fólk almennt eftir poxinu? Poxið var litlar pappaskífur með myndum af: handboltamönnum/tónlistarfólki/húðflúrsmyndum o.s.frv. Þetta keyptu krakkar í stórum stíl og gátu svo spilað upp á pox-skífur með því að varpa “sleggju” (einhvers konar málmskífu) ofan á pox-stafla og reynt að dreifa þeim yfir sem stærst svæði.

Hvers vegna er ég að rifja þetta upp? - Jú, ég kynntist poxinu í gegnum félaga mína sem voru í skátafélaginu Ægisbúum. Einhverjir yfirskátar þar fluttu poxið til landsins og stórgræddu á því. Lagerinn var geymdur í skátaheimilinu, þaðan sem hægt var að stela bílförmunum af þessu. Hins vegar var íslenska poxið alltaf frekar skúnkalegt þar sem hverri skítahljómsveitinni var leyft að vera með - handboltapoxin gengu einkum út á að sýna þjóðfána hinna og þessara landa sem kepptu á HM95 o.s.frv.

Skyldi poxið slá í gegn aftur? - Ég leyfi mér að draga það í efa.

Antíklímax?

Finnst mönnum það ekki draga dálítið úr ljómanum yfir þessu fjallapríli Haraldar Arnar Ólafssonar að sama dag og hannklöngraðist upp á tindinn, skuli 63 ára gömul japönsk kona hafa gert það sama?

Skyldi forsætisráðherra Japan hafa vakað í heila nótt í einhverri sportverslun af þessu tilefni?

Heimilisfriðnum borgið…

Hjúkk! Góður lesandi ákvað að benda mér á það vegna síðustu færslu, að leikurinn gegn Kebblavík sé klukkan 17 en ekki kl. 19. Það þýðir að ég kemst á völlinn OG get mætt í afganga hjá tengdó um kl. 20. - Jæja, þá ætti ég að losna við mestu skammirnar og er ekki algjör durtur!

Annars verð ég að fara að skipuleggja sumarið í kringum fótboltann. Það er HM í júní sem mun taka drjúgan hluta af tíma mínum. Svo eru ekki nema þrír útivallarleikir sem hætt er við að maður missi af hjá Fram - það eru leikirnir gegn ÍBV, Þór og KA. Ég hlýt að geta platað Steinunni norður á KA-leikinn í lokaumferðinni, en líklega eru tvær Akureyrarferðir á einu sumri of mikið. Þá er Eyjaleikurinn of nærri verslunarmannahelgi til að ég nenni að fara út eftir í hann. Svo á ég alveg eftir að tímasetja Færeyjaferðina sem enn er á dagskránni. - Spurning um að fara í lok júní eða byrjun júlí, því frá 24. júní til 9. júlí er bara einn leikur (16 liða úrslitin í bikarnum).

Það er alltaf svo gaman þegar fótboltinn byrjar! Ég er sannfærður um að þetta verður tímabilið sem Þorbjörn Atli nær að blómstra. Ég spái honum markakóngstitlinum!

Verst að afa gengur frekar hægt að jafna sig af sýkingunni sem hann fékk á dögunum. Hann fer hvorki lönd né strönd um þessar mundir og kemst örugglega ekki á völlinn í bráð.