kolbeinn

Verðmætamat manna er mismunandi og er það vel. Menn leggja mismikið upp úr verðgildi hlutanna, sumum er nokk sama hvað þeir eiga af peningum en aðrir verða að eiga sem mest og helst meira en náunginn. Ég verð hins vegar að játa að verðmætamat blaðamanns fréttablaðsins sem skrifaði þessa frétt í Fréttablaðið er óvenjulegt. Þar segir frá því að Robbie Williams sé með böggum hildar þar sem Simon Cowell er orðinn ríkari en hann. Það má vel vera að svo sé og Robbie greyið geti á sér heilum tekið við þessi tíðindi. Fréttaskýring blaðamannsins er hins vegar nokkuð sérstök þegar hann segir: Robbie gortaði sig einu sinni af því að vera „ríkari en mig gæti dreymt um“ en í ljósi þess að Cowell er orðinn ríkari en hann eiga þau ummæli ekki lengur við.

Í fréttinni kemur fram að Robbie Williams á um 12 milljarða íslenskra króna. Þetta finnst blaðamanninum vera smámunir, í ljósi þess að Cowell er ríkari. Og draumar Robbie um ríkidæmi taka mið af eigum Cowells. Ég sé hann fyrir mér sem barn, mig langar að verða ógeðslega ríkur þegar ég er orðinn stór eiga 13 milljarða hið minnsta, en ef ég á bara 12 eða Simon Cowell verður ríkari en ég rætast draumar mínir ekki.