kolbeinn

Jæja, hinn mikli pólitíski viti, Björn Bjarnason - hvern allir keppast við að mæra nú í bak og fyrir, laut í lægra haldi fyrir Guðlaugi Þór. Það kemur svo sem ekki á óvart. Björn hefur varla verið hálfur maður síðan hann tapaði borginni og ekki batnaði það við að missa Davíð. Það er hins vegar magnað að fylgjast með því sífri sem vellur nú upp úr Sjálfstæðismönnum. Þeir agnúast mjög út í það að pólitískir andstæðingar þeirra skuli “á ófyrirleitinn hátt” hafa reynt að koma höggi á hinn vammlausa mann Björn Bjarnason.

Hvaða væl er þetta? Ég held að Sjálfstæðismenn ættu að rifja upp eigin framgöngu í gegnum tíðina þegar pólitískur andstæðingur hefur legið vel við höggi. Ekki var nú fyrirleitninni fyrir að fara í kosningaslag Björns sjálfs við Reykjavíkurlistann 2002. En nú liggja þeir sjálfir vel við höggi vegna hlerunarmálsins og þá er vælt.

Eina ástæðan fyrir því að mönnum tókst að búa til eitthvað hugtak sem hét “leyniþjónusta Sjálfstæðisflokksins” var sú að Sjálfstæðisflokkurinn hefur hagað sér þannig í því máli að hann virðist hafa eitthvað að fela. Hver gullkálfurinn á fætur öðrum hefur verið dreginn fram til að gera grín af áhyggjum manna á hlerunum, hvort sem það er Gísli Marteinn eða Óli Björn, allir heimta þeir sannanir þeirra sem sögðust hafa verið hleraðir.

Ef Sjálfstæðisflokkurinn hefði hreinan skjöld í þessu máli hefði hann fyrir löngu skipað óháða rannsóknarnefnd sem færi yfir málið frá a-ö. Þess vegna öll gögn í stjórnkerfinu sem vörðuðu Landsímann frá stofnun hans, öll gögn frá héraðsdómi Reykjavíkur t.a.m. síðust 60 árin. Menn geta sagt að þetta sé allt of mikið, en þegar verið er að dylgja um hleranir á æðstu ráðamönnum þjóðarinnar má ekkert til spara. Þess vegna á dómsmálaráðherrann sjálfur, eða þá forsætisráðherrann að fyrirskipa umfangsmikla rannsókn sem sker út úr um þetta í eitt skipti fyrir öll. Í staðinn hafa einmitt þessir tveir vælt hæst um ómaklegar og ófyrirleitnar árásir óprúttinna andstæðinga (hvað eru mörg ó í því?).

Nei mönnum væri nær að hætta að kenna öðrum um eigin ófarir og átta sig á því að þessi hlerunarmál er ekki eitthvað sem hægt er að taka eftir leið Framsóknarflokksins og væla yfir því að allir séu vondir við mann. Svo má Björn líka spyrja sig að því hvort raunin sé sú að um 1200 manns í Sjálfstæðisflokknum hafi keypt þennan áróður vondu stjórnarandstæðinganna (það sem munaði á honum og Gulla í 2. sæti). Ef svo er má búast við því að stjórnarandstaðan hugsi sér gott til glóðarinnar með því að hafa áhrif á alla Sjálfstæðismennina í kosningabaráttunni í vor.

Hvað er eiginlega að gerast með fréttamenn þessa lands? Verður það virkilega þannig að maður mun fá fréttir af hverri einustu langreyði sem skotin verður? Verður alltaf hringt í Kristján Loftsson til að spyrja hvernig hafi gengið með þessa? Og mun fréttastofa Rúv koma sér upp útsendingaraðstöðu í Hvalstöðinni þannig að við getum fylgst með þeim öllum dregnum á land? Er þetta ekki orðið ágætt?

Hámarki póstmódernismans er náð. Ég sá auglýsingu á Skjá 1 að þættinum King of Queens. Fáir þættir eru jafnfastir í amerísku hversdagsgildismati og einmitt þessir þættir. Það er hið besta mál, en því miður eru þeir ekkert sérstaklega fyndnir (mæli sérstaklega með gríni MAD að þessum þáttum þar sem þeir eru teknir í gegn). Hvaða lag velur svo auglýsingadeild Skjás 1 til að að leika undir auglýsingunni? Jú, My Way með Sid Vicious. Ef þetta er ekki hámark póstmódernismans þá veit ég ekki hvað.

Nú erum við byrjuð að veiða hvali. Það er í sjálfu sér ágætt að veiða hvali eins og önnur dýr, þó ég sjái ekki tilganginn í því núna. Ég held að það þjóni ekki hagsmunum okkar nú sem stendur og finnst öll umgjörðin utan um veiðarnar benda til þess að ekki sé um útpælda aðgerð að ræða. Og mikið er ótrúlega hallærislegt að sjá fólk safnast saman og klappa fyrir fyrstu skepnunni sem dregin er á land. Það slær næstum út álversklapp Húsvíkinga í hallærsisheitum.

Hins vegar höfum við notað þau rök að það sé okkar fulli réttur að veiða hvali á sjálfbæran hátt og það er hið besta mál. Við höfum hlegið að því sem við köllum “tilfinningarök” þeirra sem vilja ekki veiða hvali vegna aðáunar sinnar á dýrunum. Þess vegna hlýt ég að líta svo á að nú fari menn að nýta aðra dýrastofna landsins á sjálfbæran hátt. Ekki förum við að beita tilfinningarökum gegn lóunni og hrossagauknum til dæmis? Nóg er til af lóu hér á landi og hún þykir t.a.m. herramannsmatur víða úti um heim.

Ein rök hljóta að eiga við um alla stofna þannig að líklega fer umhverfisráðherra fljótlega að leggja til að vannýtir fuglastofnar landsins verði nýttir.

Jæja þá er enn eitt brjálæðið í uppsiglingu í þessu skrýtna landi. Nú á að fara að vopna íslensku lögregluna. Hún á að fá skambyssur, skotheld vesti og hjálma en hér er fyrst og fremst um öryggisbúnað að ræða eins og Jón Bjartmarz yfirlögregluþjónn hjá Ríkislögreglustjóra orðar það í viðtali við Fréttablaðið. Í sama blaði kallar Geir Jón enn einu sinni eftir því að lögreglunni sé sýnd meiri virðing.

Hefur lögreglumönnum aldrei dottið í hug að hegðan þeirra sjálfra gæti haft eitthvað að segja með þá virðingu sem þeir fá hjá samfélaginu? Ég sat á kaffihúsi um daginn með tveimur vinum mínum og lögregluna bar á góma. Í ljós kom að allir okkar þekktu einhvern sem hafði sjálfur, eða einhver honum nákominn, lent í því að vera laminn af löggunni, handtekinn fyrir engar sakir eða hafði mætt fádæma dónaskap af hálfu lögreglunnar. Ég er ekki í vafa um að lögreglan, sem er þjónn samfélagsins, hefur á síðustu árum sýnt æ meiri hroka og yfirgang. Ég þekki fólk sem hefur verið að mótmæla við svæði Kárahnjúka og það fær ekki kurteislega meðferð af lögreglunnar hendi. Lögreglumenn ættu að líta í eigin barm þegar þeir kvarta yfir virðingarleysi.

Engin dæmi þekki ég um lögreglumenn sem hafa verið skotnir í starfi hér á Íslandi. Ég efast hins vegar ekki um að ef lögreglan vopnast og fer að sækja alvopnuð að fíkniefnasölum þá er bara tímaspursmál hvenær fyrsti lögreglumaðurinn verður fyrir skoti.

Lengi hef ég kunnað fyrri part sem ég hef talið óbotnanlegan. Hann hljóðar svona:

Verk hef ég í vinstri öxl,
verri þó í hægri mjöðm.

Hér er augljósleg um erfið rímorð að ræða og ég hef kunnað þetta í mörg, mörg ár. Í hinu stórkostlega blaði Skessuhorni las ég síðan um daginn botn við fyrri partinum, reyndar aðeins breyttum.

Vond er gigt í vinstri öxl,
verri þó í hægri mjögð.
Eins og skáldið Aldous Höxl-
ey er verri en Kristmann Gvöðm.

Þetta er náttúrulega snilld fyrir utan þá augljósu staðreynd að Aldous Höxley er ekki verri en Kristmann Guðmundsson.

Nú er búið að tilkynna okkur dauðlegum að amríski herinn sé nú ekki búinn að gleyma okkur þó setuliðið á Miðnesheiði sé horfið af landi brott. Íslenskum stjórnvöldum tókst að semja um það að farið yrði í að viðhalda og styrkja samstarf í öryggismálum, í kjölfar þess að herstöðinni á Keflavíkurflugvelli var lokað. líkt og segir í tilkynningu frá bandaríska sendiráðinu. Af því tilefni mun sjóherinn senda hingað flugmóðuskip okkur til yndisauka.

Skipið heitir, eins og segir í fréttum, USS Wasp og meginhlutverk þess er að flytja bardagasveit 1600 landgönguliða og vígtól þeirra hvert sem er á höfunum. Skipið getur borið 42 stórar þyrlur eða jafn margar Harrier orrustuþotur, og blöndu af þessum tveimur tegundum. Svo tilkynnir hinni vísi vefur.

USS Wasp er hluti af þeim skipaflota sem Bandaríkjamenn kalla amphibious assault ships. Það þarf því enginn að velkjast í vafa um það hvernig skip er hér á ferð. Dick Cheney, sá friðelskandi varaleiðtogi, heimsótti eitt sinn umrætt skip. Þá þakkaði hann sérstaklega árásarsveit annars amphibious assault ship USS Nassau. Þetta systurskip USS Wasp inniheldur sveit sem nefnd er the USS Nassau Expeditionary Strike Group og var Cheney sérstaklega ánægður með störf þessarar sveitar í innrásinni í Írak. Þeim hefur sem sagt tekist að drepa marga menn.

Það athyglisverðasta við fréttir af komu þessa morðtóls hingað til lands er að áhöfnin, 1100 manns, munu allir fá landgönguleyfi. Nú er ég í sjálfu sér ekki talsmaður þess að hermenn þeir sem boðið er hingað til lands séu lokaðir inni. Fyrst draga þarf þessar morðsveitir hingað er ekki nema almenn kurteisi að þeir þá fái að spóka sig um götur og stræti landsins og kynnast hinni viljugu þjóð sem studdi blóðbaðið í Írak.

Það sem vekur athygli mína er hins vegar ástæða þess að áhöfnin fær landgönguleyfi, því eins og segir í frétt vísis er það til að taka þátt í félagslegum tengslaverkefnum. Félagsleg tengslaverkefni? Athyglisvert. Miðað við fyrri iðju landgönguliða hér á landi, sem hefur aðallega falist í því að heilla kvenþjóðina, býður þetta upp á ýmsa möguleika á því hvað tengslaverkefni eru. Maður hugsar öðruvísi til textans “Er ekki kominn tími til að tengja?” og fer að líta þá “almannatengla” sem maður þekkir hornauga.

Get ekki á mér setið að bæta við þessa eineltisumræðu sem ég hóf áðan. Ég ætla að veita lesendum þessarar síðu (ef einhverjir eru) örlitla innsýn í þá fórnarlambagervingu álvers- og stóriðjusinna sem ég ræddi um í síðustu færslu. Kíkjum aðeins inn í hugarheim starfsmannastjóra álversins fyrir austan sem birtist á bloggi hans.

Púff….Þetta er búin að vera andlega strembin vika. Þessi klikkaða umræða um virkjana og stóriðjumál leggst á sálina í manni ef maður passar sig ekki. Sýgur úr manni orku. Ég verð einfaldlega fokreiður þegar ég tala, hugsa eða skrifa um málið- svo ekki sé talað um alla geggjunina í ljósvaka og prentmiðlunum.

(Innskot: Ég get nota bene ekki orða bundist yfir því hvað Bubbi Morthens er mikið afstrympi. Maðurinn græddi vel á því að syngja um það hvað það er ömurlegt að búa á Austurlandi (”Bátarnir lágu tómir við kæjann, í kinnungunum söng”). Svo þegar Austfirðingar fá mestu vítamínsprautu sem sögur fara af þá er Bubbi að sjálfsögðu algerlega á móti því- enda vill hann örugglega geta gripið í austfirska eymd sem yrkisefni, svona þegar þannig liggur á honum. Það gerir þetta svo enn hjákátlegra að maðurinn seldi industrial kapitalistum, Glitni ef ég man rétt, höfundarréttinn á verkum sínum fyrir fúlgur fjár…og fyrir peningana keypti gaurinn sér 8 sílendra Range Rover montkerru sem eyðir bensíni á við 5 fólksbíla. Sveiattan! Svo er þetta fífl HEIÐURSGESTUR á trúbadorahátíð í Neskaupstað annað kvöld. Ó..mæ…god! Ég skil ekki hvernig manninum dettur í hug að sýna smettið á sér í fjórðungnum. Pheww…..gott að ná þessu úr kerfinu)

Jamm. Svo mörg voru þau orð.

Hvernig stendur á því að menn láta aðra eins vitleysu út úr sér og Vilhjálmur Egilsson framkvæmdastjóri Samtaka atvinnulífsins. Hann leyfir sér að tala um einelti gegn stóriðju. Til hvers eru menn að leika þennan skrípaleik lengur? Hvurs lags móðgun er þetta við fólk sem er kannski í rúst eftir alvöru einelti?

Nú geta menn haft mismunandi skoðanir á stóriðju. Mönnum getur hafa þótt halla á hana í fjölmiðlaumræðu. Mönnum getur þótt ýmsir fjölmiðlar hafa farið offari gegn stóriðju. Ég tel það rangt en aðrir geta verið þeirra skoðunar. En að leyfa sér svona vitleysu að mála sig upp sem fórnarlömb - hvaða rugl er þetta?

Hvar var eineltið þegar sýnt var beint í fréttatíma rúv frá álfagnaði á Húsavík þegar Örlygur Hnefill og kó fagnaði því að fólk úti í heimi lýsti yfir vilja til að skoða það að setja upp álver nyrðra? Ég veit ekki betur en fulltrúar Landsvirkjunar hafi haft aðgang að sjónvarpinu og Mogganum eftir hentugleika til að lýsa votustu virkjanadraumum sínum.

Þessi fórnarlambagerving er orðin full mikil í samfélaginu. Einelti gegn stóriðju! Þetta minnir hálfpartinn á þá hugmynd að grípa þurfi til séraðgerða til að vernda rétt trúaðs fólks á Íslandi til að koma trúarhugmyndum sínum á framfæri.

Nú er Bandaríkjastjórn búin að segja við N-Kóreu: “Annað hvort eigið þið framtíð, eða kjarnorkuvopn. Þið getið ekki átt bæði.” Þetta slær sama tóninn og þið eruð með eða á móti okkur rökin frægu. Það er gott til þess að vita að menn eru tilbúnir til að setjast niður og ræða málin á jafnréttisgrundvelli. Einnig gott að N-Kórea mun fá sömu meðferð og önnur ríki sem komið hafa sér upp þessum vopnum, Indland, Pakistan og Ísrael. Rökin eru þau að hættan sé svo mikil ef N-Kórea hafi vopnin. Nú búa tvö mestu árásrríki heims yfir kjarnorkuvopnum, Bandaríkin og Ísrael. Ísraelar hafa ekki einu sinni undirritað alþjóðlega sáttmála um vopnin. Það er gott að hin nýja heimsmynd einkennist af sanngirni, víðsýni og því að eitt gangi yfir alla.

Annars á allt gott fólk [breytt af skömm hins karllæga] að lesa grein Steinþórs Heiðarssonar á Múrnum. Þetta eru orð í tíma töluð.