mig langar svo að tala við þig

útskýra mína hlið

og hvernig ég sé þetta

ég vona ég sé ekki að trufla

ertu upptekinn þessa dagana?

Björgólfur,

ég er blaðamaður

á mogganum

sem þú átt

eða áttir

eða hvað?

geturðu sagt mér, Björgólfur

hvað verður um moggann?

mér finnst svo óþægilegt að vita það ekki

***

Björgólfur,

þetta kaupæði

sem þú sagðir í mogganum

að hefði runnið á alla íslendinga

ég kannast ekki við það

ég á ekki sumarhús

eða hjólhýsi

eða jeppa

Björgólfur,

ég keypti mér aldrei flatskjá

ég á ekki einu sinni sjónvarp

það er ópíum fólksins

held ég

og fyrir framan sjónvarpið

slokknar á öllu

það er gott, Björgólfur

mjög gott

og hættulegt

stórhættulegt

ég á reyndar örbylgjuofn

þú nefndir hann samt ekki

***

Björgólfur,

ég hef alltaf verið dugleg að vinna

ég vann í sjoppu

ég þjálfaði fótbolta

ég vann á lager

ég kenndi börnum

ég raðaði trópí í hillur

ég reyndi einu sinni að selja pressuna

en þá hrópaði á mig gamall maður

að pressan væri rusl

ég hætti að selja pressuna

þá hélt ég að gamlir menn hefðu alltaf rétt fyrir sér

hafa þeir það?

Björgólfur,

ég las við þig viðtalið

og mig langar að segja

að ég skil þig

ég veit hvernig tilfinning það er

að hrópað sé á þig

eins og þú sért höfuð alls ills

ég er blaðamaður, Björgólfur

seðlabankinn, fyrirtæki, stjórnmálamenn, eftirlitsstofnanir

og ekki síst fjölmiðlar

það sagði þorgerður katrín

og ég hélt allt í einu að ég hefði skemmt allt

***

mér fannst alltaf skrítið að fólk keypti allt á lánum

og mér fannst alltaf skrítið að menn væru í stanslausu spili

matadori, Björgólfur

mér þykja einkaþotur asnalegar

en mér var alveg sama þótt þú værir í keppni

við hina strákana

ég hef spilað matador

ég veit hvernig tilfinning það er

að vinna

ég vann næstum því alltaf

en ef ég tapaði

þá var það allt í lagi

ég fékk mér bara ristað brauð

og kakó

tvö glös af kakói

það var eftirlætið mitt

þegar ég var lítil

þegar ég var lítil

og spilaði matador

og fékk kakó

stundum

***

sjónvarpsleysið, Björgólfur

það bjargaði mér ekki

það slokknaði líka á mér

ég áttaði mig ekki á því

að ég þyrfti að borga fyrir matadorið

sem ég tók ekki þátt í

það á ekki að fara illa með almannafé

og ég er sammála, Björgólfur

ég er sammála því að það eigi ekki að bruðla með peninga

hvorki almanna né eigin

en samt sagði ég ekki neitt

þegar þú keyptir austurstræti og bankastræti og aðalstræti og hafnarstræti og pósthústræti og laufásveg og laugaveg og sólvallagötu og hávallagötu

fyrir peningana mína

peninga sem voru faldir bak við orð sem ég skildi ekki

***

áramótaheitið mitt, Björgólfur

var að reyna að skilja peninga

ég fór á námskeið og lærði um stýrivexti og eigið fé og spákaupmennsku og lánshæfiseinkunn og skortstöðu og skortsölu og vísitölu og verðtryggingu

og ég reyndi að spyrja eins mikið og ég gat

og alltaf létu menn eins og þeir væru með allt á hreinu

en gátu samt ekkert útskýrt

Björgólfur, maður talar ekki skýrar

en maður hugsar

matadorið ykkar var alltof flókið

svo flókið að það kunni enginn reglurnar

og svo asnalegt að allir töpuðu

og nú þarf ég að borga

aftur

***

ég veit alveg, Björgólfur

að það verður í lagi með mig

ég veðsetti engar götur

en Björgólfur,

það verður ekki allt í lagi með alla

og það finnst mér sárt

ég veit alveg

að við tókum öll þátt í rétttrúnaðinum

við sungum með

trallalalalalala

lalalalala

ég söng falskt

til að ögra kórnum

og fannst ég vera að mótmæla

en ég söng samt

TRALLALALALA

LALALALA

LALALA

LALLALALALA

***

og ritstjórinn minn gamli

hann sagði að það væru hræðilegir hlutir að gerast

í fjármálaheiminum

ég hlustaði

en ég skildi hann ekki

og ég viðurkenni

að stundum hélt ég hann væri orðinn smá klikk

hann var stríðsmaður, Björgólfur

harðsnúinn kaldastríðsmaður

alla tíð

og ég hélt hann vildi vera það áfram

ég er ekki stríðsmaður, Björgólfur

mér finnst best ef allir hjálpast að

***

Björgólfur,

pabbi segir að þú sért fínn kall

og bubbi segir það líka

ég trúi þeim, Björgólfur

ég hitti þig einu sinni

og ég man að það kom mér svo á óvart hvað þú varst hress

ég hélt að maður

sem ætti svona mikla peninga

gæti ekki verið hress

ekki frjáls

Björgólfur, er ekki vont að eiga heimavörn?

***

Björgólfur,

ég veit að þú varst duglegur að vinna

eins og ég

og líklega vannstu lengri vinnudag

mín vegna hefðirðu alveg mátt, Björgólfur

fá tvöfalt hærra kaup

og kannski aðeins meira en það

vegna ábyrgðar

Björgólfur,

ég var eins árs þegar davíð oddsson varð borgarstjóri

síðan forsætisráðherra

seðlabankastjóri

og hann er líka skáld

ég treysti honum ekki, Björgólfur

en samt hlusta ég

þegar hann talar

því ég þekki röddina hans svo vel

Björgólfur, hann var alltaf í skaupinu

afmælisbarn með stóra köku

og eina sneið fyrir gestina

Björgólfur,

mig langaði ekkert í köku

ég hafði það bara fínt

í mínu flatskjásleysi

og þannig vil ég hafa það áfram

***

Björgólfur,

ég vona að forseti gefi þér upp sakir

og öllum hinum

égerreiðútíykkurþvímiglangaðiaðnotaspariféðmittíferðtilindlandsenekkitilaðborganiðurskuldirsemégskilekkiafhverjuerutilen

ég losna við reiðina

og ég skal borga, Björgólfur

ég skal borga með einu skilyrði

að þetta gerist ekki aftur

að við hjálpumst að

við að byggja upp samfélag

saman í þessu

og við getum spilað matador

um helgar

með pappírspeninga

og drukkið kakó

saman í þessu

ertu til í það, Björgólfur?

ertu til í það?

Nú er kominn tími á að Patrekur haldi utan að nýju til að breiða út fagnaðarerindið og deila með heiminum hlýju sinni, ást og gleði, svo ekki sé minnst á óþrjótandi þekkingu á heimsmálunum, jafnt sem heimamálunum.

Lesendur nær og fjær eru eflaust orðnir spenntir. Jú, Patrekur ætlar í helgarferð til Köben. Annað eins flipp og grill hefur aldrei heyrst. Að líkindum verður Patrekur víða um bæ með fyrirlestur um þessa ferð sína þegar heim kemur, eins og hann er oftast beðinn um eftir að hafa heimsótt fjarlæg lönd.

„Það er ekki viðunandi að hefðbundin kvennastörf hjá hinu opinbera, sem krefjast langrar menntunar og mikillar sérþekkingar, séu metin til tugþúsunda lægri launa en aðrar fagstéttir, svo ekki sé talað um hefðbundnar karlastéttir sem virðast ætíð tróna á toppnum í launum.“

***

Annars er þingið farið í gang og ég hæstánægð með að vera að komast aftur í smá rútínu. Stóra verkefnið er svo að lemja saman bókina upp úr MA ritgerðinni en hún kemur út fyrir jól. Jibbíjei.

… allsvakalega á sálarball á Nasa á laugardagskvöld. Það er alvöru menning, hámenning myndi ég jafnvel segja.

Mig langar aftur í Þórsmörk, helst núna.

Ferðin var frábær, í alla staði, að undanskildu stóra bláa sykurfrauðsmálinu, en það er ekki beinlínis til að blogga um.

Frumraun mín á hagyrðingasviðinu gekk bara nokkuð vel, þó ég segi sjálf frá. Leitin að Fjalla-Eyvindi blandaðist skemmtilega inn í margar vísur, og reyndar Fjalla-Eyvindur sjálfur. G. pabbi var eina foreldri mitt sem lét sig hafa það að mæta á staðinn og fylgjast stoltur með dóttur sinni. Hann hafði þó vit á að aka ekki þessa ægilegu vegi sem liggja austur á Borgarfjörð heldur gekk hann og þar sem hann veit að ég ek alltaf varlega og velti ekki bílum þá lét hann mig taka bílinn yfir skarð. Ég komst sem betur fór lifandi frá því og er þess vegna til frásagnar.

Eftir gott hagyrðingakvöld en slakara fótboltamót héldum við í Neskaupstað og eyddum við kvöldinu í faðmi kunnulegra fjalla. Hlógum að misvel heppnuðum skemmtiatriðum, borðuðum hlaup og drukkum bjór, í alveg hreint ljómandi góðum félagsskap.

Ég held það sé að komast á verslunarmannahelgarhefð, sem verður aðeins rofin fyrir Þjóðhátðíð, einhvern tímann aftur … brekkusöngur, bálköstur og allt það … Fífa, hvenær, hvenær?

Fyrir ári síðan sótti ég Borgarfjörð eystri heim í fyrsta sinn. Þá földu fjöllin sig í þokunni en ég varð þó þeirrar ánægju aðnjótandi að sjá aðeins glitta í þau. Í febrúar fór ég aftur og tók þá Diljá með mér sem lét glepjast af ýktum lýsingum mínum af ægifegurðinni á borgarfirði. Snjóbylur sá um að hylja fjöllin í það skiptið, og reyndar huldi hann líka bæði hafið og húsin (hafið og fjöllin fyrir þau sem eru hrifin af vísunum). En nú reyni ég aftur.

Á hagyrðingakvöldinu í fyrra fór ég auðvitað baksviðs í hléi (er ekki annars töff að fara baksviðs í hléi? eða á það bara við um tónleika?). Þar eignaðist ég óvin í skipuleggjandanum þegar ég tuðaði yfir því að engin kona væri meðal hagyrðinga. Óvinur þessi varð þó vinur minn þegar líða tók á kvöldið og enn meiri vinur nú í vetur þegar okkur var plantað saman í hús í Kópavoginum lesandi ljóð. Ekki veit ég þó hvort ég ætti að kalla hann vin minn eða óvin núna því hann hefur, með vísan til yfirlýsinga minna frá því í fyrra, platað mig til að vera meðal hagyrðinganna í ár. Aldrei áður hef ég tekið þátt í slíku en einhvern tímann er allt fyrst, geri ég ráð fyrir.

Vinur minn, sem ég veit ekki hvort er vinur eða óvinur, hefur lofað að hlæja í hvert sinn sem ég gef merki. Það væri mjög vel þegið að fá fleiri slíka í salinn. Þetta er nú ekkert svo langt í burtu. Ég lofa að splæsa í bjór.

Fríið fór í að borða, sofa, baka, lesa, ganga, svamla í lauginni og segja lélega orðabrandara. Á þessum slóðum þarf kons ekkert að sitja á sér þegar að þeim kemur. Það er frelsi út af fyrir sig.

Ég er svona að gæla við að eyða verslunarmannahelginni á Borgarfirði eystri. Er e-r stemmning fyrir hópferð? Ég meina, hagyrðingakvöld og fótboltamót, er hægt að biðja um meira? Svo segir sagan víst að borgfirsku fjöllin séu stórbrotin. Ég hef reynt að sjá þau tvisvar. Í annað skipti huldi þokan þau en í hitt skiptið sá snjóbylur um það…

Ef þið þekkið einhvern sem þekkir einhvern sem er á þessari leið, endilega láta vita.