Í 18. gr. jafnréttislaga segir: “Auglýsandi, og sá sem hannar eða birtir auglýsingu, skal sjá til þess að auglýsingin sé öðru kyninu ekki til minnkunar, lítilsvirðingar eða stríði gegn jafnri stöðu og jafnrétti kynjanna á nokkurn hátt.”
Af hverju ekki land með zero zero auglýsingum?
Merkilegt hvað körlum, ok, sumum, ekki öllum, finnst mikilvægt að setja alltaf nafnið sitt við allt mögulegt og ómögulegt sem þeim dettur í hug. Þeir byggja hús og setja þá nafnið sitt inn í húsið á e-n skjöld. Hengja jafnvel upp af sér málverk eða láta búa til brjóstmynd. Stundum sjá að vísu aðrir karlar um þetta fyrir þá seinna.
Enn merkilegra þykja mér lögmálin öll og kenningarnar sem eru kenndar við karla. Þeir segja e-ð mjög beisikk, eins og að það að tíminn sem tekur að að vinna ákveðið verkefni aukist í réttu hlutfalli við tímann sem var áætlaður til þess, og allt í einu heitir það lögmál og er kennt við nafn. Eða þá að þeir búa til marktektarpróf í tölfræði og láta það heita í höfuðið á sér.
Til að vera kona með körlum er ég búin að búa til tvö lögmál sem ég ætla að sækja um einkaleyfi á og kenna við nafnið mitt.
1. Hugmyndir fólks um gæði vöru sem það ætlar að kaupa minnka í réttu hlutfalli við verðið sem sett er á vöruna. D. leðurjakki kostar aðeins þúsund krónur í kolaportinu, ég hugsa með mér að þá hljóti hann að vera gervi og varla góður.
2. Trú er svo mikilvæg fólki vegna tilhneigingar mannsins til að yfirgefa sjálfan sig þegar hann þarf mest á sér sjálfum að halda.
Spurning að kalla það fyrra lögmál og það síðara kenningu. Ég vænti ódauðleika.
Hvað ætli þessi zero forleikur sé sem kókakóla sér ástæðu til að nota í auglýsingum?
… er ekki ómerkilegra en sjálfur Patrekur sem fagnar í dag þriggja ára afmæli sínu, á degi Heilags Patreks.
Patrekur er ólíkur öllum, enda hefur hann séð svo margt. Hann þekkir fátækt og eymd heimsins, en líka ást og von. Hann þekkir gleðina, og líka sorgina.
Patrekur er meðvitaður neytandi, hann kaupir bara fair trade og drekkur aldrei kók, hvað þá kók zíró. Patrekur er hvers manns hugljúfi. Þar sem sorgin ríkir, þangað kemur Patrekur með gleðina. Hvar sem Patrekur skynjar sársauka, þangað mætir hann með lausnir, sama í hverju þær felast. Hann leikur við götubörn í Kambódíu, byggir hús fyrir fátækt fólk á Indlandi og stöðvar kynþáttafordóma í Rúmeníu. Patrekur breiðir út fagnaðarerindið, hvort sem það er umhverfisvernd eða fótbolti.
Patrekur er hógvær og lítilslátur. Hann lætur aldrei mikið fyrir sér fara en lætur hins vegar verkin tala.
Patrekur er meðvitaður og vingjarnlegur, skemmtilegur og drífandi.
Patrekur, er.
Hér má lesa um fyrsta fund Patreks.
Einu sinni var ég að skrifa fréttaskýringu um kostnað ríkisins við nefndir, ráð og stjórnir. Þær upplýsingar liggja ekki á lausu skal ég segja ykkur, enda vísuðu ráðuneyti hvert á annað og jafnvel á aðrar stofnanir, sem vísuðu til baka. En það er önnur saga.
Í gegnum þessa vinnu og svo aðeins áfram hélt ég lista yfir viðmælendur mína sem ég skipti í tvo flokka: Vinir Höllu og óvinir Höllu. Fólk lenti á þeim fyrrnefnda ef það var kurteist og liðlegt en á þeim síðarnefnda ef það svaraði mér snubbótt og jafnvel ekki. Þarna fékk ég útrás fyrir gremju mína sem og þakklæti. Merkilegt nokk þá voru listarnir álíka langir en oft lentu ritarar og símasvörunarfólk á óvinalistanum en “topparnir” á vinalistanum. Ástæðan er væntanlega sú að ritararnir og símsvörunarfólkið hefur það verkefni að takmarka aðgengi að fólkinu sem það vinnur fyrir. Það getur hins vegar verið mjög þreytandi fyrir blaðamenn.
Núna langar mig dálítið að halda lista og standa fyrir einkunnagjöf yfir ráðherra og stjórnmálamenn sem svara fjölmiðlum og ráðherra og stjórnmálamenn sem ekki svara fjölmiðlum. Sumir láta nefnilega hafa mjög fyrir sér og sama hversu mörg skilaboð blaðamaðurinn skilur eftir, ekkert heyrist. Aðrir svara alltaf með sóma, hvort sem málið er gott eða vont fyrir þá. Einn ráðherra svarar öllum erindum með tölvupósti. Það hefur reynst mjög vel enda gengur yfirleitt mjög hratt að fá frá honum svör. Hins vegar getur það verið óþægilegt þegar um sérstök mál er að ræða því það er erfiðara fyrir blaðamanninn að ganga eftir svörum þegar um tölvupóstsamskipti er að ræða.
Kannski ætti ég að fá kollega mína með í einkunnagjöf og birta svo listann. Pæling.
Kynferðisbrotafrumvarpið er á dagskrá þingsins í dag. Því fangar allt gott fólk. Þetta eru miklar réttarbætur þótt auðvitað hefðum við sem höfum lifað og hrærst í þessari baráttu viljað sjá gengið aðeins lengra.
Sænska leiðin varðandi vændiskaup er ekki í frumvarpinu en engu að síður segir í nefndaráliti allsherjarnefndar: “Vændi er ein birtingarmynd kynferðisofbeldis og þeir sem það stunda gera það að jafnaði af neyð.”
Þarna er mikil viðurkenning á aðstöðu þeirra sem stunda vændi.
Þetta frumvarp er ekki bara skref, það er stökk.
Ég ætla austur í sumar að þjálfa fótbolta. Allar fótboltakonur eru mjög velkomnar austur til að æfa og spila með í sumar.
Svo er náttúrlega spurning um hópferð út á land og svona. Fjarðabyggð it is.