Hér er draumurinn

Mikið ægilega þykir mér leiðinlegt þegar menn sem aðhyllast ákveðna hægri stefnu nota orðið ofbeldi í tíma og ótíma.
Um leið óska ég þess að þeir verði ekki fyrir verra “ofbeldi” í lífinu en afnotagjöldum RÚV.

Skemmtilegt að þegar fyrirtæki leita eftir starfskrafti hjá Atvinnumiðlun stúdenta er fyrsti valkostur breytan kyn. Eins og sjá má á þessum vef.
Mér þætti gaman að vita í hvaða störf er nauðsynlegt að fá karl eða konu.

Nú mæli ég sérstaklega með grein í sunnudagsmogganum síðasta um íranskar konur. Undir heitinu Sterkar konur í feðraveldi. Þarna segi ég frá samtölum mínum við íranskar konur. Nóg af skemmtilegum myndum!

Og gott ef það var ekki bara eitt stykki leiðari í gær sem vitnaði í málið.

Síðasta vetradag hreinsaði hún loks út allan skítinn sem hafði angrað hana allt of lengi. Þetta var mesta vorhreingerning sem sögur fara af enda hætti hún að hýsa skít fyrir aðra og sendi skítköstin í allar áttir. Þó mestmegnis á einn stað, með viðkomu á lögreglustöðinni.
Nú mátti sumarið koma með bjarta tíð og blóm í haga.

Má ég þá frekar biðja um að vera léttlynd en þunglynd?

Það ætti að vera til gömlufólkavernd sem hefði svipað hlutverk og barnaverndarnefnd. Svolítið hressandi að nýji páfinn sé 78 ára gamall. En það virðist greinilega ver í tísku meðal páfa að vera nær dauða en lífi. Er maður þá ekki líka nær guði?

Á sumum dögum er lífið erfiðara en á öðrum dögum. Þá er gott að taka vídjó, kaupa bland í poka og hanga í sófanum.

Á næsta laugardagsfundi VG í Reykjavík, 16. apríl, verður sjónum beint að
Íran, ástandi og horfum í þessu sérstaka ríki við Persaflóa.

Íran hefur verið nokkuð í kastljósi vestrænna fjölmiðla að undanförnu,
einkum vegna umdeildra áforma stjórnvalda þar um nýtingu kjarnorku. Þar
fyrir utan eru helst sagðar fréttir af togstreitu íhaldssamra og
frjálslyndra afla um ýmis grundvallaratriði í stjórnskipan landsins.

Halla Gunnarsdóttir, sem nýlega ferðaðist um Íran, segir fundinum frá
upplifun sinni af samfélaginu, breytingum sem liggja í loftinu, stöðu
kvenna í landinu og áhrifum af þrýstingi erlendra ríkja á klerkastjórnina
í Teheran, svo nokkuð sé nefnt. Steinþór Heiðarsson mun stikla á stóru í
sögu landsins frá lokum síðari heimsstyrjaldar fram að byltingu íslamista
árið 1979.

Að venju hefst laugardagsfundurinn kl. 14 og er haldinn í Suðurgötu 3.
Allir velkomnir.
_______________________________________________

Ég er Halla svo þið verðið að mæta. Þetta verður þrusufundur¨.

Atkvæðagreiðslu um hentuga æfingatíma er lokið.
Niðurstaðan er sú að æfingar Fótboltafélags Íslands verða fyrst um sinn á mánudögum kl. 19.
Fyrsta æfing verður næsta mánudag. Æfingin verður fyrir aftan hjónagarðana og iðkendur þurfa að koma með einn bolta hver. Ef þið eigið ekki bolta, reddið ykkur bolta!

Uppskeruhátíðarnefnd er orðin ansi vel skipuð en forstýra er Kristín Tómasdóttir. Þjálfarinn nýtir sér því veraldarvefinn hér og skorar á hana að skipuleggja fyrstu uppskeruhátíðina sem að sjálfsögðu ætti að vera helgina eftir fyrstu æfinguna, þ.e. að rúmri viku liðinni.

Fyrrverandi, núverandi og tilvonandi knattspyrnuhetjur sameinumst á mánudag kl. 19.

Hið nýstofnaða Fótboltafélag Íslands fer nú að boða til fyrstu æfingar. Hvorki meira né minna en 17 manns hafa lýst yfir áhuga á að spila með liðinu og enn fleiri ætla að taka þátt í uppskeruhátíðum. Sérstakir velunnarar sem ekki nenna að spila fótbolta eru hvattir til að mæta á æfingar og hvetja liðið áfram.
Lofað hefur verið að bjóða upp á upphitunarleiki sem ekki krefjast þess að fólk sparki í bolta.

Á uppskeruhátíðum verða veitt verðlaun fyrir bestu mætingu á æfingar auk þess sem liðið kýs besta þjálfara félagsins. Það eru mjög lýðræðislegar kosningar.

Tveir formenn hafa boðið sig fram. Annar er karl og hinn er kona og þykir mér rétt að þau sitji bæði þar til Samfylkingin hefur valið sinn formann. Við viljum síst að kosningabaráttan hverfi í skuggann af eipi þeirra Samfylkingarmanna.

Ef þú ert ekki búin/-n að skrá þig í þetta rosalega lið eða fékkst af einhverjum sökum ekki póst sem var sendur út fyrr í dag, kommentaðu þá hér og mundu eftir að láta netfangið þitt fylgja með.
Þú gætir orðið næsta stjarna Íslands! Með góðri þjálfun er allt mögulegt.