Hér er draumurinn

Þegar líða tók á kvöldið fór hún að senda fleiri og fleiri sms. Til allra vinkvenna og vina, bara svona að tjékka á stemmningunni. Augun voru fljótandi og það var orðið óþægilega grunnt á allar gleymdu tilfinningarnar.
Hún fékk mörg sms til baka. Hvernig var næturlífið eiginlega fyrir gsm símana?
Það var eitt sms sem gladdi hana sérstaklega. Hann vildi hitta hana.
Þau hittust á reykmettuðum bar þar sem tónlistin er lág, svona miðað við bar. Hún þekkti fólk hvert sem litið var og það fór óneitanlega vel með egóið. Eftir stutta stund var hann farinn að halda í hönd hennar undir borðinu. Þau komu inn á staðinn hvort í sínu lagi, en yfirgáfu hann saman.
Augngotur og maginn fullur af fiðrildum. Sumarnóttin var þeirra.
Hann talaði um tilfinningar sínar til hennar. Ölið gerir allt léttara. Það kom henni á óvart. Einlægni hans hitti hana beint í hjartastað.
Næsta dag beið hún við símann. Við hvert sms kipptist hún við og vonaðist til að heyra frá honum. Honum sem í gær leit á hana sem gyðju. Hún varð leið á að bíða og vitandi að nú eru tímar jafnréttis ákvað hún að ríða á vaðið. Það leið og beið en ekkert svar.
Tveimur dögum síðar var hún enn að hugsa um hann og ákvað að prófa að hringja. Hann skellti á.
Þá var komið að næsta kafla.