Bloggið um veginn

Já, og tilvitnun dagsins: „Ýmsar getgátur eru uppi um hvað hafi orðið um plútoníumbirgðirnar …“

Ég var sofnaður kortér í tíu, kortéri á undan áætlun. Fimm mínútum síðar vakna ég við háværar samræður þriggja manna fyrir utan húsið mitt. Hafi það ekki eyðilagt allt þá hringir síminn sex mínútum síðar. Ég hef ekki getað sofnað síðan, þrátt fyrir lítinn svefn undanfarið. Ég veit hreinlega ekki hvað ég á af mér að gera. Gráta kannski?

Ég svaf tvo tíma í nótt. Í gærnótt svaf ég fjóra tíma og annað eins nóttina þar á undan. Samt mætti ég á réttum tíma í vinnuna og í skólann klukkan átta í morgun, enda þótt ég ætti ekki að mæta fyrr en kortér í tíu. Ég hef sumsé sofið samanlagt jafnlengi yfir eina helgi og ég kysi að sofa á einni nóttu undir venjulegum kringumstæðum. Og ég er uppþembdur af kaffi. Heilsa mín til anda og líkama sætir því stórsókn beggja vegna vígvallarins.

Óðum snappa ég. Óðum.

Vatn komið á að nýju í Harbin.

Heitt vatn komið á í Grafarvogi.

Það er sem mig hefur alltaf grunað. Grafarvogur og Harbin eru einn og sami staðurinn.

Ég skal leyfa hverjum sem vill fjármagna að nota hugmynd mína um að framleiða „Life ends at 40“ lyklakippur. Hana, þar fór fjórðungur lesenda.

Í fyrstu hélt ég að hér væri verið að rugla saman tveimur mönnum, þar sem ég hef aldrei áður heyrt George Best kallaðan fimmta bítilinn. Hins vegar hét fyrsti trommari Bítlanna Pete Best, sem þeir skiptu út fyrir Ringo Starr á Hamborgartímabilinu. Svo hefur Stuart Sutcliffe oft verið nefndur fimmti bítillinn, þótt „gleymdi bítillinn“ hefði verið meira viðeigandi. Hann var alltaf mjög feiminn, sneri bakinu í áhorfendasalinn þegar hann spilaði, kunni ekki á hljóðfæri, var listanemi og afbragðsmálari, en það sagði fólk áreiðanlega bara vegna þess að hann dó. Hann dó úr heilablóðfalli, að því er talið er, áður en Bítlarnir urðu frægir. Skömmu áður höfðu hann og Lennon lent í rifrildi vegna þess að Sutcliffe fannst McCartney ekki vilja hafa sig með lengur, og líklegast var það rétt hjá honum. McCartney hefur væntanlega stefnt hærra en svo að hafa hæfileikalausa bassaleikara í hljómsveitinni.
Um þennan gleymda bítil var gerð kvikmyndin Backbeat, og þykja leikararnir allir ískyggilega líkir fyrirmyndum sínum. Myndin mun þó vera ofurdramatíseruð, eins og allar aðrar slíkar myndir.

Ég var að koma heim af jólaglöggi starfsmannafélags verslunarinnar sem ég vinn í og nafngreini ekki. Þar flutti ég nokkur ljóð að eigin frumkvæði. Mest var ég hissa á að ég kæmist upp með að segja að verslunin væri ákveðið form auðvalds. Ég skal játa að rétt áður ég sagði það hugsaði ég: Jæa, nú verð ég limlestur. En ég var ekki limlestur. Kannski verður það í næsta skipti.

Ef jólin eru eitthvað í líkingu við lagið Svona eru jólin þá eru þau ömurleg. Þó þau ekki væru nema á par við sönginn í laginu, þá væru þau hræðileg.

Tilvitnun dagsins
Police chief Wiggum (on the phone): Uh, Mrs. Simpson, I have some bad news. Your husband was found DOA..
Marge: Oh my god! He’s dead?
Wiggum: Oh no, I mean DWI! I always get these police terms mixed up (hangs up).
Woman in police station: My name is Mrs. Phillips. You said my husband was DWI?
Wiggum: Uh… talk to one of those officers over there. I’m going to lunch

Þeir sem ekki vissu þá er DOA skammstöfun fyrir dead on arrival og DWI þýðir driving while intoxicated.

Ætli þessi fái vinning fyrir að vera númer þúsund?

Ég hef velt því fyrir mér hvað ofan í annað, aftur og aftur, fram og til baka, hvers vegna í ósköpunum Fréttablaðið fær að birta niðurstöður skoðanakannana sinna, ógagnrýnt fyrir vinnubrögð sín, sem eru á par við þau sem búast mætti við af límsniffandi gagnfræðanemum (ekki svo að skilja að ég álíti að gagnfræðanemar sniffi upp til hópa lím). Þeir sem aldrei hafa lært tölfræði ættu ekki að leika sér að henni.

Fréttablaðið hefur opinberlega gagnrýnt þá stefnu sem Gallup rekur í úrvinnslu gagna, svo og aðferðir þær er Gallup beitir við gagnaöflun. Það er líkt og ef samfélag órangútanapa á Borneó gagnrýndi aðferðafræði spendýralíffræðinga. Aparnir á Fréttablaðinu þekkja enda ekki muninn á tölfræði og rassgatinu á Össuri Skarphéðinssyni. Þeir vita ekki sem er, að þegar kemur að ályktandi tölfræði, þá er Gallup kóngurinn, en Fréttablaðið er hirðfíflið. Vísindi skulu í höndum sérfróðra höfð, en ekki milli lúka einhverra krómagnónmanna. Kannanir Fréttablaðsins eru til þess eins gerðar, að þær megi hafa áhrif á kosningar, en ekki til þess þær geti sagt fyrir um úrslit þeirra. Þær eru eingöngu skoðanamyndandi, en ekki vísindalegar.

Þó held ég því ekki fram að Fréttablaðinu hafi ekki farið neitt fram við þessar kannananir sínar. Upphaflega voru niðurstöðurnar fengnar með netkönnunum á vefsíðu Vísis. Þær niðurstöður héldu þeir vitaskuld fram að væru áreiðanlegar. Og svo vilja þeir láta taka sig alvarlega.

Þjóðverjar deila um jólasveininn. Hvernig væri að við samþykktum bara jólin fyrir það sem þau eru og hefðum kaupmenn í staðinn?