Bloggið um veginn

Hér hefst nýr liður, en í lok hvers mánaðar skal bloggurum veittar viðurkenningar fyrir ákveðin afrek á ólíkum sviðum.

Bloggari júnímánaðar: Ármann Jakobsson
Framfarabloggari júnímánaðar: Steindór Grétar Jónsson
Eipari júnímánaðar: Atli Freyr Steinþórsson
Lygari júnímánaðar: Birgir Már Daníelsson
Letibloggari júnímánaðar: Elísabet Karlsdóttir

Ef einhver hefur eitthvað um þetta að segja er þeim að sjálfsögðu heimilt að tjá sig. Tæpast mun það þó hafa áhrif á úrslitin. Sé einhver viðurkenningarhandhafi júní mánaðar ekki sáttur skal þeim bent á að gera betur næst. En það er einmitt markmið þessa viðurkenninga. Aftur á móti hef ég ekkert að segja við þá sem eru sáttir. Óska ég þeim til hamingju og mega þeir una við sitt uns dagur arftakanna rennur upp.

Verðlaun fyrir bestu smásöguna eru enn í athugun en líklegt þykir mér að valið muni standa á milli The Catcher in the Rye eða Bréf til Láru.

Ítrekun
Vinsamlegast sendið mér e-mail á arngrimurv@hotmail.com með staðfestingu á þátttöku yðvar í smásagnakeppnina ef þið viljið taka þátt. Ah, what’s the use? Það hefur greinilega enginn áhuga á þessu.
Reglubreytingar í smásagnakeppni
Smásögur þurfa að vera a.m.k. þrjár Word síður í leturstærðinni tólf með default línubili. Sérstök leyfi verða þó veitt ef ástæða fyrir því að sögurnar megi ekki vera lengri er ærin.

Ekki er ég á eitt sáttur við það að Shout Outin hennar Elísabetar virki en ekki mín!

Tom Waits
Ron Perlman
Gunnar Þórðarson
Lionel Ritchie
Guy Pearce
Ben Affleck

Hvers vegna fólk hefur gaman að þessu mun ég aldrei komast að.

Orðatiltækið „Cat got your tongue?“ er algjör óþverramunnsöfnuður. Réttilega íslenskað: „Reif kattarófétið úr þér tunguna svo blóðið rennur án afláts niður í kok þér?“

Ef kettir tækju upp á slíku ættu þeir varla tilkall til hins verðuga titils „vinsælasta gæludýrið“.

Skyldi maður verða hlessa? Þessi nótt virðist ætla að vera jafn fljót að líða og bölvuð helgin! Svona er þetta þegar hrukkurnar fara að koma sér fyrir og maður finnur ellina hellast yfir sig eins og hland úr næturgagni satans. Tíminn fer hreinlega að fara í sandinn! Ekki geri ég grein fyrir dagamun lengur og sjaldnast man ég hvaða dag ég gerði hitt og hvaða dag ég gerði þetta. Allir dagar eru eins. Til forna var þetta ástand talið vera hið versta mögulega helvíti sem hægt væri að hugsa sér. Ekki man ég hvað þeir kölluðu það en ég kalla það rútínu. Rútínan er gersamlega að ganga fram af mér. Við skulum þó sjá til hversu rútínan breytist við útborgun. Þær eiga það til þessar rútínur.

Að vaka í all nótt, drekka mikið kaffi, semja gott lag, lesa lengra í Bréf til Láru og hafa samt orku til að mæta til vinnu. Já, það er ekkert grín að vera CORVVS NOCTVRNVS en einhver þarf að vera það. Hver er svo sem heilbrigðin í því að vaka heilu dagana?

Hefur í huga minn upp komið hugmynd um það hvernig blogg þetta geti sem skemmtilegast orðið. Í tilefni af Bókmenntasumri (eða svo hefi ég titlað sumar þetta) hef ég ákveðið að koma hér upp keppni í þeirri viðkvæmu listgrein sem smásagnagerð getur verið. Sögum ber að skila fyrir þann 20.júlí og hvet ég alla (skuli einhver taka þátt) til að vanda sig sem mest við smásögu sína. Smásögur skulu berast í tölvutæku formi, á diskettu ellegar tölvupósti. Að sjálfsögðu skal vera titill á sögunni og nafn höfundar.

Reglur
Engin skáldaleyfi skulu gefin hvað varðar stafsetningu en einkum og sér í lagi málfræði. Rétt málfar skal aðhyllst. Orðabók Marðar Árnasonar má nota undir vissum kringumstæðum. Ekki má nota „séríslenskuð orð“ svo sem fokk og sjitt nema í talmáli persóna sögunnar. Ég, sem dómari keppninnar, áskil mér fyllsta rétt til að dæma eftir eigin geðþótta og gagnrýna málfar og/eða stafsetningarvillur.

Hjálpargögn sem mælt er með
Handbók um ritun og frágang og Íslensk Málfræði eftir Björn Guðfinnsson.

Hjálpargögn sem engan veginn er mælt með
Orðabók Marðar Árnasonar.

Verðlaun
Verðlaun verða kynnt síðar en þó er líklegast miðað við eðli keppninnar að þau verði á bókarformi.

1984
Keppnin um hver hlýtur þau verðlaunin heldur áfram þrátt fyrir tilvist hinnar keppninnar.

MIKILVÆGT!
Hverjum sem væri er velkomið að taka þátt en mælst er til þess að allir sem vilja taka þátt skuli láta vita af sér í síma 698-2359 eða með tölvupósti á arngrimurv@hotmail.com. Þannig má fresta skiladagssetningu sagnanna ef ske kynni að einhver næði ekki að skila á settum tíma.

Veðrið í dag varpar frekara ljósi á alhæfingar mínar um gæði sunnudaga, en þau tel ég engin.

Ólíkt flestum bloggurum á ég í engum vandkvæðum með íslensku stafina heldur kommentakerfið mitt. Hversu lengi á þetta blessaða k.k. mitt að vera „Closed for Maintenance“? Þessi þjónusta gengur alveg fram af manni!

Hmm, Bibbi alltaf í Absynthinu.

Annars þá hef ég verið að minnka drykkju mína talsvert án þess þó einu sinni að reyna það. Skortur á fjármunum gerir manni slíkt. Alltaf á ég þó byrgðir af sígarettum.

Svo virðist sem tóbaksvarnarnefnd sé búin að ákveða það að hreinlega banna alla sölu á venjulegum sígarettum eftir áramót. Þetta gæti sumum virst sniðugt og hafa margir áreiðanlega hugsað: Já! Þá er mun ólíklegra að fólk ánetjist þessum fjára! Að sjálfsögðu er það firra að ætla sem svo. Að frátöldu því að það er alveg jafn auðvelt að ánetjast lights sígarettum virðist tóbaksvarnarnefnd ekki gera sér grein fyrir því að þeirra lagapakki sé ekki af hinu góða. Það er alkunna að reykingamenn sem skipta yfir í lights rettur halda að þeir geti þar með minnkað við sig þegar í raun og veru aukist neyslan um allt að helming. Þar af leiðir að ef eingöngu verða seldar lights sígarettur hér á landi munu dauðsföll af völdum lungnakrabbameins hækka upp úr öllu valdi ár hvert. Að sjálfsögðu er tóbaksvarnarnefnd alveg sama um slíkt. Þeir hugsa bara um nýjar leiðir til að auka hagnað ríkisins. Það hefur svo sem aldrei þótt siðferðislega rangt að hækka tóbaksverð svo að reykingamenn þurfi að herða beltið betur en það tel ég þó alrangt að stuðla að fleiri dauðdögum fyrir það eina markmið ríkisins að selja fleiri pakka.

Litla bróður mínum finnst Sleikir vera fallegt nafn fyrir hund. Það finnst mér aftur á móti ekki.

Ég gleymdi algjörlega að mæta í gítarskólann í dag. Kjáni get ég verið.

Þessi nýji blogger er alveg hræðilegur! Sem dæmi má taka það að þeir bjóða aðeins upp á sjö ný template en engin af þeim gömlu. þetta er náttúrulega alveg fáránlegt þar sem við sem notuðum gamla kerfið erum öll með önnur template þá er aldrei að vita hversu vel þetta fúnkerar saman. Ég hef mínar efasemdir um að það fúnkeri vel. Það ætla ég að vona að þeir færi gömlu templatin inn í nýja kerfið.

Á æskuárum mínum
var alltaf leikið í svona kastala á skólalóðinni. Einhvern daginn er við vinirnir hugðumst gera okkur glaðar frímínútur var þar fyrir krakkaskríll sem hrópaði hástöfum þegar einhver nálgaðist kastalann: „Farið þið niður! Við viljum friður!“ Áður en ég vissi af voru vinir mínir komnir upp í kastalann og farnir að kyrja með. Þetta þótti mér lélegt rím svo ég kom með eigin tilllögu: Farið þið niður það sem við viljum er bara friður. En eins og allar góðar tilllögur var hún kæfð í fæðingu.

Margfari
Ég þyki líka líkur Ben Affleck. það þykir mér týra.

Skerí tilhugsun
Blæðari með Aids.

Undarlegt
þykir mér að fólk geti verið Björnsson/dóttir þegar eignarfallið af björn er bjarnar.

Vinnan
Ég vona að þessari kantsteinavinnu fari að ljúka.

Tilveran
Kíkjið á þetta! Maður er bara orðinn tónlistarmaður vikunnar.

Til marks um skilningsleysi vinnufélaga minna og meintan ótrúverðugleik minn í starfi hafa þeir ávallt neitað að trúa því að ég geti orðið veikur. Eitt vil ég þeim segja, með von um að þeir lesi, að ég þjáist (já í alvöru!) vissulega af mígreni og það háir mér meir en þeir geta ímyndað sér. Það þykir mér vottur um móral að þeir geti ekki komið sér í skilning um það og hætt að hringja í mig á veikindadögum mínum til þess eins að hrella mig. Ég vona að þeir taki þetta ekki of nærri sér en ég tel þetta vera algert þroskaleysi af þeirra hálfu.

Hvað góðar fréttir varðar þá líður mér aðeins betur en þó gæti mér liðið mun betur.